ក្រុមបាតុកររើបារ៉ាសបន្លាលួសចេញពីទ្រូងផ្លូវ ខណៈពួកគេហែក្បួនទៅកាន់ព្រះអង្គដងកើ

......................................
ដោយ៖ ពេជ្រ សុធារី | ថ្ងៃអាទិត្យ ទី15 ខែកញ្ញា ឆ្នាំ2013 | 7 នាទី មុន VOD
យ៉ាងហោចណាស់ បារ៉ាសបន្លាលួសមួយកន្លែងនៅមុខវត្តឧណ្ណាលោម ក្បែររូបសំណាក់តេជោមាសតេជោយ៉ត ត្រូវបានក្រុមបាតុករលើកក្រវាត់ចេញពីទ្រូងផ្លូវ ខណៈដែលពួកហែក្បួនទៅកាន់ព្រះអង្គដងកើ។
ហ្វូងបាតុករជាច្រើនពាន់នាក់ ដែលដឹកនាំដោយលោក សម រង្ស៊ី និងលោក កឹម សុខា ដែលបានចេញក្បួនពីទីលានប្រជាធិបតេយ្យនៅម៉ោងប្រមាណ ១១:៣០នាទីព្រឹកថ្ងៃអាទិត្យ បានធ្វើដំណើរទៅបួងសួងនៅព្រះអង្គដងកើ មុខព្រះបរមរាជវាំង ប៉ុន្តែត្រូវបានសមត្ថកិច្ចរារាំងដោយដាក់បន្លាលួសបិទកំណាត់ផ្លូវនៅមុខវត្តឧណ្ណាលោម ក្បែររូបសំណាកតេជោមាស តេជោយ៉ត ហើយភ្លាមនោះក្រុមបាតុករ បាននាំគ្នារើបារ៉ាសនោះក្រវែងទៅម្ខាង និងបានប៉ះពាក្យសំដីជាមួយកម្លាំងសមត្ថកិច្ចដែលឈរជើងនៅទីនោះ។

ទោះជាយ៉ាងណា គេពុំឃើញមានការប៉ះទង្គិចគ្នាខ្លាំង ដែលបង្កឲ្យមានរបួសស្នាមនោះទេ។ បន្ទាប់ពីមានការហែក្បួនរបស់ក្រុមបាតុករ កម្លាំងសមត្ថកិច្ចបានដាក់បន្លាលួសដាក់នៅចំណុចសំខាន់ៗ និងស្ថាប័នធំៗមួយចំនួន ក្នុងរាជធានីភ្នំពេញ ដូចជានៅមុខទីស្តីការគណៈរដ្ឋមន្ត្រី នៅម្តុំផ្ទះលោកនាយករដ្ឋមន្ត្រី ហ៊ុន សែន ជាដើម។

គួរបញ្ជាក់ថា នៅព្រឹកថ្ងៃទី១៥កញ្ញានេះ បន្ទាប់ពីលោក សម រង្ស៊ី និងលោក កឹម សុខា បានដឹកនាំក្រុមបាតុករដង្ហែក្បួនពីស្នាក់ការគណបក្សសង្គ្រោះជាតិ ទៅកាន់ទីលានប្រជាធិបតេយ្យ និងបានថ្លែងសារមួយចំនួនរួច ថ្នាក់ដឹកនាំជាន់ខ្ពស់គណបក្សសង្គ្រោះជាតិទាំងពីររូបនេះ បានដឹកនាំក្បួនបាតុករជាច្រើនពាន់នាក់ដើរក្បួនទៅបួងសួងនៅព្រះអង្គដងកើ តាមមហាវិថីព្រះស៊ីសុវត្ថិ(ផ្លូវមាត់ទន្ល) ដើម្បីបួងសួង ប៉ុន្តែត្រូវបានសមត្ថកិច្ចរារាំង។ តែទោះជាយ៉ាងណា លោកសម រង្ស៊ី និងក្រុមបាតុករនាំគ្នាទៅស្មឹងស្មាតនៅមុខព្រះបរមរាជវាំងមួយសន្ទុះ ហើយបន្តដំណើរត្រឡប់ទៅកាន់វត្តភ្នំវិញ។ ខណៈដែលលោកសម រង្ស៊ី និងលោក កឹម សុខា កំពុងធ្វើដំណើរដោយថ្មើរជើងត្រឡប់ទៅកាន់វត្តភ្នំនោះ គេសង្កេតឃើញមានឧត្ថម្ភាគចក្រមួយគ្រឿង ហោះក្រវែលពីលើផងដែរ៕

សរសេរមកកាន់កញ្ញា ពេជ្រ សុធារី តាមរយៈ sotheary@vodhotnews.com