គណបក្សប្រឆាំង ប្រារព្ធ​ពិធី​រម្លឹក​ខួប​អ្នកស្លាប់ ក្នុង​របប​ខ្មែរក្រហម បង្កប់​ដោយ​ខ្លឹមសារ​នយោបាយ​

ថ្ងៃទី 17 មេសា 2013,

ដោយ: មុនីរាជ 

Cambodia Express News

ភ្នំពេញ: ​គណបក្ស​សង្គ្រោះ​ជាតិ ដែល​ជា​គណបក្សប្រឆាំង រួបរួម​មកពី​គណបក្ស​សិទ្ធិមនុស្ស និង​គណបក្ស​សមរង្ស៊ី បាន​ប្រារព្ធ​ពិធី​បង្សុកូល គោរព​វិញ្ញាណក្ខន្ធ​អ្នក​ដែល​បាន​ស្លាប់ នៅក្នុង​របប​ខ្មែរក្រហម កាលពី​ព្រឹក​ថ្ងៃទី​១៧ ខែ​មេសា ឆ្នាំ​២០១៣ នៅ​មជ្ឈមណ្ឌល​ប្រល័យពូជសាសន៍​ជើងឯក​។ ក្នុង​ពិធី​នោះ មេដឹកនាំ​បក្សប្រឆាំង លោក សម រង្ស៊ី បាន​ថ្លែងការណ៍​ជាសារនយោបាយ​យ៉ាងច្រើន​។​

​លោក សម រង្ស៊ី ប្រធាន​គណបក្ស​សង្គ្រោះ​ជាតិ បាន​ថ្លែង​តាម​វីដេអូ អ៊ិនថឺណេត ពី​សហរដ្ឋអាមេរិក មកកាន់​ពិធី​ជួបជុំ កាលពី​ព្រឹក​ថ្ងៃទី​១៧ ខែ​មេសា ឆ្នាំ​២០១៣ ថា មានតែ​គណបក្ស សម រង្ស៊ី ទេ ដែល​ជា​និច្ច​ជា​កាល​បាន​រៀបចំ​ពិធី​បង្សុកូល​រំលឹក​សោ​កដ​នាថ​កម្មនេះ​។ ឥឡូវនេះ គឺយើង​គណបក្ស​សង្គ្រោះ​ជាតិ ដែល​កើតចេញ​ពី​ការបង្រួប​បង្រួម​រវាង​គណបក្ស សម រង្ស៊ី និង​គណបក្ស សិទ្ធិមនុស្ស ​យើង​បន្ត​ទម្លាប់ ដែល​បាន​ចាប់ផ្តើម គឺ​ជា​រៀងរាល់ឆ្នាំ នៅ​ថ្ងៃ​ទី​១៧ ខែ​មេសា ដោយ​និមន្ត​ព្រះសង្ឃ និង​ជួបជុំ​បងប្អូន​ជនរួមជាតិ រៀបចំ​ពិធី​នេះ​។ ហើយគណបក្ស សង្គ្រោះ​ជាតិ យើង​ទាមទារ​យុត្តិធម៌​ជា​និច្ច ជូន​ប្រជាពលរដ្ឋ​ខ្មែរ​។
​លោក សមរង្ស៊ី បាន​លើកឡើង​ថា យើង​មិន​អាច​បំភ្លេច​បាន​ទេ សោ​កដ​នាថកម្ម ដែល​ប្រជាពលរដ្ឋ បាន​ឆ្លងកាត់​របប​ខ្មែរក្រហម​។ យុត្តិធម៌ ក៏​យើង​មិន​អាច​បោះបង់ចោល​បានដែរ ទោះ​ជា​ជួប​ការលំបាក​យ៉ាង​ណា ទោះជា​មាន​ការរារាំង​យ៉ាងណា មិនឲ្យ​តុលាការ​កាត់ទោស​មេដឹកនាំ​ខ្មែរក្រហម បាន​ប្រព្រឹត្តទៅ​ដំណើរការ​បាន​ល្អ​យ៉ាងណាក៏ដោយ តែ​ឆន្ទះ​របស់​ខ្មែរ ឆន្ទះ​អ្នកស្រលាញ់​យុត្តិធម៌ ប្រជាធិបតេយ្យ​នៅ​ដដែល គឺ​ត្រូវតែ​ពុះពារ​គ្រប់​ឧបសគ្គ​ទាំង​អស់ ដើម្បី​ស្វែងរក​លាត​ត្រ​ដា​ត​ការពិត ហើយ​កាត់ទោស​អ្នក ដែល​ទទួលខុសត្រូវ​ក្រោម​របប​ខ្មែរក្រហម កាត់ទោស​ឲ្យបាន​ត្រឹមត្រូវ តាម​គោលការណ៍​ច្បាប់​ជាតិ និង​អន្តរជាតិ​។​

​    ​
​លោក សម រង្ស៊ី បាន​សន្យា​ចំពោះ​ប្រជាពលរដ្ឋ​ថា ឆ្នាំនេះ ជា​លើក​ចុងក្រោយ​ហើយ ដែល​រាជរដ្ឋាភិបាល រារាំង​មិនឲ្យ​តុលាការ​កាត់ទោស​មេដឹកនាំ​ខ្មែរ​ក្រហមដំណើរការ​បាន​ទៅ​មុខ ហើយ​ជា​លើក​ចុងក្រោយ​ហើយ ដែល​មាន​ការបិទបាំង​ការពិត មាន​ការប៉ុនប៉ង​ចង់​ការពារ​ជន​មួយចំនួន ដែល​បាតដៃ​ប្រឡាក់​ឈាម ដែល​បាន​ចូលរួម​ក្នុង​ការកាប់​សម្លាប់​ប្រជា​ពលរដ្ឋ​ខ្មែរ តែ​ឥឡូវនេះ គេ​មាន​តំណែង​ខ្ពង់ខ្ពស់​នៅក្នុង​ជួរ​រាជរដ្ឋាភិបាល​បច្ចុបប្បន្ន​។ ដូច្នេះ​រដ្ឋាភិបាល​បច្ចុប្បន្ន​ការពារ​គេ មិនឲ្យ​តុលាការ​អន្តរជាតិ កោះហៅ​ទៅ​សួរចម្លើយ​ទៅ​បំភ្លឺ ហើយ​នៅ​ពេល​រក​ការពិត​ឃើញ និង​កាត់ទោស​តាម​ផ្លូវច្បាប់​។ ដូច្នេះ​ជន​ឧក្រឹដ្ឋ​មួយចំនួន ដែល​កាន់​តំណែង​ជា​រដ្ឋមន្ត្រី ឧបនាយក​រដ្ឋមន្ត្រី​នៅ​ប្រទេស​កម្ពុជា​សព្វថ្ងៃ មិន​រួច​ផុត​ពី​ការកាត់ទោស ដោយ​តុលាការ​មួយ​ត្រឹមត្រូវ​។
​លោក សម រង្ស៊ី បាន​បន្តថា ចាប់ពី​ឆ្នាំ​ក្រោយ ១៧ មេសា ឆ្នាំ​២០១៤ ពេលនោះ នឹង​មាន​រដ្ឋាភិបាល​ថ្មី ដឹកនាំ​ដោយ​គណបក្ស សង្គ្រោះ​ជាតិ ហើយ​យើង​នឹង​ជំរុញ​ឲ្យ​តុលាការ​កាត់ទោស​មេដឹកនាំ​ខ្មែរក្រហម ដំណើរការ​ទៅមុខ​ឲ្យបាន​ត្រឹមត្រូវ ហើយ​ពេលនោះ ជន​ឧក្រឹដ្ឋ​ដែល​រួចខ្លួន នឹង​ត្រូវ​តុលាការ​កាត់ទោស​តាម​ផ្លូវច្បាប់​ស្រប​តាម​គតិយុត្តិ​ធម៌ និង​ឆន្ទះ​ប្រជាពលរដ្ឋ​ខ្មែរ​។​
​លោក សម រង្ស៊ី បាន​បន្តថា រដ្ឋាភិបាល​ថ្មី ដឹកនាំ​ដោយ​គណបក្ស​សង្គ្រោះ​ជាតិ ចាប់ពី​ពាក់កណ្តាល​ឆ្នាំ ឬ​ចុងឆ្នាំ​២០១៣​នេះ នឹង​រៀបចំ​ប្រព័ន្ធ​តុលាការ​ឡើងវិញ ដើម្បី​ផ្តន្ទាទោស​ពួក​ជន​ឧក្រឹដ្ឋ​ទាំង​ប៉ុន្មាន តាំងពី​សម័យ​ខ្មែរក្រហម ផែនកា​រក​៥ ការ​គប់​គ្រាប់បែក​នៅ​មុខ​មន្ទី​រ​រដ្ឋសភា​ឆ្នាំ​១៩៩៧ ការសម្លាប់​អ្នកស្នេហាជាតិ​ឆ្នាំ​១៩៩៧ រដ្ឋប្រហារ​ខែកក្កដា ការសម្លាប់​បាតុករ​ឆ្នាំ​១៩៩៨ ធ្វើ​គត់​ព្រះសង្ឃ​។
​លោក​សម​រង្ស៊ី បន្តថា មាន​ជន​ឧក្រឹដ្ឋ​មួយចំនួន ដែល​ស្ថិត​នៅក្នុង​ជួរ​រដ្ឋាភិបាល​សព្វថ្ងៃ និង​ត្រូវ​តុលាការ​ឯករាជ្យ ដែល​រដ្ឋាភិបាល​ដឹកនាំ​ដោយ​គណបក្ស​សង្គ្រោះ​ជាតិ និង​ជំរុញ​ឲ្យ​តុលាការ​ឯករាជ្យ​នេះ នាំ​ជន​ឧក្រឹដ្ឋ យក​ទៅ​កាត់ទោស​ផ្តន្ទាទោស​ឲ្យ​ទាល់តែ​បាន យ៉ាងយូរ​នៅ​ឆ្នាំ​២០១៤​។​

​លោក សម រង្ស៊ី បាន​បន្ត ដោយ​អំពាវនាវ​ទៀតថា សូម​បងប្អូន ជនរួមជាតិ​ខំប្រឹងប្រែង ដើម្បី​ធ្វើ​ម៉េច​ឲ្យមាន​ការផ្លាស់ប្តូរ​នៅ​ប្រទេស​កម្ពុជា ទាល់តែ​មាន​ការផ្លាស់ប្តូ​រ​មាន​អ្នកដឹកនាំ​ថ្មី ទើប​ប្រទេស​យើង​អាច​ស្គាល់​សេរី យុត្តិធម៌​។ ហើយ​ខ្ញុំ​ជឿជាក់ថា ឃើញ​ចរន្ត​ប្រជារាស្ត្រ​យ៉ាងខ្លាំង​បែបនេះ ខ្ញុំ​ជឿជាក់​ថា ប្រជារាស្ត្រ​និង​ទទួល​ជ័យជំនះ​នៅក្នុង​ការបោះឆ្នោត​ឆ្នាំ​២០១៣​នេះ ដើម្បី​រៀបចំ​ប្រទេស​យើង​ឡើងវិញ ដើម្បី​ផ្តល់​យុត្តិធម៌​ជូន​ប្រជារាស្ត្ររ​ខ្មែរ​។ ​សូម​បងប្អូន​រងគ្រោះ​គ្រប់​សម័យ​ទាំងអស់ តាំង​ពីម័យ​ខ្មែរក្រហម រហូតមកដល់​ពេល​សព្វថ្ងៃ បងប្អូន​ដែល​ជា​ជនរងគ្រោះ ដែល​ត្រូវ​គេ​ធ្វើបាប​លួច​ឆក់​ប្លន់​ផ្ទះសម្បែង ត្រូវ​គេ​រឹបអូស​ដីធ្លី ត្រូវ​គេ​ជិះជាន់ សូម​បងប្អូន​កុំ​អស់សង្ឃឹម ប្រជារាស្ត្រ​នឹង​រើ​បំរាស់​ហើយ​នៅ​ឆ្នាំ​២០១៣​នេះ ហើយ​ឆ្នាំ​២០១៤​ជនរងគ្រោះ​ទាំងអស់​នឹង​ទទួលបាន​យុត្តិធម៌​ពេញលេញ​ជាក់ជាមិនខាន៕​