 |
| សកម្មភាពនេសាទត្រីរបស់ជនជាតិវៀតណាម នៅខាងលិច វត្តពោធិ៍ថ្មី ភូមិពោធិ៍ថ្មី ឃុំកោះសំពៅ ស្រុកពាមជរ ខេត្តព្រៃវែង កាលពីថ្ងៃទី១៧ ខែសីហា ឆ្នាំ២០១៣។ RFA/Hum Chamroeun |
ដោយ ហ៊ុំ ចំរើន 2013-10-26
ក្រុមអ្នកនេសាទប្រើទូក កាណូត រួមទាំងឧបករណ៍ចាប់ត្រីប្រភេទស្បៃមុងជាច្រើនផងនោះ បានយកទៅដាក់ចាប់ត្រីនៅតាមដងអូរមួយចំនួន ស្ថិតក្នុងភូមិអូរតាំងលូ ឃុំកោះសំពៅ ស្រុកពាមជរ។
ប្រជាពលរដ្ឋម្នាក់ឈ្មោះ លោក អុក ដារា រស់នៅភូមិអូរតាំងលូ ឃុំកោះសំពៅ មានប្រសាសន៍នៅថ្ងៃទី២៦ តុលា ថា ប្រជាពលរដ្ឋបានទៅហាមឃាត់សកម្មភាពនេសាទនេះច្រើនលើកច្រើនសារួចមកហើយ ប៉ុន្តែក្រុមឈ្មួញនេសាទនៅតែធ្វើសកម្មភាពមិនស្ដាប់ការរារាំងរបស់អ្នកភូមិឡើយ៖ «គេនិយាយថា គេមានច្បាប់ពីឯកឧត្ដម ចាន់ សារុន។ ហើយសួរថាឡូនេសាទសហគមន៍មាននណាស៊ីញេបង? ខ្ញុំគិតទៅឈឺចាប់ណាស់។ បើនិយាយពីទ្រង់ទ្រាយវិញច្រើនណាស់បង ច្រើនពេក ហើយដាក់ដៃមានកាណូតដេកចាំ គេដាក់ភ្លើងអីប្រជាពលរដ្ឋចុះឡើង។ និយាយទៅថាគេធ្វើឡូហ្នឹងណាស់ គេថាសុំច្បាប់ហើយអ៊ីចឹងណាស់»។
លោកថា ប្រជាពលរដ្ឋបានទៅប្ដឹងអាជ្ញាធរមានសមត្ថកិច្ច ឲ្យជួយរារាំងទប់ស្កាត់ការនេសាទចាប់ត្រីខុសច្បាប់នេះដែរ ប៉ុន្តែអាជ្ញាធរមិនអើពើចំពោះសកម្មភាពនេសាទនេះឡើយ។
ឆ្លើយតបនឹងបញ្ហានេះ នាយសង្កាត់រដ្ឋបាលជលផល ស្រុកពាមជរ លោក ផាត់ សេន ឲ្យដឹងថា តំបន់នេសាទនោះជាតំបន់នេសាទរបស់សហគមន៍ ដែលបានស្នើសុំច្បាប់នេសាទមែន។ ប៉ុន្តែ រឿងការបង់ប្រាក់ ដើម្បីបានសិទ្ធិធ្វើនេសាទនោះ លោកថាលោកពុំបានដឹងពីបញ្ហានេះឡើយ៖ «ដៃហ្នឹងដូចជាមាននៅក្នុងគម្រោងគេ គម្រោងបោះការអភិវឌ្ឍសហគមន៍តេជោហ្នឹង តេជោមេគរ តេជោពោថ្មីហ្នឹង។ ប៉ុន្តែ ច្បាប់ទម្លាប់ដូចជាមានស៊ីញេត្រឹមឯកឧត្ដមរដ្ឋមន្ត្រីហើយ ប៉ុន្តែមិនទាន់បញ្ជូនដល់សម្ដេច។ ប៉ុន្តែការចុះធ្វើហ្នឹង ដូចជាការធ្វើបន្តិចបន្តួច ប៉ុន្តែមិនទាន់មានលក្ខណៈអីជាដុំកំភួនទេបាទ»។
លោកថា កន្លងមកអាជ្ញាធរតែងធ្វើការទប់ស្កាត់ហាមឃាត់មិនឲ្យកើតមានសកម្មភាពនេសាទខុសច្បាប់នោះឡើយ។
យ៉ាងណាក៏ដោយ ប្រជាពលរដ្ឋអះអាងថា ក្រុមអ្នកនេសាទគេអាចធ្វើការនេសាទចាប់ត្រីបាន ដោយសារគេបានបង់ប្រាក់ប្រមាណ ៤ពាន់ដុល្លារ ទៅឲ្យសមត្ថកិច្ចជលផលខេត្តព្រៃវែង។ ចំពោះប្រជាពលរដ្ឋក្រីក្រ ដែលធ្វើនេសាទជាលក្ខណៈគ្រួសារនោះ ពួកគេពុំអាចទៅនេសាទចាប់ត្រីនៅតំបន់នោះបានឡើយ។
អ្នកភូមិទទូចសុំឲ្យលោករដ្ឋមន្ត្រីដែលទើបចូលកាន់តំណែងថ្មី ធ្វើយ៉ាងណាជួយទប់ស្កាត់សកម្មភាពនេសាទនេះឲ្យបាន ដើម្បីជៀសវាងកុំឲ្យបញ្ហានេះបន្តរីករាលដាលទៅថ្ងៃខាងមុខទៀត៕
No comments:
Post a Comment