ក្រសួងមហាផ្ទៃ ឲ្យគណបក្ស សង្គ្រោះជាតិ ហែរក្បួនបាតុកម្ម តែមិនឲ្យលើសពី ១០០ នាក់ [-សេរីភាព ត្បិតត្បៀត?]

ថ្ងៃទី 18 ឧសភា 2013

ដោយ: មុនីរាជ

Cambodia Express News

ភ្នំពេញ: ​នៅ​ទីបំផុត​ក្រសួងមហាផ្ទៃ បានអនុញ្ញាត​ឲ្យ​គណបក្ស សង្គ្រោះ​ជាតិ ហែរ​ក្បួន​បាតុកម្ម​នៅ​ថ្ងៃទី​២០ ខែឧសភា ឆ្នាំ​២០១៣ តាម​សំណូមពរ តែ​មិន​ឲ្យ​លើសពី ១០០ នាក់​។​
​ចំពោះ​បញ្ហា​ធ្វើបាតុកម្ម​អហិង្សា​របស់​គណបក្សប្រឆាំង ត្រូវ​បានមក​យកមក​ពិភាក្សា​រវាង​មន្ត្រី​សាលា​រាជធានី​ភ្នំពេញ អាជ្ញា​ធរមាន​សមត្ថកិច្ច​ដែល​ពាក់ព័ន្ធ រួមទាំង​តំណាង​គណបក្ស សង្គ្រោះ​ជាតិ នៅ​សាលា​រាជធានី​ភ្នំពេញ កាលពី​រសៀល​ថ្ងៃទី​១៧ ខែឧសភា ឆ្នាំ​២០១៣​។​
 ​នៅក្នុង​កិច្ចប្រជុំ​លោក ឃួ​ង ស្រេង អភិបាលរង​រាជធានី​ភ្នំពេញ បាន​ជម្រាបជូន​សមាជិក​នៃ​អង្គប្រជុំ​ថា កិច្ចប្រជុំ​គឺ​ដើម្បី​ពិភាក្សា​ស្តីពី​ការជូនដំណឹង​ធ្វើ​មហា​បាតុកម្មអហិង្សា ដែល​នឹង​ប្រព្រឹត្តទៅ​នៅ​ថ្ងៃទី​២០ ខែឧសភា ឆ្នាំ​២០១៣ ដោយ​ធ្វើការ​ជួបជុំ​នៅ​ទីលាន​ប្រជាធិបតេយ្យ និង​ដង្ហែ​ក្បួន​តាមផ្លូវ​ប៉ាស្ទ័រ ឆ្ពោះទៅកាន់​ការិយាល័យ​តំណាង​របស់​អង្គការសហប្រជាជាតិ និង​សហគមន៍​អឺរ៉ុប ដើម្បី​ប្រគល់​ញត្តិ​។​
 ​ចំណែក​លោក គួ​យ ប៊ុន​រឿន តំណាង​គណបក្ស សង្គ្រោះ​ជាតិ ក៏បាន​ជម្រាបជូន​អង្គប្រជុំ​ឲ្យ​ដឹង​ដែរ​ថា គោលបំណង​នៃ​ការធ្វើ​បាតុកម្ម​នេះ គឺ​ចង់​ទាមទារ​ឲ្យ​គណៈកម្មាធិការ​ជាតិ​រៀបចំ​ការបោះឆ្នោត ទទួលយក​អនុសាសន៍​របស់​តំណាង​ពិសេស​ អង្គការសហប្រជាជាតិ​លោក សូរិយា ស៊ូ​ប៊ែ​រ​ឌី និង របាយការណ៍​ធ្វើ​សវនកម្ម​បញ្ជី​បោះឆ្នោត​សំរាប់​ការបោះឆ្នោត​ជ្រើសតាំង​តំណាងរាស្ត្រ​អាណត្តិ​ទី​៥ ឆ្នាំ​២០០១៣ របស់​វិទ្យាស្ថាន​ជាតិ​សំរាប់​កិច្ចការ​អន្តរជាតិ (NDI) អង្គការ​នី​ច​ហ្វិ​ច (NICFEC) និង អង្គការ​ខុមហ្វ្រែល (COMFREL) ក្នុងការ​រៀបចំ​ការចុះ​ឈ្មោះ​អ្នកបោះឆ្នោត និង​បញ្ជី​ឈ្មោះ​អ្នកបោះឆ្នោត​សារ​ឡើងវិញ ព្រមទាំង​ចាត់វិធានការ​គ្រប់បែបយ៉ាង​ធានា​អំពី​យន្តការ និង​នីតិវិធី​សំរាប់​បម្រើ​ការងារ​បោះឆ្នោត​ជ្រើសតាំង​តំណាងរាស្ត្រឲ្យប្រព្រឹត្តដោយសេរីត្រឹមត្រូវ និង​យុត្តិធម៌ ព្រមទាំង​ដោយ​ស្មើភាព​គ្នារួមទាំងប្រព័ន្ធផ្សព្វផ្សាយ​ ស្របតាម​បទដ្ឋាន អន្តរជាតិ​។​

​ក្នុងករណី​ក្រសួងមហាផ្ទៃ​មានកា​អនុញ្ញាត ម្ចាស់​សំណើរ​ត្រូវគោរព​តាម​លក្ខខណ្ឌ​ដូចខាងក្រោម ៖
១-​ចំពោះ​ការ​ដង្ហែ​ក្បួន សាលា​រាជធានី​ភ្នំពេញ​ស្នើសុំ​ធ្វើការ​ជួបជុំ និង សម្តែង​មតិ នៅ​ទីលាន​ប្រជាធិបតេយ្យ​រួច​ដង្ហែ​តាមផ្លូវ​ប៉ាស្ទ័រ​រហូតដល់​ផ្លូវ​លេខ ២៥៤(​ផ្លូវ​ខាងជើង​សាលា​គរុកោសល្យ​) បត់​ឆ្វេង​ដោយ​ឆ្លងកាត់​មហាវិថី ព្រះ នរោត្តម ឆ្ពោះទៅ​សហគមន៍​អឺរ៉ុប​ដោយ​បាតុករ​ឈរ​រង់ចាំ​នៅ​ផ្លូវ​លេខ ២៥៤ នៅពេលដែល​តំណាង​យក​ញ​តិ្ត​ទៅ​ប្រគល់ជូន​សហគមន៍​អឺរ៉ុប រួច​ត្រឡប់ ក្រោយ​បន្តដំណើរ​តាមផ្លូវ​ប៉ាស្ទ័រ​ឆ្ពោះទៅ​ការិយាល័យ​តំណាង​អង្គការសហប្រជាជាតិ ដើម្បី​ប្រគល់​ញ​តិ្ត​រួច​រំសាយ​។​
២-​ចំពោះ​ការជួបជុំ​និង​សម្តែង​មតិ​នៅ​ទីលាន​ប្រជាធិបតេយ្យ​និង​ការ​ដង្ហែ​ក្បួន ម្ចាស់​សំណើរ​ត្រូវ​ទទួលខុសត្រូវ​ដូចខាងក្រោម ៖
-​កិច្ចការពារ​សន្តិសុខ សុវត្ថិភាព និង​សណ្តាប់ធ្នាប់​សាធារណៈ ក្នុងការ​ជួបជុំ​សម្តែង​មតិ​នៅ​ទីលាន​ប្រជាធិបតេយ្យ ម្ចាស់​សំណើរ​ជា​អ្នកទទួលខុសត្រូវ​ទាំងស្រុង ចំណែក​សមត្ថកិច្ច​ទទួល​ខុសត្រូវ​ការពារ​ពី​ខាងក្រៅ ក្នុងករណី​មាន​ជនសង្ស័យ​ត្រូវរាយការណ៍ជូន​សមត្ថ​កិច្ច ដើម្បី​ចាត់វិធានការ​បាន​ទាន់ពេលវេលា​។ -​ចំពោះ​ខ្លឹមសារ​នៃ​ការសម្តែង​មតិ​របស់​ពួកគាត់ ម្ចាស់​សំណើ​ឯកភាព​ទទួលខុសត្រូវ​ទាំងស្រុង ក្នុងករណី​មាន​បុគ្គល​ណា​យក​កម្មវិធី​នេះ ធ្វើ​សកម្មភាព​វាយប្រហារ​ដល់​ព្រះមហាក្សត្រ រាជរដ្ឋាភិបាល ប្រទេសជិតខាង និង​ឥស្សរជន​ជាន់ខ្ពស់​ណា​ម្នាក់​ឡើយ​។ -​ម្ចាស់​សំណើ និង​អ្នកចូលរួម​ទាំង អស់​ត្រូវ​សំអាត​អនាម័យ​នៅ​ជុំវិញ​បរិវេណ​ប្រារព្ធ​ពិធី និង​តាមផ្លូវ​ដង្ហែ​ក្បួន​ឲ្យ​បាន​ស្អាត ក្រោយពី​ប្រារព្ធ​ពិធី​ចប់ ជៀង​វាង​ប៉ះពាល់​ដល់​សោ​ភណ្ឌ​ភាព​នៅ ទីនោះ​។​
-​ចំពោះ​ការ​ដង្ហែ​ក្បួន​តាម​ដងផ្លូវ​សាធារណៈ​ត្រូវ​បញ្ចប់​មុន​ម៉ោង ១២ ថ្ងៃត្រង់ និង​ចៀសវាង​ដាច់ខាត​នូវ​ការបិទផ្លូវ​ដែល​នាំ​ឲ្យ​កកស្ទះ​ចរាចរ និង ប៉ះពាល់​ដល់​សណ្តាប់ធ្នាប់​សាធារណៈ​។​
 ៣-​ចំពោះ​ករណី​ខាងលើ សាលា​រាជធានី​ភ្នំពេញ នឹង​ស្នើសុំ​គោលការណ៍​ទៅ​ក្រសួងមហាផ្ទៃ ដូច្នេះ​ម្ចាស់​សំណើ​ត្រូវ​រង់ចាំ​ការសម្រេច​របស់​ក្រសួងមហាផ្ទៃ​។​
៤-​ប្រសិនបើ​មិន​គោរព​តាម​លក្ខខណ្ឌ​ខាងលើ ថ្នាក់ដឹកនាំ​បាតុកម្ម​ត្រូវ​ទទួលខុសត្រូវ​ចំពោះមុខ​ច្បាប់ ហើយ​សាលា​រាជធានី​ភ្នំពេញ និង​ចាត់វិធានការ​តាមផ្លូវ​ច្បាប់​។