គ្រួសារសពនៃសកម្មជនបក្សប្រឆាំងជំរុញឲ្យអាជ្ញាធរចាប់ឃាតករពិតមកផ្តន្ទាទោស

...........................................

ដោយ៖ ញឹម សុខន និង អ៊ឹង ប៊ុនថន | ថ្ងៃពុធ ទី14 ខែសីហា ឆ្នាំ2013 | 9 នាទី មុន VOD
គ្រួសារសព កាន់រូបថតជនរងគ្រោះដែលជាសកម្មជនគណបក្សសង្គ្រោះជាតិ (រូបថត ញឹម សុខន)
គ្រួសារសព នៃសកម្មជនគណបក្សសង្គ្រោះជាតិ នៅថ្ងៃពុធនេះ ទទូចឲ្យសមត្ថកិច្ចចាប់ខ្លួន ឃាតករពិតមកផ្តន្ទាទោស ខណៈសមត្ថកិច្ចចាប់ខ្លួនជនសង្ស័យបានពីរនាក់ និងកំពុងស្រាវជ្រាវអ្នកពាក់ព័ន្ធនៅពីក្រោយឃាតកម្មនេះ។
ប្រាប់អ្នកសារព័ត៌មាន ក្នុងពិធីបុណ្យសព នៅភូមិឥន្ទបូរី ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ អ្នកស្រី ពេជ្យ អាន អាយុ៥៧ឆ្នាំ ជាភរិយាជនរងគ្រោះ អំពាវនាវឲ្យអាជ្ញាធរ មានសមត្ថកិច្ច ចាប់ខ្មាន់កាំភ្លើង មកផ្តន្ទាទោសតាមច្បាប់ ព្រោះគ្រួសារគាត់កំពុងភ័យខ្លាច។

មន្ត្រីស៊ើបអង្កេតនៃសមាគមអាដហុកប្រចាំខេត្តកំពង់ស្ពឺ លោក រ័ត្ន ថាវី ឲ្យដឹងថា ជនរងគ្រោះគឺជាសកម្មជនគាំទ្រគណបក្សសង្គ្រោះជាតិនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ លោកសាន់ សឿងអាយុ ៦៧ឆ្នាំ ត្រូវឃាតកដែលមានគ្នាពីរនាក់បាញ់សម្លាប់ នៅក្នុងផ្ទះលក់គ្រឿងទេសរបស់ខ្លួន ខណៈជនល្មើសចូលទិញស្រាបៀរ។

ប្រធានស្តីទីគណបក្សសង្គ្រោះជាតិ លោក កឹម សុខា និងក្រុមការងារ ដែលចុះទៅចូលរួមរំលែកទុក្ខ គ្រួសារជនរងគ្រោះដល់លំនៅឋាន បានអះអាងថា បក្សប្រឆាំងមួយនេះ សន្យារកយុត្តិធម៌ពិតជូនសកម្មជនរបស់ខ្លួន ៖

ស្នងការរងនគរបាលខេត្តកំពង់ស្ពឺលោក សម សាមួន ថ្លែងថា សមត្ថកិច្ចបានឃាត់ខ្លួនជនសង្ស័យពីរនាក់ កាលពីថ្ងៃអង្គារម្សិលមិញ តែសមត្ថកិច្ចនឹងស៊ើបអង្កេតលើជនពាក់ព័ន្ធផ្សេងទៀត ៖

នេះជាឃាតកម្មលើកទី១នៅខេត្តកំពង់ស្ពឺទៅលើសកម្មជនគណបក្សប្រឆាំង។ ខេត្តកំពង់ស្ពឺ មានអាសនៈសរុបចំនួន៦ ហើយមានតែគណបក្សពីរប៉ុណ្ណោះដែលទទួលបានអាសនៈសភា។ ប៉ុន្តែខេត្តដែលកូនប្រុសលោកនាយករដ្ឋមន្ត្រី ហ៊ុន សែន ឈរឈ្មោះលេខរៀងទី៤នោះ បើតាម គ.ជ.ប គឺគណបក្សប្រជាជនកម្ពុជាទទួលបានតែ៣អាសនៈប៉ុណ្ណោះ ដោយចាញ់គណបក្សសង្គ្រោះជាតិជិត៧០០០សំឡេងឆ្នោត៕

សូមសរសេរមកកាន់ កញ្ញា ជន ស្រីណុច តាមរយៈ chornsreynoch@vodhotnews.com