បក្សប្រឆាំងធ្វើបាតុកម្មទាមទារផ្លាស់ប្តូរគជប

(រូបថត៖ Paul Seng on Facebook)

24.04.2013
ដោយ ហេង រស្មី VOA Khmer

ភ្នំពេញ៖ យ៉ាងតិចមានក្រុមបាតុករ ប្រមាណជាងមួយពាន់នាក់ នៅថ្ងៃពុធនេះ បានប្រមូលផ្តុំគ្នា នៅទីលានប្រជាធិបតេយ្យ ខាងក្រោយ ស្ថានទូត សហរដ្ឋអាមេរិក ដើម្បីធ្វើបាតុកម្ម ទាមទារឱ្យ ធ្វើការកែទម្រង់ គណៈកម្មាធិការ ជាតិរៀបចំការ បោះឆ្នោត បន្ទាប់ពី ទទួលរង ការចោទ ប្រកាន់ថាស្ថាប័ន មួយនេះធ្វើការ មិនឯករាជ្យ លម្អៀងទៅ រកគណបក្ស កាន់អំណាច។

មហាបាតុកម្មដែលដឹកនាំ ដោយគណបក្សសង្គ្រោះជាតិ នេះបានធ្វើឡើង ជាលើកដំបូងមុន ការបោះឆ្នោត ដែលគ្រោង ធ្វើនៅថ្ងៃទី២៨ខែកក្កដា ខាងមុខនេះ។

បាតុករជាច្រើនបានស្រែកព្រមៗគ្នាថា៖ «ដូរ ដូរៗៗៗ»។

ក្រុមបាតុករភាគច្រើននៅក្នុងទីក្រុងភ្នំពេញនិងមកពីតាមបណ្តាខេត្តនានាបានចងបូរពណ៌សនៅនឹងក្បាល ព្រមទាំងកាន់ពាក្យស្លោកនិងបដាជាច្រើនផ្ទាំងដែលបានសរសេរថាត្រូវតែផ្លាស់ប្តូរគជប។

មានក្រុមបាតុករ ជាច្រើនមកពី ស្រុកកៀនស្វាយ ខេត្តកណ្តាល ខេត្តព្រៃវែង ខេត្តតាកែវ និងនៅតាមជាយ ក្រុងភ្នំពេញមួយភាគធំ ត្រូវបានអាជ្ញាធរ មានសមត្ថកិច្ច ឃាត់ស្ទាក់មិនឱ្យ ពួកគេចូលរួមធ្វើបាតុកម្ម បើទោះបីជា មានច្បាប់អនុញ្ញាត ក៏ដោយ។ នេះបើតាមការបញ្ជាក់ ឱ្យដឹងពីក្រុមអ្នករៀបចំ។


ការធ្វើបាតុកម្មនេះមិនមានការប៉ះទង្គិចដោយអំពើហិង្សាណាមួយជាមួយនឹងកម្លាំងមានសមត្ថកិច្ចទេគ្រាន់តែកម្លាំងប៉ូលិសប្រដាប់ដោយខែល ដំបងឆក់ និងអាវុធស្វ័យប្រវត្តិ បានព្យាយាមដាក់របាំងការពារក្រុមបាតុករកុំឱ្យបុកទំលុះនិងដើម្បីដើរក្បួនដង្ហែរទៅកាន់ទីស្នាក់ការគជបដែលមានទីតាំងនៅក្រសួងមហាផ្ទៃ។

ដំបូងលោកកឹម សុខា អនុប្រធានគណបក្សសង្គ្រោះជាតិបានប្រាប់ក្រុមបាតុករថាប្រសិនណាបើគជបមិនមកទទួលញត្តិទេលោកនឹងដឹកនាំដើរដង្ហែរក្បួនទៅកាន់ទីស្នាក់ការរបស់គជបក៏ប៉ុន្តែប៉ុន្មានម៉ោងក្រោយមកទើបមានតំណាងនៃមន្ត្រីគជបពីរនាក់មកទទួលញត្តិទើបក្រុមបាតុករបានសម្រេចរំសាយ។

លោក សាន តាំងស៊ីឌឿន មន្ត្រីដែលគជបបានចាត់តាំងមកទទួលញត្តិបាននិយាយប្រាប់ក្រុមអ្នកកាសែតថាលោកនឹងយកញត្តិនេះទៅជូនថ្នាក់ដឹកនាំដើម្បីពិនិត្យ។

«សន្យាថានឹងយកញត្តិនេះទៅជូនថ្នាក់ដឹកនាំដើម្បីពិនិត្យនិងដោះស្រាយ។ ខ្ញុំមិនហ៊ានថាទេ។តួនាទីខ្ញុំមានតែប៉ុណ្ណឹងទេ»។

លោកកឹម សុខា បានថ្លែងអំណរគុណដែលគជបបានចាត់តំណាងមកទទួលយកញត្តិក៏ប៉ុន្តែលោកសុំឱ្យមន្ត្រីជាន់ខ្ពស់មកទទួលញត្តិ មិនមែនចាត់តំណាងនោះទេដែលទង្វើបែបនេះលោកមិនមានការពេញចិត្ត។

«យើងសុំឱ្យគជបដូចគាត់ឆ្លើយអម្បាញ់ម៉ិញហ្នឹងថាឱ្យមានការឆ្លើយតបដោយដំណោះស្រាយជាវិជ្ជមានដើម្បីបញ្ចប់នៅបាតុកម្មបែបនេះតទៅទៀត»។

នៅក្នុងញត្តិមួយច្បាប់ដែលដាក់ចំណងជើងស្តីពី «សុឆន្ទៈមហាជនចំពោះគណៈកម្មាធិការ ជាតិរៀបចំការបោះឆ្នោត» បានទាមទារ ឱ្យសើរើឡើងវិញ នូវបញ្ជីឈ្មោះ បោះឆ្នោតដែល គជបបានធ្វើហើយ ត្រូវបានអង្គការ NDI និង Comfrel រកឃើញថាមាន កំហុសយ៉ាងធ្ងន់ធ្ងរ និងការបំប៉ោង និងការលុប ឈ្មោះអ្នកបោះឆ្នោត អណត្តិទី៥នេះ។

ញត្តិនេះក៏បានអំពាវនាវឱ្យសហគមន៍អន្តរជាតិ ជាពិសេសប្រទេស ហត្ថលេខីនៃកិច្ច ព្រមព្រៀងក្រុង បារីសថ្ងៃទី២៣តុលាឆ្នាំ១៩៩១ ឱ្យធ្វើការគាបសង្កត់ រដ្ឋាភិបាលកម្ពុជា ដើម្បីឱ្យការ បោះឆ្នោត ប្រព្រឹត្តទៅ ដោយ សេរីនិងយុត្តិធម៌។

ព្រះអង្គម្ខាស់ស៊ីសុវត្ថិធម្មិកោ សមាជិកគណៈកម្មាធិការនាយករបស់គណបក្សសង្គ្រោះជាតិដែលបានចូលរួមក្នុងបាតុកម្មបានមានបន្ទូលថាគជបគួរតែផ្លាស់ប្តូរសមាភាពថ្នាក់ដឹកនាំតែម្តង។

«វាអត់តម្លៃ ការបោះឆ្នោតហ្នឹងគេរៀបចំបោះឆ្នោតដើម្បីតែបក្សតែមួយ។ម្ល៉ោះហើយការរៀបចំការបោះឆ្នោតហ្នឹងវាអត់តម្លៃទាល់តែសោះ»។

លោកទេព នីថាអគ្គលេខាធិការនៃគជបធ្លាប់បាននិយាយប្រាប់VOA ថាគជបធ្វើការដោយឯករាជ្យនិងមិនលំអៀងទៅរកគណបក្សណាមួយទេ៕