សហភាព​អឺរ៉ុប​ព្រមាន​ដក​កិច្ច​ព្រមព្រៀង​អនុគ្រោះ​ពាណិជ្ជកម្ម​ពី​កម្ពុជា

Monday, 20 May 2013

Stuart White

The Phnom Penh Post

ភ្នំពេញៈ គណៈ​កម្មការ​សហភាព​អឺរ៉ុប​បាន​ឆ្លើយ​តប​កាល​ពី​ថ្ងៃ​ពុធ​ចំពោះ​បញ្ហា​ក្តី​បារម្ភ​របស់​សមាជិក​សភា​អឺរ៉ុប​ពាក់​ព័ន្ធ​នឹង​ករណី​រំលោភ​បំពាន​សិទ្ធិ​មនុស្ស​ដែល​កើត​ចេញ​ពី​ការ​ផ្តល់​សម្បទាន​ដី​សេដ្ឋកិច្ច​របស់​រដ្នាភិបាល​កម្ពុជា ដោយ​អះ​អាង​ថា ប្រសិន​បើ​ចាំ​បាច់ ខ្លួន​នឹង​ដក​កិច្ច​ព្រម​ព្រៀង​អនុគ្រោះ​ពាណិជ្ជកម្ម​ពី​កម្ពុជា។

នៅ​ក្នុង​លិខិត​មួយ​ផ្ញើ​ទៅ​កាន់​សមាជិក​សភា​អឺរ៉ុប​ពាក់​ព័ន្ធ​ទាំង​អស់​សមាជិក​គណៈ​កម្មការ​អឺរ៉ុប​លោក Karel De Gucht និង​អនុ​ប្រធាន​លោក​ស្រី Katherine Ashton បាន​សង្កត់​ធ្ងន់​ថា ពួក​គេ​កំពុង​តាម​ដាន​មើល​ស្ថានភាព​នេះ​ហើយ​បាន​សង្កត់​ធ្ងន់​ទៅ​រដ្ឋាភិបាល​កម្ពុជា​អំពី​សារៈ​សំខាន់​នៃ​កំណែ​ទម្រង់​ព្រម​ទាំង​ផល​វិបាក​នៃ​ការ​បាត់បង់​កិច្ច​ព្រម​ព្រៀង​មិន​យក​ពន្ធ​គយ​ដែល​ជា​ធម្មតា​ហៅ​ថា «​កិច្ច​ព្រមព្រៀង​អនុញ្ញាត​គ្រប់​ទំនិញ​ទំាង​អស់​លើក​លែង​តែ​អាវុធ (EBA)»។

លិខិត​នេះ​ដោយ​សំដៅ​ទៅ​លើ​កិច្ច​ប្រជុំ​ជាមួយ​រដ្ឋ​មន្រ្តី​ក្រសួង​ពាណិជ្ជកម្ម​កម្ពុជា លោក ចម ប្រសិទ្ធ​កាល​ពី​ខែ​មេសា​ឆ្នាំ​២០១២ និង​ខែ​មីនា ឆ្នាំ​២០១៣ បាន​ឲ្យ​ដឹង​ថា​៖ «ក្នុង​ឱកាស​ទាំង​ពីរ​នេះ ខ្ញុំ Karel De Gucht សូម​បញ្ជាក់​ឲ្យ​ច្បាស់​អំពី​ក្តី​បារម្ភ​របស់​សហភាព​អឺរ៉ុប​អំពី​ស្ថានភាព​ការ​ផ្តល់​សម្បទាន​ដី​សេដ្ឋកិច្ច​ទាំង​នេះ​»។

លិខិត​នេះ​បាន​បន្ត​ថា​៖ «​ខ្ញុំ​សូម​រំឭក​លោក​រដ្ឋ​មន្រ្តី​អំពី​ផល​ប៉ះ​ពាល់​ថា ការ​ដក​គម្រោង EBA នឹង​ធ្វើ​ឲ្យ​ប៉ះ​ពាល់​ដល់​សេដ្ឋកិច្ច​កម្ពុជា...»។

នៅ​ពេល​ទាក់​ទង​កាល​ពី​ម្សិលមិញ លោក ចម ប្រសិទ្ធ រដ្ឋ​មន្រ្តី​ក្រសួង​ពាណិជ្ជកម្ម​កម្ពុជា បាន​បដិសេធ​មិន​ឆ្លើយ​តប​នឹង​សំណួរ​តាម​ទូរស័ព្ទ​ទេ។

លោក​បាន​មាន​ប្រសាសន៍​យ៉ាង​ខ្លី​ថា​៖«​ខ្ញុំ​មិន​អាច​ឆ្លើយ​តប​សំណួរ​តាម​ទូរស័ព្ទ​ទេ»។

លក្ខខណ្ឌ​មួយ​ក្នុង​ចំណោម​លក្ខខណ្ឌ​នានា​នៃ​កិច្ច​ព្រម​ព្រៀង EBA គឺ​ថា ប្រទេស​ទទួល​អត្ថ​ប្រយោជន៍​ត្រូវ​ប្រកាន់​ខ្ជាប់​ទៅ​នឹង​សេចក្តី​ប្រកាស​សិទ្ធិ​មនុស្ស​ដូច​ជា​អនុសញ្ញា​អន្តរជាតិ​ស្តីពី​សិទ្ធិ​សេដ្ឋកិច្ច សិទ្ធិ​សង្គម និង​សិទ្ធិ​វប្បធម៌ និង​អនុសញ្ញា​ពាក់ព័ន្ធ​អាយុ​អប្បបរមា​សម្រាប់​ការ​ទទួល​យក​ចូល​ធ្វើ​ការងារ​ដែល​លក្ខខណ្ឌ​ទាំង​ពីរ​នេះ​ក្រុមហ៊ុន​ទទួល​បាន​សម្បទាន​ដី​សេដ្ឋកិច្ច​ជា​ពិសេស​នៅ​ក្នុង​វិស័យ​ស្ករ​ស​របស់​ប្រទេស​កម្ពុជា​ត្រូវ​បាន​ចោទ​ប្រកាន់​ថា បាន​រំលោភ​បំពាន​លក្ខខណ្ឌ​ទាំង​ពីរ​នេះ។

ដោយ​សំដៅ​ទៅ​លើ​សេចក្តី​សម្រេច​របស់​សភា​អឺរ៉ុប​ដែល​ចេញ​កាល​ពី​ខែ​តុលា​ឆ្នាំ​មុន​ដែល​ក្នុង​នោះ​ស្ថាប័ន​នេះ​បាន​អំពាវនាវ​ទៅ​គណៈ​កម្មការ​ឲ្យ​ព្យួរ​កិច្ច​ព្រម​ព្រៀង EBA បណ្តោះ​អាសន្ន​សម្រាប់​ផលិតផល​កសិកម្ម។ លិខិត​នេះ​បាន​បន្ត​ឲ្យ​ដឹង​ថា​៖ «គណៈ​កម្មការ​កំពុង​តាម​ដាន​ស្ថានភាព​នេះ​យ៉ាង​ជិត​ស្និទ្ធ» ហើយ «​នឹង​ត្រៀម​ខ្លួន​ចាត់​វិធាន​ការ​»​ប្រសិន​បើ​លក្ខខណ្ឌ​សម្រាប់​ដក EBAមាន​លក្ខណៈ​គ្រប់​គ្រាន់​»។

ទោះ​យ៉ាង​ណា​ក្តី លោក អៀង វុទ្ធី តំណាង​អង្គការ សមធម៌​កម្ពុជា បាន​ថ្លែង​ថា គណៈ​កម្មការ​គួរ​តែ​មាន​ព័ត៌មាន​ទាំង​អស់​ដែល​ខ្លួន​ត្រូវ​ការ​សម្រាប់​ការ​ចាប់​ផ្តើម​នីតិវិធី​នេះ​។

លោក​បន្ត​ថា​៖ «​គណៈ​កម្មការ​ពាណិជ្ជកម្ម​ពួក​គេ​មាន​ភ័ស្តុតាង​គ្រប់​គ្រាន់​ពី​ព្រោះ​កាល​ពី​ខែ​មុន​មាន​ដំណើរ​ទស្សនកិច្ច​មួយ​ដោយ​គណៈ​កម្មការ​ពាណិជ្ជកម្ម​មក​ប្រទេស​កម្ពុជា​ហើយ​ពួក​គេ​ចុះ​ទៅ​ដល់​កន្លែង​ផ្ទាល់​នៅ​ខេត្ត​កំពង់ស្ពឺ​។ ពួក​គេ​បាន​និយាយ​ទៅ​កាន់​ប្រជាជន​រងគ្រោះ​មួយ​ចំនួន​»។

លោក​បន្ថែម​ថា​៖ «វា​ច្បាស់​ថា ស្ថានភាព​នេះ​កំពុង​ដុន​ដាប​ទៅៗ​ហើយ​បាន​បន្ត​ថា ប្រជាជន​កំពុង​រងគ្រោះ​ដោយ​ពាណិជ្ជកម្ម​ស្ករ​ស»។

លោក Jean-Francois អគ្គ​រដ្ឋ​ទូត​នៃ​គណៈ​ប្រតិភូ​របស់​សហភាព​អឺរ៉ុប​ប្រចាំ​កម្ពុជា​បាន​ថ្លែង​តាម​អ៊ីមែល​ថា លោក​អាច​អះ​អាង​ថា​៖ «សហការី​របស់​ខ្ញុំ​បាន​ចុះ​ទៅ​ខេត្ត​កំពង់ស្ពឺ​កាល​ពី​ខែ​មីនា ហើយ​បាន​ជួប​មិន​ត្រឹម​តែ​អង្គការ​ក្រៅ​រដ្ឋាភិបាល​នៅ​ទី​នោះ​ទេ ប៉ុន្តែ​ថែម​ទាំង​ជួប​ជាមួយ​សហគមន៍​មូលដ្ឋាន​អាជ្ញាធរ​មូលដ្ឋាន​និង​តំណាង​វិស័យ​ឯកជន»។

តែ​ទោះ​យ៉ាង​ណា​ក្តី​លោក​មិន​បាន​បរិយាយ​អំពី​ថា​តើ​ការ​ចុះ​ទៅ​ពិនិត្យ​នោះ​ពិត​ជា​នាំ​ឲ្យ​មាន​ចំណាត់​ការ​ជាក់​លាក់​ពី​គណៈ​កម្មការ​នេះ​ឬ​អត់​?

ទន្ទឹម​នេះ​លោក វុទ្ធី បាន​ថ្លែង​ថា បើ​ទោះ​បី​ជា​ការ​ព្យួរ​កិច្ច​ព្រមព្រៀង​នេះ​នឹង​ធ្វើ​ឲ្យ​ប៉ះ​ពាល់​ដល់​ក្រុមហ៊ុន​នានា​ដែល​បាន​រំលោភ​បំពាន​លើ​ប្រជាជន​ក៏​ដោយ​ក៏​វា​នឹង​ជួយ​បាន​តិច​តួច​ប៉ុណ្ណោះ​សម្រាប់​ប្រជាជន​រងគ្រោះ​ដែល​«​គ្មាន​អ្វី​សោះ​ក្រៅ​ពី​ចាញ់​»។

លោក​បាន​ថ្លែង​បន្ត​ថា​៖ «​បើ​ទោះ​បី​ជា​សហភាព​អឺរ៉ុប​ព្យួរ EBA ក្រុមហ៊ុន និង​សហភាព​អឺរ៉ុប​នឹង​ត្រូវ​តែ​ដោះស្រាយ​បញ្ហា​របស់​ប្រជាជន​ពួក​គេ​មិន​អាច​រត់​ចេញ​ទេ។ ប្រសិន​បើ​ពួក​គេ​រក​ឃើញ​ថា ក្រុមហ៊ុន​បាន​រំលោភ​បំពាន​ឬ​សហភាព​អឺរ៉ុប​រំលោភ​បំពាន​គោល​នយោបាយ​ខ្លួន​ឯង​ពួក​គេ​នឹង​ត្រូវ​តែ​នៅ​តែ​ត្រូវ​ដោះស្រាយ​តម្រូវ​ការ​របស់​ប្រជាជន»៕​ PS

រាយការ​បន្ថែម​ដោយ វង្ស សុខេង