អង្គការសហប្រជាជាតិ ទាមទារឲ្យដោះស្រាយបណ្តឹងគណបក្ស ឲ្យបានត្រឹមត្រូវ និងតម្លាភាព

............................
ដោយ៖ ស៊ុន ណារិន | ថ្ងៃសៅ ទី3 ខែសីហា ឆ្នាំ2013 | 4 ម៉ោង មុន VOD
រូបភាពពីគេហទំព័រអង្គការសហប្រជាជាតិ
អគ្គលេខាធិការអង្គការសហប្រជាជាតិ លោក បាន គីមូន កាលពីថ្ងៃសុក្រ ជំរុញឲ្យអាជ្ញាធរកម្ពុជា ដោះស្រាយពាក្យបណ្តឹងរបស់គណបក្សនយោបាយ ដោយត្រឹមត្រូវ និងមានតម្លាភាព។
លិខិតរបស់លោក បាន គីមូន ចេញផ្សាយនៅថ្ងៃទី០២ខែសីហា ឲ្យដឹងថា អង្គការសហប្រជាជាតិស្វាគមន៍ចំពោះដំណើរការប្រកបដោយសន្តិភាពនៃការបោះឆ្នោត កាលពីថ្ងៃទី២៨ខែកក្កដា។សេចក្តីថ្លែងការណ៍បន្តថា ចំពេលដែលមានរបាយការណ៍លើភាពមិនប្រក្រតី អង្គការសហប្រជាជាតិ ជំរុញឲ្យសមត្ថកិច្ចមានសមត្ថភាព ដោះស្រាយបណ្តឹងដោយត្រឹមត្រូវ និងមានតម្លាភាព ជាមួយគោលដៅចុងក្រោយនៃការធានាថា ការបេ្តជ្ញា និងការគោរពឆន្ទៈរបស់ប្រជាជនកម្ពុជា។

នៅព្រឹកថ្ងៃសៅរ៍នេះ គណបក្សប្រជាជនកម្ពុជា និងគណបក្សសង្គ្រោះជាតិ បានបើកការពិភាក្សាមួយលើការបង្កើតគណៈកម្មការឯករាជ្យមួយ ដោយទទួលបានផ្លែផ្កា ដែលអាចឈានទៅដល់ការបង្កើតគណៈកម្មការត្រួតពិនិត្យភាពមិនប្រក្រតីនៃការបោះឆ្នោតនៅពេលខាងមុខ។

អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា ដែលបានចូលរួមសម្របសម្រួលការពិភាក្សា មានប្រសាសន៍ថា គណៈកម្មការនោះ មានភាគីខាងគណបក្សប្រជាជនកម្ពុជា ខាងគណបក្សសង្គ្រោះជាតិ និងគជប ហើយមិនមានការចូលរួមពីសង្គមស៊ីវិលជាតិ និងអន្តរជាតិទេ គ្រាន់អង្គការទាំងនោះ អាចក្លាយជាអ្នកសង្កេតការណ៍បាន។ គណបក្សប្រជាជនកម្ពុជា ប្រកាសថា ខ្លួនឈ្នះការបោះឆ្នោត ដោយទទួលបាន៦៨អាសនៈ ធ្លាក់ចុះ២២អាសនៈ ហើយគណបក្សសង្គ្រោះជាតិទទួលបាន៥៥អាសនៈ កើនឡើងចំនួន២៦អាសនៈ៕

សរសេរទៅកាន់លោក ស៊ុន ណារិន តាមរយៈsun_narin@vodhotnews.com