គណបក្សសង្គ្រោះជាតិ ប្រមូលស្នាមមេដៃប្រជាពលរដ្ឋ ដាក់ញត្តិថ្វាយព្រះមហាក្សត្រ

គណបក្ស​សង្គ្រោះ​ជាតិ ប្រមូលស្នាមមេដៃប្រជាពលរដ្ឋ ដាក់ញត្តិថ្វាយព្រះមហាក្សត្រ កុំឲ្យយាងធ្វើព្រះរាជាធិបតី ក្នុងសម័យប្រជុំសភាដំបូង

(ថ្ងៃទី 19 កញ្ញា 2013, ម៉ោង 10:24:AM) | ដោយ: មុនីរាជ CEN

ភ្នំពេញ: គណបក្ស​សង្គ្រោះ​ជាតិ បានចាប់ផ្តើម​ធ្វើ​យុទ្ធនាការ​ប្រមូល​ស្នាម​មេដៃ​ប្រជាពលរដ្ឋ​ម្ចាស់ឆ្នោត ដើម្បី​ដាក់ថ្វាយ​ព្រះមហាក្សត្រ ទាក់ទង​ការប្រជុំ​សភា​ដំបូង នីតិកាល​ទី​៥ នា​ថ្ងៃទី​២៣ ខែកញ្ញា ឆ្នាំ​២០១៣ ខាងមុខនេះ​។​

​នៅក្នុង​ការបើក​សម័យ​ប្រជុំ​សភា​ដំបូង នៅ​ដើម​សប្តាហ៍​ក្រោយនេះ គឺ​បេក្ខជន​តំណាងរាស្ត្រ​ជាប់ឆ្នោត​ទាំង​៥៥​រូប នៃ​គណបក្ស​សង្គ្រោះ​ជាតិ បាន​ប្តេជ្ញាចិត្ត មិន​ចូលរួម​ប្រជុំ​ទេ​។​

​មន្ត្រីជាន់ខ្ពស់​គណបក្ស​សង្គ្រោះ​ជាតិ បាន​ប្រាប់​គេហទំព័រ CEN ឲ្យ​ដឹង​នៅ​ព្រឹក​ថ្ងៃទី​១៩ ខែកញ្ញា​នេះ​ថា បន្ទាប់ពី​បានទទួល​លិខិតឆ្លើយតប​ពី ​ព្រះមហាក្សត្រ កាលពី​ថ្ងៃទី​១៨ ខែកញ្ញា ទាក់ទង​ទៅ​នឹង​ការស្នើសុំ​ពន្យារពេល​ប្រជុំ​សភា នា​ថ្ងៃទី​២៣ ខែកញ្ញា ឆ្នាំ​២០១៣ ហើយ​ត្រូវបាន​ព្រះមហាក្សត្រ បដិសេធ​នោះ គណបក្ស​សង្គ្រោះ​ជាតិ បានធ្វើការ​កោះប្រជុំ​ថ្នាក់ដឹកនាំ​ជាន់ខ្ពស់ និង​បេក្ខជន​តំណាងរាស្ត្រ ជាប់ឆ្នោត​ទាំង ៥៥​រូប កាលពី​រសៀល​ថ្ងៃទី​១៨ ខែកញ្ញា ម្សិលមិញ​។​

​មន្ត្រីជាន់ខ្ពស់​គណបក្ស​សង្គ្រោះ​ជាតិ បាន​បង្ហើប​ឲ្យ​ដឹងថា នៅក្នុង​កិច្ចប្រជុំ​នោះ បាន​ឲ្យ​បេក្ខជន​តំណាងរាស្ត្រ​ជាប់ឆ្នោត​ទាំង​៥៥​រូប ឡើង​ធ្វើការ​បញ្ចេញមតិ និង​បញ្ជាក់​ជំហរ​របស់ខ្លួន​ម្នាក់ៗ អំពី​ការចូលរួម​ប្រជុំ ឬ​មិន​ចូលរួម​ប្រជុំ​សភា​ដំបូង នៅ​ថ្ងៃទី​២៣ ខែកញ្ញា ឆ្នាំ​២០១៣ ខាងមុខនេះ​។ បេក្ខជន​តំណាងរាស្ត្រ​ទាំងអស់ បានបញ្ជាក់​ជំហរ​របស់ខ្លួន​ថា នឹងមិន​ចូលរួម​ប្រជុំ​សភា នា​ថ្ងៃទី​២៣ ខែកញ្ញា ទេ​។​

​មន្ត្រី​ដដែល បាន​បន្តថា ជាមួយគ្នា​នោះ ខាង​គណបក្សក៏បាន​ឲ្យ​បេក្ខជន​តំណាងរាស្ត្រ​ជាប់ឆ្នោត​ទាំងអស់​៥៥​រូប ចុះហត្ថលេខា លើ​លិខិត​រួមមួយ ដើម្បី​ផ្ញើ​ទូលថ្វាយ​ព្រះមហាក្សត្រ អំពី​ជំហរ​មិន​ចូលរួម​ប្រជុំ​សភា និង​សូម​ឲ្យ​ព្រះអង្គ ធ្វើការ​ពិចារណា​។ ទន្ទឹមនឹងនេះ គណបក្ស​បាន​ឲ្យ​ក្រុមការងារ ប្រាប់​ប្រជាពលរដ្ឋ អំពី​ជំហរ​ដែល​មិន​ចូលរួម​ប្រជុំ​សភា និង​មិន​ក្បត់​ឆន្ទៈ​ប្រជាពលរដ្ឋ​ម្ចាស់ឆ្នោត ដែល​បាន​បោះឆ្នោត​ឲ្យ​គណបក្ស​សង្គ្រោះ​ជាតិ​។ ហើយ​បើ​គណបក្ស​ចូលទៅ​ប្រជុំ​សភា មានន័យថា ក្បត់​ប្រជាពលរដ្ឋ​។​

​ប្រភព​ច្បាស់ការណ៍ បាន​បញ្ជាក់ថា គណបក្ស​សង្គ្រោះ​ជាតិ បាន​ឲ្យ​បេក្ខជន​តំណាងរាស្ត្រ​ជាប់ឆ្នោត​ទាំងអស់ និង​ក្រុមការងារ​គណបក្ស យក​ញត្តិ​ដើរ​ប្រមូល​ស្នាម​មេដៃ​ប្រជាពលរដ្ឋ​ទូទាំងប្រទេស ដើម្បី​ដាក់ថ្វាយ​ព្រះមហាក្សត្រ អំពី​ជំហរ​ទាក់ទង​ការមិន​ចូលរួម​ប្រជុំ​សភា នាពេលខាងមុខ​។​

​ញត្តិ​ដែលមាន​ស្នាម​មេដៃ​ប្រជាពលរដ្ឋ​ម្ចាស់ឆ្នោត ដែល​គ្រោង​ដាក់ថ្វាយ​ព្រះមហាក្សត្រ គឺ​សូម​ឲ្យ​ព្រះអង្គ​ព្រះមេត្តា កុំ​យាង​ព្រះរាជាធិបតី ក្នុងសម័យ​ប្រជុំ​សភា​ដំបូង ក្នុងករណី​ដែល​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ មិនបាន​ឯកភាពគ្នា​៕​