លោក ញឹក ប៊ុនឆៃ៖ គណៈកម្មការអចិន្ត្រៃយ៍ ហ៊្វុនស៊ិនប៉ិច គ្រោងប្រជុំ រៀបចំដាក់ពាក្យបណ្តឹង ប្រឆាំងលោក គង់ គាំ ទៅតុលាការ

(ថ្ងៃទី 12 មិថុនា 2013, ម៉ោង 08:20:AM) | ដោយ: រតនា CEN
ភ្នំពេញ: លោក ញឹក ប៊ុនឆៃ អគ្គលេខាធិការគណបក្សរាជានិយមហ្វ៊ុនស៊ិចប៉ិច បានប្រសាសន៍ថា នៅក្នុងពេលខាងមុខនេះ គណៈកម្មការអចិន្ត្រៃយ៍គណបក្ស នឹងបើកកច្ចប្រជុំពិគ្រោះផ្នែកច្បាប់ ដើម្បីរៀបចំឯកសារដាក់ប្តឹងជាផ្លូវការ ទៅកាន់សាលាដំបូងរាជធានីភ្នំពេញ ប្តឹងលោក គង់ គាំ ប្រធានគណបក្សសមរង្ស៊ី ដែលទាក់ទងនឹងការនិយាយរបស់លោកគង់គាំ ថា ព្រះបរមរតនកោដ្ឋ បានប្រើឲ្យលោកសេនាប្រមុខ លន់ នល់ ជាអ្នករៀបចំធ្វើរដ្ឋប្រហារទំលាក់ព្រះអង្គ ពីព្រះប្រមុខរដ្ឋ នៅថ្ងៃទី១៨ ខែមីនា ឆ្នាំ១៩៧០ មិនមែនជារដ្ឋប្រហារ ដែលលោកសេនាប្រមុខ លន់ នល់ ធ្វើដោយខ្លួនឯងទេ។
លោក ញឹក ប៊ុនឆៃ អគ្គលេខាធិការគណបក្សហ្វ៊ុនស៊ិនប៉ិច បានបញ្ជាក់ថា ដែលជាការនិយាយ គ្មានការពិតទាល់តែសោះ ហើយអ្វីដែលជាការលើកឡើងរបស់លោក គង់ គាំ ជាការបំផ្លើស នូវការពិតធាតុពិតជារដ្ឋប្រហារមួយ ដែលដឹកនាំធ្វើឡើងដោយលោកសេនាប្រមុខ លន់ នល់ ទំលាក់សម្តេចព្រះ នរោត្តម សីហនុ ដែលកាលនោះ មានការចោទព្រះអង្គ ពាក់ព័ន្ធនឹងព្រំដែន ដោយលោក លន់ នល់ បានចោទសម្តេចឪថា អនុញ្ញាតឲ្យប្រទេសជិតខាងប្រើប្រាស់ទឹកដីខ្មែរ នៅតាមបណ្តោយព្រំដែន ជាដើម។

លោក ញឹក ប៊ុនឆៃ បានធ្វើការបញ្ជាក់ថា អ្វីដែលលោក គង់ គាំ បានលើកឡើងនោះ គឺផ្ទុយពីការពិត ដែលជាការភូតកុហក់ ដូច្នេះគណបក្សហ្វ៊ុនស៊ិនប៉ិច ពុំអាចទទួលយកបានទេ។

លោកបានទាមទារ ទៅលោក គង់ គាំ ត្រូវតែបញ្ជាក់ឲ្យបានច្បាស់នូវបញ្ហានេះ ពីព្រោះនេះជារឿងប្រវត្តិសាស្ត្រ កុំយកប្រវត្តិសាស្ត្រ មកបំភ្លៃការពិតសង្គ្រាមកន្លងមក គឺផ្តើមចេញពីរដ្ឋប្រហារថ្ងៃទី១៨ ខែមិនា ឆ្នាំ១៩៧០ ដែលជាថ្ងៃចាប់ផ្តើមឲ្យប្រទេសកម្ពុជា ធ្លាប់តែសុខសាន្ត មានសន្តិភាព មានការអភិវឌ្ឍន៍ ប្រែកា្លយទៅជាមានសង្គ្រាម និងធ្វើឲ្យមានរបបប៉ុលពត និងធ្វើឲ្យមានការស្លាប់ប្រជាពលរដ្ឋរាប់លាននាក់។

លោកបានបញ្ជាក់បន្តថា “ខ្ញុំត្រូវការឲ្យលោកគង់គាំ ធ្វើការសុំទោសចំពោះព្រះបរមរតនកោដ្ឋដែរ ពីព្រោះជាការនិយាយទំលាក់កំហុសទៅលើសម្តេចឪ សម្តេចតា អយុត្តិធម៌ សំរាប់ព្រះអង្គជាទីបំផុត”។

លោក គង់ គាំ មិនអាចទាក់ទងចំពោះការលើកឡើងរបស់លោក ញឹក ប៊ុនឆៃ ខាងលើទេ។ ក៏ប៉ុន្តែកន្លងមក លោក គង់ គាំ បានបដិសេធនូវពាក្យសម្តីរបស់លោក ហើយថា លោកមិនមានបំណងថា រដ្ឋប្រហារទម្លាក់សម្តេចឪ ថ្ងៃ១៨មីនា ឆ្នាំ១៩៧០ រៀបចំដោយសម្តេចព្រះ នរោត្តម សីហនុ ដូចការចាក់ផ្សាយនោះឡើយ៕