លោក សមរង្ស៊ី មកដល់ភ្នំពេញហើយ

                                                                       រូបភាព ហ្វេសប៊ុក

(ថ្ងៃទី 19 កក្កដា 2013, ម៉ោង 09:40:AM) | ដោយ: មុនីរាជ CEN
ភ្នំពេញ: លោក សម រង្ស៊ី មេដឹកនាំគណបក្សប្រឆាំង បានមកដល់ព្រលានយន្តហោះហើយ នៅម៉ោង ៩ ព្រឹកនេះ។ លោកសមរង្ស៊ី បានថ្លែងយ៉ាងខ្លីទៅកាន់អ្នកកាសែតថា លោករំភើប ដែលបានវិលត្រឡប់មកវិញ។ លោកអះអាងថា លោកមកវិញនេះ ដើម្បីសង្គ្រោះជាតិ។
លោក សមរង្ស៊ី ត្រូវបានអមដោយលោក កឹម សុខា ដើរចេញពីព្រលានយន្តហោះ នៅខាងផ្នែក VIP ហើយបានឡើងឡាន អត់ដំបូល ឈរស្វាគមន៍អ្នកគាំទ្រ។

សកម្មជនគណបក្សសង្គ្រោះជាតិ រាប់ពាន់នាក់ បានទៅទទួលលោកសមរង្ស៊ី ពីព្រលានយន្តហោះអន្តរជាតិភ្នំពេញ រហូតទៅដល់ទីលានប្រជាធិបតេយ្យ។

ជាមួយគ្នានេះ កំលាំងអាជ្ញាធរ មានសមត្ថកិច្ចប៉ូលិស ប៉េអឹមជាច្រើននាក់ ក៏ត្រូវបានដាក់ពង្រាយតាមដងផ្លូវ ដើម្បីរៀបចំសន្តិសុខ សណ្តាប់ធ្នាប់ នៅតាមដងផ្លូវ និងការពារកុំជនឱកាសនិយមប្រព្រឹត្តអ្វី ដែលធ្វើឲ្យមានភាពចលាចល ពិសេសគឺការពារនូវសុវត្ថិភាពរបស់លោកសមរង្ស៊ី។

លោក យឹម សុវណ្ណ អ្នកនាំពាក្យគណបក្ស សង្គ្រោះជាតិ បានឲ្យដឹងថា សមាជិកសមាជិកា និងអ្នកគាំទ្រគណបក្ស សង្គ្រោះជាតិ ប្រមាណជា ៤ម៉ឺននាក់ ត្រូវបានរៀបចំ ដើម្បីទៅទទួលលោក សម រង្ស៊ី ពេលវិលមកកម្ពុជាវិញ។ ក្នុងចំនួន៤ម៉ឺននាក់នោះ មាន២ម៉ឺននាក់ទៅទទួលនៅអាកាសយាន្តដ្ឋានអន្តរជាតិភ្នំពេញ និង២ម៉ឺននាក់ទៀត រង់ចាំទទួលនៅទីលានប្រជាធិបតេយ្យ។

កម្មវិធីដែលគណបក្ស សង្គ្រោះជាតិ បានប្រកាស ឲ្យដឹងថា លោក សម រង្ស៊ី ត្រូវជួបសំណេះសំណាលជាមួយប្រជាពលរដ្ឋ និងអ្នកគាំទ្រនៅមុខផ្សារស៊ិនជូរីផ្លាហ្សា មុនឹងចេញដំណើរទៅទីលានប្រជាធិបតេយ្យ នៅជិតវត្តភ្នំ ដើម្បីជួបសកម្មជនអ្នកគាំទ្រ។ ពេលរសៀល លោកសមរង្ស៊ី នឹងដឹកនាំក្បួនឃោសនាបោះឆ្នោតរបស់គណបក្សសង្គ្រោះជាតិ ជាមួយលោក កឹម សុខា នៅភ្នំពេញ៕