គណបក្សសង្គ្រោះជាតិ ព្រមានធ្វើពហិការប្រើប្រាស់ផលិតផលរបស់រដ្ឋ

............................
ដោយ៖ ស៊ុន ណារិន | ថ្ងៃអាទិត្យ ទី15 ខែកញ្ញា ឆ្នាំ2013 | 4 ម៉ោង មុន VOD
ថ្នាក់ដឹកនាំគណបក្សសង្គ្រោះជាតិ នៅថ្ងៃអាទិត្យនេះ ព្រមានឲ្យប្រជាពលរដ្ឋ ធ្វើពហិការឈប់ទិញផលិតផល និងរបស់ប្រើប្រាស់ទាំងឡាយណា ដែលគ្រប់គ្រងដោយរដ្ឋ ប្រសិនបើការទាមទារយុត្តិធម៌ មិនត្រូវបានដោះស្រាយ បន្ទាប់ពីមហាបាតុកម្មរយៈពេលបីថ្ងៃនេះ។
គណបក្សសង្គ្រោះជាតិ បានចាប់ផ្តើមមហាបាតុកម្មរបស់ខ្លួននៅថ្ងៃអាទិត្យ ចាប់ពីថ្ងៃទី១៥ដល់ថ្ងៃទី១៧ខែកញ្ញានេះ នៅទីលានប្រជាធិបតេយ្យ។

អនុប្រធានគណបក្សសង្គ្រោះជាតិ លោក កឹម សុខា ថ្លែងទៅកាន់អ្នកចូលរួមរាប់ម៉ឺននាក់ថា ប្រសិនបើក្នុងរយៈពេលបីថ្ងៃនេះ គណបក្សប្រជាជនកម្ពុជា មិនផ្តល់ដំណោះស្រាយជូនប្រជាពលរដ្ឋ ជាម្ចាស់ឆ្នោត គណបក្ស នឹងបញ្ចុះបញ្ចូលឲ្យប្រជាពលរដ្ឋ ឲ្យឈប់ប្រើប្រាស់លទ្ធផលផ្សេងៗ ដែលបានមកពីរដ្ឋាភិបាល ។ លោកព្រមានថា អ្នកផ្សារ អាចបិទតូបឈប់លក់ដូរ និងសាលា នឹងត្រូវបិទ ដើម្បីមកចូលរួមមហាបាតុកម្មនេះ។

ប្រធានគណបក្សសង្គ្រោះជាតិ លោក សម រង្ស៊ី ថ្លែងទៅកាន់អ្នកគាំទ្រ ឲ្យដូរក្រុមប្រឹក្សាធម្មនុញ្ញ និងគជប ដោយសារស្ថាប័នពីរនេះ ធ្វើតាមតែគណបក្សប្រជាជនកម្ពុជា ដូចជាការធ្វើតាមតែរដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាល លោក ខៀវ កញារីទ្ធ ដែលបានប្រកាសលទ្ធផលបោះឆ្នោតថា គណបក្សសង្គ្រោះជាតិ ទទួលបាន៥៥អាសនៈ ហើយប្រជាជនកម្ពុជា ទទួលបាន៦៨អាសនៈ។លោក សម រង្ស៊ី អំពាវនាវឲ្យរាប់សន្លឹកឆ្នោតឡើងវិញ និងមានការបោះឆ្នោតម្តងទៀត ដើម្បីគោរពតាមឆន្ទៈប្រជាពលរដ្ឋ។

ក្នុងវីដេអូក្លីបរបស់គណបក្សសង្គ្រោះ ជាតិ ចេញផ្សាយកាលពីថ្ងៃសៅរ៍ លោក កឹម សុខា ថ្លែងថា ជាក់ស្តែង ការចរចាជាមួយគណបក្សប្រជាជនកម្ពុជា មិនទាន់មានលទ្ធផលទាល់តែសោះ ដូច្នេះមហាបាតុកម្ម គឺដើម្បីបង្ហាញពីឆន្ទៈពិត ទាមទាររកយុត្តិធម៌។ លោកព្រមានថា ប្រសិនបើមិនមានយុត្តិធម៌ទេ គណបក្សសង្គ្រោះជាតិ និងប្រជាពលរដ្ឋ នឹងមិននៅស្ងៀមនោះទេ។

ចំណែក លោក សម រង្ស៊ី បានអំពាវនាវឲ្យពលរដ្ឋ ព្រះសង្ឃ និងយុវជន ចូលរួមមហាបាតុកម្ម ឲ្យបានច្រើនកុះករ ដើម្បីបង្ហាញពីភាពក្តៅក្រហាយ និងភាពមិនសុខចិត្តនឹងលទ្ធផលបោះឆ្នោតដ៏អយុត្តិធម៌។ លោកបញ្ជាក់ថា ម្ចាស់ឆ្នោត មិនអាចទទួលយកលទ្ធផលបំភ្លៃបានទេ៕

សរសេរមកកាន់ លោក ស៊ុន ណារិន តាមរយៈ sun_narin@vodhotnews.com