នាយករដ្ឋមន្ត្រី ព្រមានឲ្យ​​បោះ​ឆ្នោត​​ជូន​គណបក្ស​ប្រជាជនដើម្បី​ចៀសផុត​ពី​សង្គ្រាម​

​ដោយ ស៊ុន ណារិន​ ថ្ងៃសុក្រ ទី19 មេសា ឆ្នាំ2013 ម៉ោង15:41 VOD

នាយករដ្ឋមន្ត្រី នៅ​ថ្ងៃ​សុក្រនេះ បាន​ព្រមាន​ម្ចាស់ឆ្នោត​ថា បោះ​ឆ្នោត​ជូន​គណបក្ស​ប្រជាជន​​កម្ពុជា ឲ្យ​លោក​អាច​បន្ត​ដឹកនាំ​ប្រទេស ដើម្បី​​ចៀស​ផុត​​ពី​សង្គ្រាម និង​​អាច​រស់​នៅ​​មាន​​ជីវិត​​បា​ន ប្រកប​ដោយ​ការអភិវឌ្ឍ​។​

​នាយករដ្ឋមន្ត្រី​ថ្លែង​បែបនេះ ជា​ការឃោសនា រក​សំឡេងឆ្នោត មុន​យុទ្ធនាការ​បោះឆ្នោត នៅ​ចុង​ខែ​មិថុនា មកដល់ និង​ខណៈ​ការបោះឆ្នោត​ថ្នាក់​ជាតិ​ខិត​ជិត​មក​ដល់ នៅ​ថ្ងៃ​ទី​២៨​​ ខែកក្កដា ឆ្នាំ​២០១៣​នេះ​។​

​ក្នុង​ពិធី​​សម្ពោធ​សមិទ្ធផល​​នានា នៅ​ស្រុក​ថ្ពង ខេត្ត​កំពង់ស្ពឺ ព្រឹក​ថ្ងៃ​ទី​១៩ ខែ​មេសា​នេះ​ នាយករដ្ឋមន្ត្រី​មានប្រសាសន៍ថា បើ​ជឿ​ទុកចិត្ត ហ៊ុន សែន ដែល​ដឹកនាំ​ប្រទេស​ដោយ​មាន​ការអភិវឌ្ឍ សូម​​បោះឆ្នោត​ជូន​គណបក្ស​ប្រជាជន​កម្ពុជា​។ លោក​បញ្ជាក់ថា បោះ​​ឆ្នោត​ជូន​គណបក្ស​ប្រជាជន​កម្ពុជា ឲ្យ​លោក​បន្ត​ដឹកនាំ គឺ​បោះ​ដើម្បី​ប្រជាជន​ខ្លួនឯង​។ លោកអំពាវនាវ​ឲ្យ​ប្រជាពលរដ្ឋ ជា​ម្ចាស់ឆ្នោត មានការ​ប្រុងប្រយ័ត្ន ដើម្បី​កុំឲ្យ​​បោះឆ្នោត​ហើយ សោកស្តាយ​​មួយ​ជីវិត​​ ៖ “​ការបោះ​ឆ្នោត​ជូន​គណបក្ស​ប្រជាជន មាន​តម្លៃ​​​ស្មើ​នឹង​ការបោះ​ឆ្នោត ឲ្យខ្លួន​ឯង​​តែ​ប៉ុណ្ណោះ ព្រោះ​​បោះ​​ដើម្បី​​អ្វី​? បោះ​ដើម្បី​រស់រាន​មានជីវិត បោះ​ដើម្បី​ចាក​ផុត​ពី​សង្គ្រាម បោះ​​ដើម្បី​សន្តិភាព បោះ​​ដើម្បី​​ការ​អភិវឌ្ឍ ដូច្នេះ​បោះឲ្យ​​គណបក្ស​ប្រជាជន ហើយ​​ឲ្យខ្ញុំ​ព្រះករុណា​ខ្ញុំ​បន្ត​​តំណែង​​ជា​នាយក​រដ្ឋ​មន្ត្រី មាន​តម្លៃ​​បោះ​ស្មើ​ជូន​​ប្រជាជន​ខ្លួនឯង​​តែ​ប៉ុណ្ណោះ ព្រោះ​បោះ​ខុស​ជា​ការបំផ្លាញ​ខ្លួនឯង​​ទេ គេ​ហៅថា សម្រេច​មួយ​ថ្ងៃ ចង្រៃ​មួយ​ជីវិត រឿង​ធ្វើ​រដ្ឋប្រហារ​​ទម្លាក់ សម្តេច ព្រះ​នរោត្តម នោះ​​ហើយ​សម្រេច​​ចិត្ត​ខុស​មួយថ្ងៃ ចង្រៃ​​មួយជីវិត ករណី​ដូច​គ្នា​នឹង​កើត​ឡើង​នៅពេល​ខាងមុខ​”​។​

ស្តាប់សំលេង៖   

​កន្លងទៅ​ លោកនាយក​រដ្ឋមន្ត្រី ធ្លាប់​ព្រមាន​ថា គម្រោង​អភិវឌ្ឍន៍​មួយចំនួន នឹង​ត្រូវ​បង្កក ប្រសិនបើ​គណបក្ស​ប្រជាជន​កម្ពុជា មិន​​បាន​ឈ្នះ​ការបោះឆ្នោត​នៅ​ខែ​កក្កដា ខាងមុខ​។​ ​នៅ​ថ្ងៃ​សុក្រ​នេះ លោកនាយក​រដ្ឋមន្ត្រី ក៏​បាន​ព្រមាន​ថា ក្រុមនិស្សិត នឹង​ឈប់​​​វាស់វែង​ដី​ជូន​ប្រជាពលរដ្ឋ ដែល​នៅ​សេសសល់ ប្រសិនបើ​គណបក្ស​ប្រជាជន​កម្ពុជា មិន​ទទួលបាន​ជ័យជម្នះ​ជា​រដ្ឋាភិបាល​​ដឹកនាំ​ប្រទេស​ ៖ “​ដូច្នេះ​សូម​ បញ្ជាក់​ជូន​ឲ្យហើយ គឺថា​បើ​ចង់ឲ្យ​យុវជន​ត្រឡប់​មក​វិញ​គឺ វិធី​តែ​មួយគត់​គឺ​បោះឆ្នោត​ឲ្យ​គណបក្ស​ប្រជាជន នោះ​នឹង​មកវិញ​វាស់​ហើយ​”​។​

អ្នកនាំពាក្យ​គណបក្ស​សង្គ្រោះ​ជាតិ ដែល​កើតចេញ​ពី​គណបក្ស​សម​រង្ស៊ី និង​គណបក្ស​សិទ្ធិមនុស្ស លោក យឹម សុវណ្ណ មាន​ប្រសាសន៍​ថា សារ​​របស់​​នាយក​រដ្ឋមន្ត្រី ជា​​ការ​ភ័យ​ខ្លាច​​ចាញ់​ការបោះឆ្នោត និង​ជា​សារ​គំរាម​មួយ តែ​អ្វី​ដែល​សំខាន់ គឺ​ប្រជា​​ពលរដ្ឋ យល់​ដឹង​ពី​បញ្ហា​នេះ ​៖ “​ខ្ញុំ​យល់​ថា គណបក្ស​ណា​ជាប់ឆ្នោត ក៏​មាន​សន្តិភាព​ដែរ ពី​ព្រោះ​ប្រជាពលរដ្ឋ​ខ្មែរ​ស្អប់​សង្គ្រាម សហគមន៍​​អន្តរជាតិ​ខំប្រឹង​អស់​លុយ រាប់​ពាន់​លាន​ដុល្លារ​ដើម្បី​សន្តិភាព តែ​ប្រសិន​ជា​ដើរ​​ទៅ​បង្កើត​សង្គ្រាម គឺ​អ្នក​នោះ​ជា​ឧក្រិដ្ឋ​ជន​”​។​

សម្រាប់​ប្រធាន​មជ្ឈមណ្ឌល​សិទ្ធិមនុស្ស​កម្ពុជា លោក អ៊ូ វីរៈ មានប្រសាសន៍ថា នាយក​រដ្ឋមន្ត្រី​ជា​អ្នក​បញ្ចប់​សង្គ្រាម​ជាមួយ​ខ្មែរ​ក្រហម ដែល​បណ្តាល​​ឲ្យ​​នាយក​រដ្ឋ​មន្ត្រី​​លើកឡើង​បែប​នេះ​។ លោក​ថា ការ​ចាញ់ឆ្នោត​របស់​​គណបក្ស​ប្រជាជន​កម្ពុជា អាច​ប៉ះ​​ពាល់​​ដល់​មន្ត្រី ឬ​អ្នក​ដែល​មាន​ទ្រព្យសម្បតិ្ត​ច្រើន ​​៖ “​ខ្ញុំ​អត់​យល់​ថា គណបក្ស​ប្រជាជន នឹង​បង្កើត​​សង្គ្រាម​បើ​គាត់​ចាញ់ឆ្នោត​ទេ នេះ​​ខ្ញុំ​មិន​ជឿ​ទេ បើសិន​គាត់​ធ្វើ​អញ្ចឹង​ប្រវត្តិសាស្ត្រ​នឹង​ជេរ​គាត់ ហើយ​ប្រជាពលរដ្ឋ​នឹង​​ជេរ​គាត់​ងាប់​​ហើយ។ បើ​រឿង​អស្ថិរភាព​សង្គម នឹង​ប៉ះពាល់​អ្នកមានៗ​ជាច្រើន នៅពេល​បច្ចុប្បន្ន​នេះ អញ្ចឹង​រឿង​អស្ថិរភាព រឿង​សង្គ្រាម​អី​នេះ វា​​នឹង​ប៉ះពាល់​មន្ត្រី​បច្ចុប្បន្ន ដែល​កំពុងតែ​មាន​លុយ​ច្រើនណាស់ មាន​វីឡា​ច្រើន មាន​ដី​ច្រើន​គឺ​ប៉ះពាល់។ ដូច្នេះ​ពួកគាត់​មិន​ហ៊ាន​បង្ក​​សង្គ្រាម គាត់​មិន​ចង់​ទេ​បង្ក​សង្គ្រាម​នោះ ខ្ញុំ​មិន​ជឿ​ទេ​បាទ​”​។​

​គួរបញ្ជាក់​ថា គណបក្សកាន់អំណាច និង​គណបក្ស​ប្រឆាំង កំពុង​តែ​បង្កើត​ការឃោសនា​នានា បង្ហាញ​ពី​គោលនយោបាយ​របស់​ខ្លួន ដើម្បី​ទទួលបាន​ការគាំទ្រ​ពី​ម្ចាស់​ឆ្នោត នៅ​ថ្ងៃ​ទី​២៨​ខែកក្កដា ខាង​មុខ​៕