 |
| ប្រតិភូគណបក្សសង្គ្រោះជាតិ នៅពេលទៅទទួលព្រះមហាក្សត្រ សម្តេចព្រះបាទបរមនាថ នរោត្តម សីហមុនី ថ្ងៃទី១១ កញ្ញា ឆ្នាំ២០១៣។ :@Siv Channa |
ដោយ ប៉ែន បូណាrfi អត្ថបទចុះផ្សាយនៅថ្ងៃ ពុធ 11 កញ្ញា 2013
ដូចការគ្រោងទុក ព្រះមហាក្សត្រ សម្តេចព្រះបរមនាថ នរោត្តម សីហមុនី បានយាងត្រឡប់មកដល់ភ្នំពេញវិញហើយ នៅវេលាម៉ោង៤រសៀលថ្ងៃពុធនេះ។ លោកនាយករដ្ឋមន្ត្រី ហ៊ុន សែន និងលោក សម រង្ស៊ី ដែលបានទៅទទួលព្រះមហាក្សត្រ នៅព្រលានយន្តហោះ មិនបានជួបនិយាយរកគ្នាទេ។ យ៉ាងណាក៏ដោយ លោកសម រង្ស៊ី បានអះអាងថា លោកនៅរង់ចាំចម្លើយពីព្រះមហាក្សត្រ ដើម្បីជួយអន្តរាគមន៍រកដំណោះស្រាយបញ្ហានយោបាយ។
ព្រះមហាក្សត្រ សម្តេចព្រះបរមនាថ នរោត្តម សីហមុនី បានយាងត្រឡប់មកដល់ភ្នំពេញវិញហើយ នៅវេលាម៉ោង៤រសៀល ថ្ងៃពុធទី ១១សីហានេះ បន្ទាប់ពីបានទទួលការពិនិត្យព្រះរាជសុខភាពពីសំណាក់គ្រូពេទ្យចិន។
នៅឯព្រលានយន្តហោះអន្តរជាតិភ្នំពេញ មានវត្តមានលោកនាយករដ្ឋមន្ត្រី ហ៊ុន សែន លោក ហេង សំរិន ប្រធានរដ្ឋសភា រួមទាំងមន្ត្រីអ្នកមុខអ្នកការ និងគ្រួសាររាជវង្សមួយចំនួនទៀត។ លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិព្រមទាំងមន្ត្រីបក្សប្រឆាំងជាច្រើនទៀត ក៏បានទៅទទួលព្រះរាជដំណើរយាងត្រឡប់របស់ព្រះមហាក្សត្រដែរ។
ប៉ុន្តែ មេដឹកនាំគណបក្សជាប់ឆ្នោតទាំងពីរមិនបានជួបពិភាក្សាគ្នា ឬសូម្បីតែនិយាយរកគ្នានោះឡើយ។ មុនពេលព្រះមហាក្សត្រយាងមកដល់ អ្នកនយោបាយទាំងអស់បានចូលក្នុងបន្ទប់រង់ចាំ VIP ជាមួយគ្នា ដែលធ្វើឲ្យមានការសង្ស័យថា ពួកគេអាចនឹងជួបជជែកគ្នា។ ប៉ុន្តែ ពេលចេញមកវិញ លោក សម រង្ស៊ី បានអះអាងថា លោកមិនបានជួបជាមួយលោកនាយករដ្ឋមន្ត្រីទេ។
មេដឹកនាំបក្សប្រឆាំងបញ្ជាក់ថា គោលបំណងរបស់លោកដែលមកព្រលានយន្តហោះនៅថ្ងៃនេះ គឺដើម្បីទទួលព្រះរាជដំណើរយាងនិវត្តន៍របស់ព្រះមហាក្សត្រតែប៉ុណ្ណោះ។ ទាក់ទងទៅនឹងដំណោះស្រាយបញ្ហានយោបាយ លោក សម រង្ស៊ី បានអះអាងថា លោកនៅរង់ចាំចម្លើយពីព្រះមហាក្សត្រ បន្ទាប់ពីលោកបានសុំឲ្យព្រះអង្គអន្តរាគមជួយរកដំណោះស្រាយ។ ទាំងលោកកឹម សុខា និងលោកសម រង្ស៊ី នៅតែអះអាងថា បាតុកម្មជាជម្រើសមិនអាចចៀសវាងបាន ប្រសិនបើគ្មានដំណោះ ស្រាយ។
ការយាងត្រឡប់របស់ព្រះមហាក្សត្រនៅពេលនេះ ចំពេលដែលស្ថានការណ៍នយោបាយកំពុងតានតឹងនៅក្រោយការបោះឆ្នោត។ ព្រះមហាក្សត្រ គ្រោងកោះអញ្ជើញអ្នកតំណាងរាស្ត្រជាប់ឆ្នោតទាំង ១២៣ នាក់ ឲ្យចូលរួមប្រជុំសភាដំបូងនៅថ្ងៃទី ២៣ កញ្ញាខាងមុខនេះ។
ប៉ុន្តែ គណបក្សសង្គ្រោះជាតិដែលបដិសេធមិនទទួលយកលទ្ធផលនៃការបោះឆ្នោតបានប្រកាសម្តងហើយ ម្តងទៀតថា នឹងធ្វើពហិការមិនចូលប្រជុំសភាទេ។ គណបក្សប្រឆាំងក៏បានប្រកាសធ្វើមហាបាតុកម្មជាលើកទី២ទៀត ចាប់ពីថ្ងៃអាទិត្យចុងសប្តាហ៍នេះតទៅ។
គេនៅមិនទាន់ដឹងថា ព្រះរាជវត្តមានរបស់ព្រះមហាក្សត្រអាចនឹងជួយបន្ធូរបន្ថយភាពតានតឹងនយោបាយ ដែលឲ្យគណបក្សទាំងពីរបានចូលប្រជុំរដ្ឋសភាដំបូងដោយស្រុះស្រួលគ្នា ឬក៏មានតែគណបក្សប្រជាជនកម្ពុជាម្នាក់ឯង ចូលរួមប្រជុំ រីឯគណបក្សសង្គ្រោះជាតិនៅធ្វើបាតុកម្មក្រៅរដ្ឋសភានោះឡើយ៕
1 comment:
ខ្មែរមានជីវភាពនយោបាយ ស្ថិតក្នុងសភាព ត្រូវតែបន្តររួបរួមគ្នា បង្ហាញស្នាដៃរ ក្នុងការទាមទារកយុត្តិធ៌មឲ្យខ្លួនឯង ឲ្យពិភពលោកឃើញ! សូមបញ្ជាក់ថា បើត្រូវការឲ្យអន្ដរជាតិជួយ មិនត្រូវ ប្ដូរជំហររបស់ខ្លួនជាដាច់ខាត!
ធ្វើអ្វីៗដើម្បីជាតិមិនមែនស្រួលដូចបកចេកទេ! សូមកុំធ្វើអ្វីដូចបរទេសធ្លាប់ដៀលយើងថា៖
"ខ្មែរធ្វើអ្វីឆេះតែមួយឆាវដូចភ្លើងចម្បើង រួចរលត់បាត់យើងចាំតែទទួលផលទៅ"
យើងមិននិយាយ តម្រង់លើបុគ្គលណាទេ! គឺយើងតម្រង់ទាមទា៖
យកអ្វីជារបស់ខ្មែរ!
ខ្មែរត្រូវរស់សមជាមនុស្សក្នុងប្រទេស មានលទ្ធិប្រជាធិប្បតេយ្យពិតប្រាកដ!
មាន រដ្ឋធម្មនុញ្ញ ត្រូវបដិបត្តិ!
បញ្ឈប់ ការហូរចូលនឹងផ្ទុក ជនបរទេសខុសច្បាប់ អោយជិះជាន់ខ្មែរ!
ខ្មែរត្រូវរស់ជាប្រជាជាតិមួយ ដែលមាន សុវឌ្ឍិកម្មនឹងសុវត្ថិភាព ក្នុងបច្ចុប្បន្ននឹងអនាគត របស់ខ្លួន!
Post a Comment