បញ្ឈប់ជាបន្ទាន់ នូវការប្រមូលស្នាមមេដៃពីប្រជាពលរដ្ឋ

បញ្ឈប់ជាបន្ទាន់ នូវការប្រមូលស្នាមមេដៃពីប្រជាពលរដ្ឋ

ភ្នំពេញៈ ក្រសួងមហាផ្ទៃ បានស្នើឲ្យអាជ្ញាធររាជធានី ខេត្ត ត្រូវបញ្ឈប់ជាបន្ទាន់ នូវការប្រមូលស្នាមមេដៃពីប្រជាពលរដ្ឋដើម្បីគាំទ្រលទ្ធផលបោះឆ្នោត ខណៈដែលចលនានៃការប្រមូលស្នាមមេដៃនេះ បានកើតឡើងកាន់តែច្រើនឡើងៗ ហើយត្រូវអង្គការសង្គមស៊ីវិលរិះគន់ថា បានបង្ហាញពីភាពមិនឯករាជ្យរបស់អាជ្ញាធរមូលដ្ឋាន។
នៅក្នុងសេចក្តីប្រកាស មួយដែលបានចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃ ចុះថ្ងៃទី២០ ខែសីហាដែលទើបតែធ្លាក់ដល់ដៃអ្នកសារព័ត៌មាន កាលពីម្សិលមិញ សរសេរថា ការបញ្ជាឲ្យបញ្ឈប់នូវការប្រមូលស្នាមមេដៃពីប្រជាពលរដ្ឋដើម្បីគាំទ្រលទ្ធផលនៃការបោះឆ្នោតនេះ គឺជាការរក្សា«ពង្រឹងអព្យាក្រឹតភាព របស់អាជ្ញាធរសាធារណៈនៅគ្រប់ថ្នាក់»។

លោកឧបនាយករដ្ឋមន្ត្រី ស ខេង បានសរសេរទៀតថា៖ «អភិបាលរាជធានី ខេត្ត ត្រូវបញ្ឈប់ជាបន្ទាន់នូវការធ្វើញត្តិគាំទ្រលទ្ធផលនៃការបោះឆ្នោត ជ្រើសតាំងតំណាងរាស្ត្រ នីតិកាលទី ៥ និងបញ្ឈប់ជាបន្ទាន់ នូវការណែនាំដល់អាជ្ញាធរមូលដ្ឋាន ដើម្បីចលនាប្រជាពលរដ្ឋ ឲ្យផ្តិតមេដៃគាំទ្រលទ្ធផលនៃការបោះឆ្នោត»។
ចំណាត់ការរបស់ក្រសួងមហាផ្ទៃនេះ បានធ្វើឡើងបន្ទាប់ពីមានសេចក្តីរាយការណ៍ជាច្រើនថា អាជ្ញាធរនៅតាមភូមិ សង្កាត់ ឃុំ ទាំងនៅរាជធានីភ្នំពេញ និងនៅតាមខេត្តមួយចំនួន បានដើរប្រមូលស្នាមមេដៃនៅតាមផ្ទះប្រជាពលរដ្ឋ ធ្វើឲ្យប្រជាពលរដ្ឋមានការថ្នាំងថ្នាក់ និងបង្ខំចិត្តផ្តិតមេដៃឲ្យ ដោយអ្នកខ្លះខ្លាចមានការរើសអើង ពីអាជ្ញាធរនៅពេលពួកគេធ្វើលិខិតបញ្ជាក់ផ្សេងៗ ឬត្រូវការពឹងពាក់អាជ្ញាធរឃុំសង្កាត់។ មិនត្រឹមតែអាជ្ញាធរឃុំ សង្កាត់ទេ សូម្បីតែនៅខេត្តសៀមរាបមានទាំងមន្ត្រីថា្នក់មន្ទីរ ក៏បានហៅក្រុមអ្នកសមាគមទេសចរណ៍ផ្សេងៗ ឲ្យផ្តិតមេដៃគាំទ្រលទ្ធផលបោះឆ្នោតបឋមផងដែរ។

អ្នកនាំពាក្យក្រសួងមហាផ្ទៃ លោក ខៀវ សុភ័គ បានថ្លែងកាលពីម្សិលមិញថា ក្រសួងបានណែនាំដល់មន្ត្រីថ្នាក់រាជធានី ខេត្តក្រោមឱវាទរបស់ខ្លួន ឲ្យឈប់ប្រមូលស្នាមមេដៃពលរដ្ឋ ដើម្បីរក្សាឯករាជភាពរបស់អាជ្ញាធរ ហើយណាមួយ ធ្វើដូច្នេះ មិនត្រឹមត្រូវ ខណៈពេលលទ្ធផលបោះឆ្នោតជាផ្លូវការនៅមិនទាន់ប្រកាសនៅឡើយ។ នៅពេលសួរថា តើក្រសួងនិងមានវិធានការយ៉ាងដូចម្តេច ចំពោះអ្នកមិនគោរពការណែនាំនេះ លោកខៀវ សុភ័គ ថ្លែងថា៖ «ក្រសួងបានចេញបញ្ជាហើយ ដូច្នេះអាជ្ញាធរត្រូវតែអនុវត្ត។ ពួកគេធ្វើនេះ មិនត្រឹមត្រូវទេ ហើយខ្ញុំជឿថាគ្មាននរណាហ៊ានល្មើសបទបញ្ជារបស់ក្រសួងមហាផ្ទៃទេ»។

លោកប៉ិច សុឃឿន ចៅសង្កាត់ទឹកល្អក់ ១ បានប្រាប់ភ្នំពេញ ប៉ុស្តិ៍ កាលពីប៉ុន្មានថ្ងៃមុនថា លោកបានប្រមូលស្នាមមេដៃប្រជាពលរដ្ឋបានចំនួន ១០០០ ស្នាមមេដៃ ក្នុងចំណោមពលរដ្ឋបោះឆ្នោតក្នុងសង្កាត់ចំនួន៦០០០ នាក់នោះបានឲ្យដឹងកាលពីថ្ងៃម្សិលមិញថា លោកបានបញ្ឈប់ការប្រមូលស្នាមមេដៃតទៅទៀតហើយនៅពេលដែលបានទទួលដំណឹងនេះ។

ស្ត្រីម្នាក់រស់នៅក្នុងសង្កាត់ស្រះចក ដែលគ្រួសាររបស់អ្នកស្រី ត្រូវបានអាជ្ញាធរសុំស្នាមមេដៃគាំទ្រលទ្ធផលនៃការបោះឆ្នោត ប៉ុន្តែអ្នកស្រី មិនព្រមផ្តិតឲ្យនោះ បាននិយាយថា៖ «ក្រសួងធ្វើត្រូវខ្ញុំគាំទ្រ តែខ្ញុំខ្លាចតែអាជ្ញាធរ កត់ចំណាំយើងលើកក្រោយ ហើយមិនសូវជួយយើង ពេលមានបញ្ហាអ្វីកើតឡើង ដោយសារយើងធ្លាប់បដិសេធមិនគាំទ្រការប្រមូលស្នាមមេដៃរបៀបនេះ»។

លោកព្រាប កុល នាយកប្រតិបត្តិ អង្គការតម្លាភាពកម្ពុជា ដែលអង្គការរបស់លោកបានចូលរួមសង្កេតការក្នុងដំណើការបោះឆ្នោតផងដែរនោះ បានថ្លែងថា អង្គការសង្គមស៊ីវិលស្វាគមន៍នូវការសម្រេចរបស់ក្រសួងមហាផ្ទៃ ក្នុងការបញ្ឈប់នូវទង្វើរបស់អាជ្ញាធររាជធានី ខេត្តដែលធ្វើសកម្មភាពមិនសមរម្យ ក្នុងការប្រមូលស្នាមមេដៃ គាំទ្រលទ្ធផលនៃការបោះឆ្នោត។

លោកថ្លែងថា៖ «បើសិនជាពលរដ្ឋធ្វើដោយខ្លួនឯង វាជាសិទ្ធិរបស់គាត់ តែអាជ្ញាធរមន្ត្រីមានតួនាទីជាមនុស្សអព្យាក្រឹត នោះការប្រមូលស្នាមមេដៃ របស់ពួកគេ ជារឿងខុសច្បាប់ ខុសក្រមសីលធម៌ជាមន្ត្រីសាធារណៈ។ យើងស្វាគមន៍វិធានការលោកឧប ស ខេង តែក្រសួងគួរតែធ្វើឲ្យបានមុនហ្នឹង»។ លោកបន្តថា អាជ្ញាធររាជធានី ខេត្ត មិនគួរយកឥទ្ធិពលរបស់ខ្លួនទៅបង្ខំពលរដ្ឋឲ្យផ្តល់ស្នាមមេដៃ គាំទ្រលទ្ធផលបោះឆ្នោតឡើយ ដោយត្រូវទុកបញ្ហាបោះឆ្នោតនេះ ឲ្យមន្ត្រីពាក់ព័ន្ធជាអ្នកដោះស្រាយ៕