KI Media: បក្សកាន់អំណាច បក្សប្រឆាំង និងបក្សហ្វ៊ុនស៊ិនប៉ិច ត្រូវបានអញ្ជើញឲ្យចូលរួម ក្នុងទិវាពលកម្មអន្តរជាតិ ១ ឧសភា

ថ្ងៃទី 28 មេសា 2013

ដោយ: មុនីរាជ

Cambodia Express News

ភ្នំពេញ: លោក រ៉ុង ឈុន ប្រធានសហភាពសហជីពកម្ពុជា និងលោក អាត់ ធន់ ប្រធានសហភាពការងារកម្ពុជា នៅថ្ងៃទី០១ ខែឧសភា ឆ្នាំ២០១៣ ថ្ងៃទិវាពលកម្មអន្តរជាតិ នឹងដឹកនាំកម្មករកម្មការិនីចំនួន ១០.០០០ នាក់ ដើម្បីធ្វើការហែរក្បួន ដាក់ញ្ញត្តិជូនរដ្ឋសភា និងរាជរដ្ឋាភិបាល ទាក់ទងបញ្ហាកម្មករ។ គម្រោងរៀបចំពិធីជួបជុំសាទរទិវាពលកម្មអន្តរជាតិ ថ្ងៃ១ឧសភា របស់សហជីពកម្មករដូច្នេះ ត្រូវបានមេដឹកនាំសហជីពកម្មករលោក រ៉ុង ឈុន និងលោក អាត់ ធន់ អះអាងថា នឹងនៅតែធ្វើ បើទោះបីជាសាលារាជធានីភ្នំពេញ មិនអនុញ្ញាតឲ្យក៏ដោយ។

លោក រ៉ុង ឈុន បានថ្លែងប្រាប់គេហទំព័រ CEN នៅព្រឹកថ្ងៃទី២៨ ខែមេសា ឆ្នាំ២០១៣ ឲ្យដឹងថា នៅថ្ងៃទី០១ ឧសភា ដែលជាទិវាពលកម្មអន្តរជាតិពិភពលោក ខាងលោកបានអញ្ជើញគណបក្សនយោបាយចំនួន ៣ មានដូចជា គណបក្សសង្គ្រោះជាតិ គណបក្សប្រជាជានកម្ពុជា និងគណបក្សហ្វ៊ុនស៊ិនប៉ិច មកចូលរួម និងទទួលយកសំណើ។
ប៉ុន្តែលោក រ៉ុង ឈុន នៅមិនទាន់មានការឆ្លើយតបពីគណបក្សនយោបាយទាំងបីថា មកចូលរួម ឬមិនមកចូលរួមនៅឡើយទេ។

ប្រធានសហភាពសហជីពកម្ពុជា បានឲ្យដឹងទៀតថា ខ្លឹមសារញ្ញត្តិ ដែលត្រូវដាក់ជូនរដ្ឋសភា និងរាជរដ្ឋាភិបាលមានដូចជា :

-ចង់ឲ្យបញ្ចូលប្រាក់អប្បបរមាក្នុងវិស័យឯកជននៅគ្រប់វិស័យទាបបំផុត ១៥០ដុល្លារ អាមេរិកក្នុង១ខែ។
- ឲ្យដាក់បញ្ចូលប្រាក់បៀវត្សរ៍អប្បបរមាមន្ត្រីរាជការ ប៉ូលីស ទាហាន ១លានរៀលក្នុងខែ។
- ឲ្យរាជរដ្ឋាភិបាលថ្មីត្រូវតែគិតគូរអំពីប្រាក់ជូនមន្ត្រីរាជការ ក្នុងថ្ងៃបុណ្យជាតិ។
- លក្ខខណ្ឌការងារកុំឲ្យមានការរើសអើងសហជីព។
- លុបបំបាត់កិច្ចសន្យាការងារខ្លី។
- បញ្ចុះតំលៃប្រេងឥន្ធនៈឲ្យនៅត្រឹម ៣៥០០រៀលក្នុង១លីត្រ។
- សុំឲ្យនាំខ្លួនលោក ឈូក បណ្ឌិត មកផ្តន្ទាទោស(ករណីបាញ់កម្មករនៅខេត្តស្វាយរៀង)។
- បង្កើតតុលាការការងារ។
- សូមឲ្យផ្តល់សច្ចាប័នទៅលើអនុសញ្ញា ILO(អាយអិនអូ) ...។
សូមជម្រាបថា នៅក្នុងកិច្ចប្រជុំពិភាក្សារវាងតំណាងសាលារាជធានីភ្នំពេញ និងសហជីព កាលពីព្រឹកថ្ងៃទី២៦ ខែមេសា ឆ្នាំ២០១៣ សាលារាជធានីភ្នំពេញ មិនអនុញ្ញាតឲ្យសហភាពសហព័ន្ធសហជីព និងសមាគមចំនួន ១២ មកពីវិស័យចំនួន៩ រួមមានវិស័យកាត់ដេរ សំណង់ ទេសចរណ៍ ចំណីអាហារ និងសេវាកម្ម មន្ត្រីរាជការសេដ្ឋកិច្ចក្រៅប្រព័ន្ធ កសិកម្ម ធនាគារ និងផ្នែកទូរគមនាគមន៍ ធ្វើការហែក្បួនពីស្តាតអូឡាំពិក ទៅរដ្ឋសភា នៅថ្ងៃទី០១ ខែឧសភា ឆ្នាំ២០១៣ទេ។ ប៉ុន្តែឲ្យរង់ចាំការសម្រេចពីក្រសួងមហាផ្ទៃ។
សូមរំលឹកថា កាលពីថ្ងៃទី១១ ខែមេសា ឆ្នាំ២០១៣ សហភាពការងារកម្ពុជា បានដាក់លិខិតទៅសាលារាជធានីភ្នំពេញ ដើម្បីសុំការអនុញ្ញាត ដោយជួបជុំគ្នា នៅពហុកីឡាដ្ឋានជាតិអូឡាំពិក និងដង្ហែជាក្បួនតាមបណ្តោយផ្លូវព្រះសីហនុ ឆ្ពោះទៅកាន់មន្ទីររដ្ឋសភាជាតិ ដើម្បីធ្វើការសម្តែងមតិ នៅថ្ងៃទិវាពលកម្មអន្តរជាតិ ១ឧសភា ដែលមានអ្នកចូលរួមចំនួន ២ ម៉ឺននាក់៕