លទ្ធផល​បោះឆ្នោត​ផ្លូវការ​៖ គណបក្ស​ប្រជាជន​កម្ពុជា ស្វាគមន៍ តែ​គណបក្ស​សង្គ្រោះ​ជាតិ ប្រកាន់​ជំហរ​តាម​មហា​បាតុកម្ម​

(ថ្ងៃទី 8 កញ្ញា 2013, ម៉ោង 10:11:AM) | ដោយ: លី សិលាCEN

ភ្នំពេញ: ​លទ្ធផល​បោះឆ្នោត​ផ្លូវការ នៃ​ការបោះឆ្នោត​ជ្រើសតាំង​តំណាងរាស្ត្រ នីតិកាល​ទី​៥ កាលពី​ថ្ងៃ​ទី​២៨ ខែកក្កដា ឆ្នាំ​២០១៣ ត្រូវបាន​គជប ប្រកាស​នៅ​ព្រឹក​ថ្ងៃ​អាទិត្យ ទី​៨ ខែ​កញ្ញា ឆ្នាំ​២០១៣​។ សំឡេងឆ្នោត​របស់​គណ​បក្ស​និមួយៗ ចំនួន​អាសនៈ និង​ឈ្មោះ​បេក្ខជន​តំណាង​ជាប់ឆ្នោត​តាម​មណ្ឌល​និមួយៗ ត្រូវបាន​គជប ប្រកាស​ផ្សព្វផ្សាយ​ជា​ផ្លូវការ​។ នោះគឺគណបក្ស ប្រជាជនកម្ពុជា ទទួលបាន ៦៨ អាសនៈ និង​គណបក្ស​សង្គ្រោះជាតិ ទទួលបាន ៥៥ អាសនៈ។ 

សម្រាប់​គណបក្ស​ប្រជាជន​កម្ពុជា ដែល​ឈ្នះ​ការបោះឆ្នោត បាន​ស្វាគមន៍​លទ្ធផល​បោះឆ្នោត​នោះ តែ​គណបក្ស​សង្គ្រោះ​ជាតិ មាន​ជំហរ​រឹងផ្អឹង ដោយ​គោរព​តាម​ជំហរ​ចេញពី​មហា​បាតុកម្ម​អហិង្សា កាលពី​ថ្ងៃ​សៅរ៍ ទី​៧​កញ្ញា​។​

​លោក ជាម យៀប សមាជិក​គណៈ​អចិន្ត្រៃយ៍​នៃ​គណៈកម្មាធិការ​កណ្តាល គណបក្ស​ប្រជាជន​កម្ពុជា និង​ជា​តំណាងរាស្ត្រ​ជាង ៣០ ឆ្នាំមកហើយនោះ បាន​ថ្លែងថា គណបក្ស​ប្រជាជន​កម្ពុជា សូម​អបអរសាទរ​ចំពោះ​គជប ដែល​បាន​ប្រកាស​លទ្ធផល​បោះឆ្នោត​ផ្លូវការ​នៅ​ព្រឹក​នេះ​។ គជប ត្រូវបាន​ច្បាប់​ប្រគល់​តួនាទី និង​ភារកិច្ច​ឲ្យ​រៀបចំ​ការបោះឆ្នោត​។​

​លោក ជាម យៀប បន្តថា សម្រាប់ គណបក្ស​ប្រជាជន​កម្ពុជា រង់ចាំ​តែ​ព្រះករុណា​ព្រះមហាក្សត្រ ចេញ​លិខិត កោះប្រជុំ​រដ្ឋសភា លើកដំបូង ហើយ​កិច្ចប្រជុំ​រដ្ឋសភា ដើម្បី​បង្កើត​រាជរដ្ឋាភិបាល និង​ថ្នាក់ដឹកនាំ​រដ្ឋសភា គឺ​មិន​មាន​អ្វី​ជាប់គាំង​នោះទេ​។ ពោល​គឺ​តាម​លទ្ធផល​បោះឆ្នោត​ផ្លូវការ ដែល​គជប បានប្រកាស​ពេលនេះ គឺ​គណបក្ស​ប្រជាជន​កម្ពុជា ទទួលបាន​សំឡេង​លើសពី ៥០ ភាគរយ បូក ១ នៃ​ចំនួន​អាសនៈ​រដ្ឋសភា​សរុប ១២៣​។ ពោល​គឺ​គណបក្ស​ប្រជាជន​កម្ពុជា ទទួលបាន​អាសនៈ​ចំនួន ៦៨​។​

​ចំពោះ​លទ្ធភាព​នៃ​ការចរចា​ណាមួយ សម្រាប់​រៀបចំ​ក្បាលម៉ាស៊ីន​ដឹកនាំ​រដ្ឋសភា នីតិកាល​ទី​៥ ត្រូវបាន​លោក​ជាម​យៀប អះអាងថា មិនមែន​គណបក្ស​ប្រជាជន​កម្ពុជា ដែល​ជា​គណបក្ស​ឈ្នះឆ្នោត ជា​អ្នក​ផ្តួចផ្តើម​នោះទេ តែ​គណបក្ស​សង្គ្រោះ​ជាតិ​ទេ ដែលជា​អ្នក​ធ្វើ​សំណើ សម្រាប់​កិច្ចចរចា​ណាមួយ​។ គណបក្ស​ប្រជាជន​កម្ពុជា បានប្រកាស​តាំងពី​ដើម​មក គឺ​បើកចំហរ​ជើងមេឃ​ជានិច្ច សម្រាប់​កិច្ចចរចា​។ ប៉ុន្តែ​មក​ដល់​ថ្ងៃនេះ មិនទាន់​មាន​ការ​កំណត់​ថ្ងៃ ជួបចរចា​រវាង​គណ​បក្ស​ជាប់ឆ្នោត​ទាំងពីរ នៅឡើយ​ទេ​។​

​បន្ទាប់​ពី​គជប ប្រកាស​លទ្ធផល​បោះឆ្នោត​ផ្លូវការ នៅ​ព្រឹក​មិញ រួចមក លោក យឹម សុវណ្ណ អ្នកនាំពាក្យ​គណបក្ស​សង្គ្រោះ​ជាតិ បាន​បដិសេធ​មិន​ធ្វើ​អត្ថាធិប្បាយ​អ្វី​ទេ ជុំវិញ​ជំហរ​របស់​គណបក្ស​សង្គ្រោះ​ជាតិ​។ ក៏​ប៉ុន្តែ​លោកបានបញ្ជាក់​ថា ជំហរ​របស់​គណបក្ស​សង្គ្រោះ​ជាតិ ចំពោះ​លទ្ធផល​បោះឆ្នោត ពេលនេះ គឺ​ដូច​អ្វី​ដែល​លោក​ប្រធានសម​រង្ស៊ី និង​លោកអនុប្រធាន កឹម​សុខា បាន​ប្រកាស​ក្នុង​មហា​បាតុកម្មអហិង្សា កាលពី​ថ្ងៃ​ទី​៧​កញ្ញា រួម​ទាំង​ញត្តិ ដែល​មហា​បាតុកម្មអហិង្សា បានអនុម័ត ថ្វាយ​ព្រះមហាក្សត្រ​។​

​បើ​តាម​សេចក្តីថ្លែងការណ៍ និង​ញត្តិ​របស់​មហា​បាតុកម្ម​អហិង្សា របស់​គណបក្ស​សង្គ្រោះ​ជាតិ បានអនុម័ត កាលពី​ព្រឹក​ថ្ងៃ​សៅរ៍ ទី​៧ ខែ​កញ្ញា ឆ្នាំ​២០១៣ បង្ហាញថា គណបក្សប្រឆាំង ទាមទារ​ឲ្យ​បង្កើត​គណៈកម្មការ​ចម្រុះ​ឯករាជ្យ​មួយ ដើម្បី​ដោះស្រាយ​ភាពមិនប្រក្រតី នៃ​ការបោះឆ្នោត ព្រមទាំង​ស្នើសុំ​ឲ្យ​គជប ពន្យារពេល ប្រកាស​លទ្ធផល​បោះឆ្នោត​បណ្តោះអាសន្ន​។​

​មហា​បាតុកម្មអហិង្សា​របស់​គ​ណ​បក្ស​សង្គ្រោះ​ជាតិ ក៏​បាន​ព្រមាន​ថា បើសិនជា គជប នៅតែ​ប្រកាស​លទ្ធផល​បោះឆ្នោត​ផ្លូវការ នៅ​ព្រឹក​ថ្ងៃអាទិត្យ ទី​៨ ខែ​កញ្ញា ឆ្នាំ​២០១៣ នោះ គណបក្ស​សង្គ្រោះ​ជាតិ នឹង​បន្ត​ដឹកនាំ​មហា​បាតុកម្ម​អហិង្សា តវ៉ា​នឹង​លទ្ធផល​បោះឆ្នោត បន្តទៀត​។​

​មកដល់​ព្រឹក​ថ្ងៃអាទិត្យ ទី​៨ ខែ​កញ្ញា ឆ្នាំ​២០១៣ លោក យឹម សុវណ្ណ បានបញ្ជាក់​ថា គណបក្ស​សង្គ្រោះ​ជាតិ មិន​ទាន់​កំណត់​ពេលវេលា​ច្បាស់លាស់ ដើម្បី​ធ្វើ​បាតុកម្ម​តវ៉ា​នឹង​លទ្ធផល​បោះឆ្នោត ជាថ្មី​ម្តងទៀត នៅឡើយ​ទេ​៕​