វិភាគ៖ មហាបាតុកម្មទ្រង់ទ្រាយធំរបស់គណបក្សសង្គ្រោះជាតិអាចមានឥទ្ធិពលកម្រិតណា?

អ្នកវិភាគឯករាជ្យ លោកបណ្ឌិត ឡៅ ម៉ុងហៃ អះអាងថា បាតុកម្មធំលើកទី២នេះ មានឥទ្ធិពល ប្រសិនបើរដ្ឋាភិបាល មិនដោះស្រាយទេ ធ្វើឲ្យគេមើលឃើញថា ខ្លួនមានកំហុសកាន់តែធ្ងន់ធ្ងរ ៖

.........................................
ដោយ៖ អ៊ឹង ប៊ុនថន | ថ្ងៃចន្ទ័ ទី9 ខែកញ្ញា ឆ្នាំ2013 | 24 នាទី មុន VOD
បាតុកម្មអហិង្សារបស់គណបក្សសង្គ្រោះជាតិ កាលពីថ្ងៃទី០៧កញ្ញា២០១៣ (រូបថត តាំង វីដា)
គណបក្សជំទាស់ នឹងធ្វើមហាបាតុកម្មជាទ្រង់ទ្រាយធំលើកទី២ នៅថ្ងៃទី១៥ ១៦ និង១៧ ខែកញ្ញា ឆ្នាំ២០១៣នេះ គឺមួយសប្តាហ៍បន្ទាប់ពី គជប ប្រកាសលទ្ធផលបោះឆ្នោតជាផ្លូវការ។
ថ្នាក់ដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា បញ្ជាក់ថា បាតុកម្មនោះ ដើម្បីទាមទារឲ្យគណបក្សប្រជាជនកម្ពុជាចូលរួមបង្កើតគណៈកម្មការឯករាជ្យស៊ើបអង្កេតករណីភាពមិនប្រក្រតីនៅពេលបោះឆ្នោត។

អ្នកវិភាគឯករាជ្យ លោកបណ្ឌិត ឡៅ ម៉ុងហៃ អះអាងថា បាតុកម្មធំលើកទី២នេះ មានឥទ្ធិពល ប្រសិនបើរដ្ឋាភិបាល មិនដោះស្រាយទេ ធ្វើឲ្យគេមើលឃើញថា ខ្លួនមានកំហុសកាន់តែធ្ងន់ធ្ងរ ៖

កាលពីថ្ងៃទី០៧ ខែកញ្ញានេះ គណបក្សសង្គ្រោះជាតិបានរៀបចំធ្វើមហាបាតុកម្ម ដែលមានអ្នកចូលរួម ប្រមាណ ៣ ទៅ ៤ម៉ឺននាក់ ដោយធ្វើតែមួយព្រឹកប៉ុណ្ណោះ ដើម្បីឲ្យ គជប ពន្យាពេលប្រកាសលទ្ធផលបោះឆ្នោតជាផ្លូវការ និងស៊ើបអង្កេតឡើងវិញពីភាពមិនប្រក្រតី។ ប៉ុន្តែទីបំផុត គជប មិនបានធ្វើតាមឡើយ។ ចំណែកបាតុកម្មដែលគ្រោងធ្វើ៣ថ្ងៃចុងសប្តាហ៍នេះ គឺបាតុករនឹងបោះតង់ដេកនៅទីលានប្រជាធិបតេយ្យ។

អ្នកវិភាគយល់ថា នេះគឺជារបៀបមួយដែលប្រជាជនថៃធ្លាប់ធ្វើបាតុកម្មទម្លាក់មេដឹកនាំរបស់ពួកគេ ដូចជា អតីតនាយករដ្ឋមន្ត្រី ថាក់ស៊ីន និងអតីតនាយករដ្ឋមន្ត្រី អាប់ភីស៊ីត។

លោកបណ្ឌិត ឡៅ ម៉ុងហៃ បារម្ភថា បាតុកម្មលើកក្រោយនេះ អាចមានអ្នកចូលរួមច្រើនជាងលើកមុនទៀត ហើយអាចរាលដាលកាន់ធំ ដូចនៅប្រទេសថៃ ៖

បើទោះជា ភាពមិនប្រក្រតីត្រូវបានសង្គមស៊ីវិល និងគណបក្សប្រឆាំងរកឃើញថា មានភាពធ្ងន់ធ្ងរ ប៉ុន្តែចំនួនអាសនៈ របស់គណបក្សទាំងពីរ ដែលគជប ប្រកាសគឺដូចគ្នានឹងអ្វីដែលមន្ត្រីគណបក្សប្រជាជនកម្ពុជា បានគណនាភ្លាមៗ នៅថ្ងៃបោះឆ្នោត គឺគណបក្សប្រជាជនកម្ពុជាទទួលអាសនៈចំនួន ៦៨ ចំណែកគណបក្សសង្គ្រោះជាតិ ទទួលបានអាសនៈចំនួន ៥៥។

សម្រាប់លោកបណ្ឌិត ហង្ស ពុទ្ធា នាយកអង្គការនិចហ្វ្រិច បើទោះជាលទ្ធផលផ្លូវការត្រូវបានគជបប្រកាសមែន តែការធ្វើបាតុកម្មនោះ នឹងត្រូវគេមើញថា មូលហេតុដោយសារការបោះឆ្នោតនោះ មិនត្រឹមត្រូវ ៖

ក្រុមអ្នកវិភាគ បារម្ភថា មហាបាតុកម្មទ្រង់ទ្រាយធំលើកទី២ អាចមានបញ្ហាច្រើនកើតឡើង បើទោះជាបាតុកម្មលើកទី១ប្រព្រឹត្តិទៅដោយសន្តិវិធី និងអហិង្សាក៏ដោយព្រោះសន្ទុះប្រជាជនកាន់តែពុះកញ្ច្រោល ដោយសាររដ្ឋាភិបាល ហាក់មិនខ្វល់នឹងអ្វីដែលពួកគេទាមទារ។

លោកហង្ស ពុទ្ធា បារម្ភថា ការកំណត់៦០ថ្ងៃតាមច្បាប់ដែលថា ព្រះមហាក្សត្រនឹងកោះប្រជុំសភាលើកដំបូងនោះ នឹងមិនអាចទៅរួចទេ បើសិន រដ្ឋាភិបាលមិនដោះស្រាយនូវអ្វីដែលបាតុករទាមទារ ៖

ទោះជាយ៉ាងណា ក្រុមអ្នកវិភាគ ផ្តល់ជម្រើសថា មានតែតួអង្គព្រះមហាក្សត្រទេ ដែលអាចធ្វើឲ្យស្ថានភាពតានតឹងនេះ អាចថមថយបាន ។ ប៉ុន្តែនៅតែមានបញ្ហាចោទ ត្រង់ថា តើការសម្រេចព្រះទ័យរបស់ព្រះអង្គ នឹងអាចឲ្យភាគីពាក់ព័ន្ធទទួលយកបានឬមិនបាន៕

សរសេរមកកាន់លោក អ៊ឹង ប៊ុនថន តាមរយៈ chanthorn@vodhotnews.com