ក្រុម​សង្គម​ស៊ីវិល និង​សហជីព​​នឹង​ធ្វើ​ពិធី​បួងសួង​សុំ​សន្តិភាព​ស្អែក​នេះ

Tuesday, 13 August 2013

ឆាយ ច័ន្ទនីដា

ភ្នំពេញ ប៉ុស្តិ៍ ​

 

ភ្នំពេញៈ ក្រុមអង្គការ ​សង្គម​ស៊ីវិល​ប្រមាណ​ ២០ ​នៅ​កម្ពុជា រៀបចំ​កម្ម​វិធី​បួងសួង​សុំ​សន្តិភាព​ សេចក្តី​សុខ​ជូន​ពលរដ្ឋ​កម្ពុជា នៅ​រមណីយដ្ឋាន​វត្ត​ភ្នំ នាវេលាម៉ោង​ ៤ ​រសៀល ថ្ងៃ​ពុធ​ ស្អែក​នេះ ក្នុង​ន័យ​បង្ហាញ​ពី​ការ​ព្រួយ​បារម្ភ​ចំពោះ​សភាព​ការណ៍​វិវត្តន៍​ក្រោយ​ការ ​បោះឆ្នោត​ និង​សុំ​ឲ្យ​មានការ​ដោះស្រាយ​ដោយ​សន្តិវិធី​ដោយ​គ្មាន​ការ​ប្រើ​ចុង​អាវុធ​។

លោក មឿន តុលា ប្រធាន​កម្មវិធី​ការងារនៃ​មជ្ឈមណ្ឌលអប់​រំ​​ច្បាប់សម្រាប់​សហគមន៍​ បាន​ឲ្យ​ដឹង​​ថា កម្ម​វិធី​ដែល​គ្រោង​មាន​មនុស្ស​ចូលរួម​មិន​តិច​ជាង​ ១០០ នាក់ មក​ពី​ស្ថាប័ន ២០​អង្គការ​ សហព័ន្ធ​ សហជីព​ សមាគម​ និង​បណ្តាញ​យុវជន​ផ្សេងៗ នឹងជុំ​គ្នា​នៅបរិវេណ​មុខ​នាឡិកា​វត្ត​ភ្នំ ហើយ​ធ្វើ​ការ​បួង​សួង​នៅ​រមណីយដ្ឋាន​នេះតែ​ម្តង គឺ​ធ្វើ​ឡើង​ចំ​ថ្ងៃ​សីល​ ប៉ុន្តែ​​មិន​មាន​ការ​ដង្ហែរ​ក្បួន​អ្វីឡើយ។

លោក​ថា៖ «យើង ​បន់ស្រន់​តាម​ជំនឿសាសនា សុំ​ឲ្យ​មាន​សន្តិភាព​សម្រាប់​អ្នក​បោះឆ្នោត​​ និង​មិន​ត្រូវ​ប្រើ​ហិង្សា​ដោះស្រាយ​គ្នា​ឡើយ​។ ពលរដ្ឋ​អាច​ចូលរួម​ជាមួយ​យើង​បាន​ ព្រោះ​នេះ​ជាការ​បួង​សួង​បែប​សាសនា គ្មានការ​រើស​អើង​ ហាម​ឃាត់​នរណា​ឡើយ សំខាន់​យើង​មិន​ត្រូវ​ការ​ហិង្សា»។

លោក ​បន្ត​ថា អ្នកចូលរួម​ទាំង​អស់​នឹង​យក​មក​ជាមួយ​នូវ​ទៀន ធូប ជាពិសេ​ស ​ផ្កា​ឈូក ដែល​តំណាង​នូវ​ អារម្មណ៍​សន្តិភាព​ ព្រម​ទាំង​ទង់​ជាតិខ្មែរ​ និង​ទង់​សាសនា​ផង​ដែរ​។

ការ ​ធ្វើការ​បួងសួង​សុំ​សន្តិភាព​នេះ ក៏​ចំពេល​ដែលស្ថានការណ៍​នៃ​ការ​ប្រកាស​លទ្ធផល​បោះ​ឆ្នោត​បណ្តោះ​អាសន្ន​ឃើញ​ ថា​គណ​បក្ស​ប្រជាជនឈ្នះ​ឆ្នោត បាន​កៅអី​ ៦៨ ទល់​៥៥ រីឯ​គណបក្សសង្គ្រោះ​ជាតិ​ក៏​បាន​ប្រកាស​ខ្លួន​ថា ខ្លួន​ឈ្នះ​មិន​តិច​ជាង​ ៦៣ ​កៅអីនោះទេ។

ប្រការនេះ ​ ធ្វើ​ឲ្យ​ស្ថានការណ៍​នៃ​ការ​ចល័ត​ទ័ព​របស់​រដ្ឋាភិបាល​ កាន់តែ​ច្រើនទៅៗ ហើយ​ដែល​គណបក្ស​កាន់​អំណាច​មួយ​នេះ អះអាង​ថា ជាវិធានការណ៍​ការពារ​ ​ទប់ស្កាត់នូវ​ហេតុ​ការណ៍​អាច​កើត​មា​ន​ កុំ​ឲ្យ​ជាន់ដាន​ដូច​ការធ្វើ​កុប​កម្ម​ដុត​ទូត​ថៃ​ ឆ្នាំ​២០០៣ នៅ​ពេល​ដែល​បក្ស​ប្រឆាំង​បាន​បដិសេធ​លទ្ធផល​បោះឆ្នោត និង​ប្រកាស​ព្រមាន​ធ្វើ​មហាបាតុកម្ម​ក្នុង​ករណី​មិន​ដោះស្រាយ​នូវ​ភាព​មិន​ ប្រក្រតី កើត​មានកំឡុង​ពេល​បោះឆ្នោត​៕