គណបក្សសង្រ្គោះជាតិ រៀបចំបញ្ជីបេក្ខជនឈរឈ្មោះ រួចរាល់អស់ហើយ ប៉ុន្តែមិនទាន់យកទៅដាក់

ថ្ងៃទី 8 ឧសភា 2013,

ដោយ: មុនីរាជ

Cambodia Express News

ភ្នំពេញ:  មន្ត្រីជាន់ខ្ពស់​គណបក្ស​សង្គ្រោះ​ជាតិ បាន​ថ្លែងប្រាប់ CEN នៅ​ព្រឹក​ថ្ងៃទី​៨ ខែឧសភា ឆ្នាំ​២០១៣​នេះ​ថា ៖ បញ្ជី​បេក្ខជន​ឈរឈ្មោះ​បោះឆ្នោត​ជ្រើសតាំង​តំណាងរាស្ត្រ នីតិកាល​ទី​៥ ឆ្នាំ​២០១៣ គឺ​គណបក្ស​សង្គ្រោះ​ជាតិ បានរៀបចំ​រួចរាល់​អស់ហើយ ប៉ុន្តែ​មិនទាន់​យកទៅដាក់​។ បើតាម​គម្រោង នឹង​យកទៅដាក់​នៅ​ចុង​សប្តាហ៍​នេះ ទៅ​គណៈកម្មាធិការ​ជាតិ​រៀបចំ​ការបោះឆ្នោត តាម​កាលកំណត់​។​
​មន្ត្រី​ដដែល​បាន​ឲ្យ​ដឹង​ទៀតថា ចំពោះ​លោក សម រង្ស៊ី ប្រធាន​គណបក្ស​សង្គ្រោះ​ជាតិ ដែល​កំពុង​ស្ថិ​នៅក្រៅ​ប្រទេស​នោះ នឹងត្រូវ​ដាក់​ជា​បេក្ខជន​ឈរឈ្មោះ​បោះឆ្នោត នៅ​ខេត្តកណ្តាល ដើម្បី​តតាំង​ជាមួយ សម្តេចនាយក​រដ្ឋមន្ត្រី ហ៊ុន សែន ដែល​ឈរ​ជា​បេក្ខជន​តំណាងរាស្ត្រ លេខ​រៀង​ទី​១ នៃ​គណបក្ស​ប្រជាជន​កម្ពុជា នៅ​មណ្ឌល​ខេត្តកណ្តាល​។​
​អ្នកតាមដាន​សភាពការណ៍​នយោបាយ​ម្នាក់​ដែល​ស្នើសុំ​មិន​បញ្ចេញ​ឈ្មោះ បាន​និយាយថា ការបន្តនូវភាពយឺតយ៉ាវ​ក្នុងការ​ចុះបញ្ជី​គណបក្សនយោបាយ និង​បេក្ខជន​ឈរឈ្មោះ​បោះឆ្នោត​របស់​គណបក្ស​ស​ង្គ្រោះ​ជាតិ ជាការ​ពិតណាស់ វា​បង្ហាញ​ឲ្យ​ឃើញច្បាស់​អំពី​យុទ្ធសាស្ត្រ​មួយ​របស់​គណបក្ស​នេះ ប៉ុន្តែ​វាក៍​ជា​ឧបាយកល​មួយ​ក្នុង​ការបង្ក​អស្ថេរភាព នៅក្នុង​ដំណើរការ​នៃ​ការរៀបចំការ បោះឆ្នោតនិង អាចជាការបង្កបញ្ហា ថែមទៀត នៅពេលណា​ដែល​គណបក្ស​របស់ខ្លួន មិនបាន​ទទួលលទ្ធផល​ល្អ​ពី​ការបោះឆ្នោត​នោះ​៕