រហូតមកដល់ថ្ងៃនេះ ទឹកជំនន់នៅតាមបណ្ដាខេត្តមួយចំនួននៅកម្ពុជា បានស្រកហើយ នៅសល់តែខេត្តទំនាបមួយចំនួន រួមមានខេត្តព្រៃវែង ខេត្តកណ្ដាល និងឃុំខ្លះនៅជាប់តាមបឹងទន្លេសាប ដែលនៅបន្តជន់លិចនៅឡើយ។
 |
| ទឹកជន់លិចលើកំណាត់ផ្លូវជាតិលេខ៧៦ នៅចំណុចអូរចេង ឃុំតាអង ស្រុកកូនមុំ ខេត្តរតនគិរី កាលពីព្រឹកថ្ងៃទី១៧ ខែកញ្ញា ឆ្នាំ២០១៣។ RFA/Ratha Visal |
ដោយ ទេព សុរ៉ាវី RFA 2013-10-30
គណៈកម្មាធិការជាតិគ្រប់គ្រងគ្រោះមហន្តរាយទឹកជំនន់ ប្រកាសថា ឆ្នាំនេះមានមនុស្ស ១៦៨នាក់ស្លាប់ ដំណាំស្រូវដែលរងផលប៉ះពាល់មានជាង ៣០ម៉ឺនហិកតារ ខូចខាតជាបណ្ដោះអាសន្នចំនួន ៣ម៉ឺនហិកតារ និងប៉ះពាល់ដល់ដំណាំរួមផ្សំ រួមមានពោត សណ្ដែក ដំឡូងមីជាង ៥សែនហិកតារ។
លោកនាយករដ្ឋមន្ត្រី ហ៊ុន សែន និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ប្រកាសគោលនយោបាយផ្តល់ប្រាក់ម្នាក់ ១លានរៀល ដល់គ្រួសារជនរងគ្រោះដែលបានស្លាប់ដោយសារទឹកជំនន់។
ទឹកជំនន់បានជន់លិចស្ទើរតែគ្រប់ខេត្ត និងបានសម្លាប់មនុស្សចំនួន ១៦៨នាក់។ កាលពីឆ្នាំ២០១២ ទឹកជំនន់បានសម្លាប់មនុស្ស ១៤នាក់ ហើយឆ្នាំ២០១១ ទឹកជំនន់ក៏បានសម្លាប់មនុស្សអស់ចំនួន ២៥០នាក់ ព្រមទាំងធ្វើឲ្យខាតបង់ថវិកាជាតិអស់រាប់លានដុល្លារ។
អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា មានប្រសាសន៍នៅក្នុងសន្និសីទកាសែត នៅថ្ងៃទី៣០ ខែតុលា ថា អាជ្ញាធរពាក់ព័ន្ធនៅតាមតំបន់ដែលរងគ្រោះដោយសារទឹកជំនន់ បានអនុវត្តតាមអនុសាសន៍របស់លោកនាយករដ្ឋមន្ត្រី ហ៊ុន សែន គឺការស្ដារ និងការបង្កបង្កើនផលឡើងវិញ តាមយុទ្ធសាស្ត្រដំណាំបណ្ដេញទឹក។ លោកបន្តថា ចំពោះផ្លូវ និងប្រព័ន្ធធារាសាស្ត្រដែលខូចខាតដោយសារទឹកជំនន់ និងបញ្ហាសុខភាពរបស់ពលរដ្ឋដែលរងគ្រោះ ខាងក្រសួងជំនាញកំពុងត្រួតពិនិត្យ និងវាយតម្លៃនៃផលប៉ះពាល់។
លោក ញឹម វណ្ណដា បញ្ជាក់ថា ក្រសួងសេដ្ឋកិច្ចនឹងផ្តល់ប្រាក់សរុបចំនួន ១៦៨លានរៀល ដល់គ្រួសារជនរងគ្រោះ ១៦៨នាក់ ដែលបានស្លាប់ដោយសារទឹកជំនន់ក្នុងឆ្នាំនេះ៖ «សម្ដេចគាត់បានធ្វើគោលនយោបាយម្នាក់មួយលានរៀល ដើម្បីឲ្យក្រសួងសេដ្ឋកិច្ច និងហិរញ្ញវត្ថុ ផ្ទេរលុយនេះទៅរតនាគារខេត្ត ដើម្បីដោះស្រាយទៅដល់គ្រួសារសពធ្វើបុណ្យធ្វើទាន»។
មន្ត្រីជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយរូបនេះ នៅមិនទាន់សរុបទំហំនៃការខូចខាតគិតជាទឹកប្រាក់នៅឡើយទេ។ ប៉ុន្តែ ក្រសួងអភិវឌ្ឍន៍ជនបទ បានស្នើថវិកាប្រមាណ ២៣០ពាន់លានរៀល ឬប្រហាក់ប្រហែល ៥លានដុល្លារ សម្រាប់ស្ដារឡើងវិញក្រោយទឹកជំនន់បានស្រក។ យ៉ាងណា ក្រសួងផ្សេងទៀត រួមទាំងក្រសួងសាធារណការ ដឹកជញ្ជូន នៅមិនទាន់វាយតម្លៃនៃទំហំផ្លូវដែលបានខូចខាតនៅឡើយ។
យ៉ាងណា លោក ញឹម វណ្ណដា ធ្លាប់ថ្លែងនៅក្នុងពិធីប្រគល់អំណោយជំនួយសង្គ្រោះបន្ទាន់ពីប្រទេសជប៉ុន កាលពីសប្ដាហ៍មុនថា រដ្ឋាភិបាលប៉ាន់ប្រមាណតម្លៃនៃការខូចខាតទឹកជំនន់ឆ្នាំនេះទំហំដល់ទៅជាង ១ពាន់លានដុល្លារអាមេរិក ហើយថា នៅខេត្តបន្ទាយមានជ័យ និងខេត្តបាត់ដំបង មានទំហំប៉ះពាល់ដល់ទៅជាង ៥០០លានដុល្លារ។
នាយកមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា លោក យ៉ង់ សាំងកុមារ យល់ឃើញថា ស្រូវដែលខូចខាតទាំងស្រុងហើយនោះ មិនអាចស្ដារឡើងវិញបាន។ រីឯស្រូវដែលលិចទឹកក្នុងរយៈពេលខ្លី វាអាចលូតលាស់បានល្អឡើងវិញ។
លោក យ៉ង់ សាំងកុមារ បានលើកទឹកចិត្តឲ្យកសិករដែលរងគ្រោះស្រូវខូចខាតទាំងស្រុង បន្តដាំស្រូវមិនប្រកាន់រដូវ ដែលត្រូវការពេលខ្លី និងឆាប់ប្រមូលផល ឬងាកទៅដាំដំណាំរួមផ្សំផ្សេងៗ ដែលត្រូវការដើមទុនតិច ដើម្បីយកថវិកាមកផ្គត់ផ្គង់គ្រួសារ៖ «ទីមួយ យើងអាចពិនិត្យមើល បើមានទឹកគ្រប់គ្រាន់អ៊ីចឹង យើងអាចធ្វើស្រូវឡើងវិញ មិនប្រកាន់រដូវ រយៈពេលខ្លី ១០០ថ្ងៃ ឬជាង ១០០ថ្ងៃ។ ទី២ ប្រសិនបើយើងអត់មានទឹកគ្រប់គ្រាន់ យើងងាកមក ជាពិសេសពពួកសណ្ដែក សណ្តែកបាយ សណ្ដែកខៀវ សណ្ដែកគ្រាប់ក្រហម សណ្ដែកគ្រាប់ស វាមានរយៈពេលខ្លី ហើយនិងត្រសក់ល្ពៅ ដំឡូងជ្វា»។
ការសិក្សារបស់ លោក យ៉ង់ សាំងកុមារ បង្ហាញថា កម្ពុជា រងគ្រោះដោយសារទឹកជំនន់នៅឆ្នាំនេះមាន២ គឺការរងគ្រោះដោយទឹកជំនន់ទឹកភ្លៀងទន្លេមេគង្គ និងការរងគ្រោះដោយទឹកជំនន់ទឹកភ្លៀង ដែលកើតមានខ្លាំងនៅខេត្តសៀមរាប បន្ទាយមានជ័យ និងខេត្តបាត់ដំបង។ លោកបញ្ជាក់ថា កត្តាធម្មជាតិ និងកត្តាមនុស្សប្រព្រឹត្តិ ដូចជាការកាប់បំផ្លាញព្រៃឈើ ការកាប់ឆ្ការព្រៃធ្វើចម្ការ ការបណ្តោយឲ្យស្ទឹងអូររាក់មិនស្ដារ និងការសាងសង់ហេដ្ឋារចនាសម្ព័ន្ធ រួមមានផ្លូវ ប៉ុន្តែគ្មានការរៀបចំប្រព័ន្ធលូទឹកឲ្យបានត្រឹមត្រូវ ពិសេសការគ្រប់គ្រងប្រព័ន្ធទឹក រួមមានអាងទឹកកំពីងពួយ មិនបានល្អ រហូតបាក់ហៀរទឹកចេញក្រៅ បានធ្វើឲ្យស្ថានភាពទឹកជំនន់ក្នុងឆ្នាំនេះរឹតធ្ងន់ធ្ងរ ជាងកាលពីទឹកជំនន់ឆ្នាំ២០១១។ លោកអំពាវនាវឲ្យអាជ្ញាធរពាក់ព័ន្ធ ត្រូវសិក្សាឲ្យស៊ីជម្រៅបញ្ហាទាំងនោះ ដើម្បីរកវិធីសាស្ត្របង្ការ ឬសម្រាលកុំឲ្យមានភាពធ្ងន់ធ្ងរនៅពេលមានទឹកជំនន់លើកក្រោយទៀត៕
1 comment:
ខ្ញុំជូនចំពោះអស់លោក មេដឹកនាំខ្មែរជាទីគោរព!
សូមមេតាក្រឡេកមើល ប្រជាពលរដ្ឋខ្មែរផង បើមុននឹងធ្វើការអភិវឍ្ឍន៍អ្វីៗ៖
លោកឃើញទេ ពេលលោកធ្វើផ្លូវ គ្រប់គ្រងដោយបរទេស បំណុលមិនទាន់សង ផ្លូវក៏ត្រូវរលាយខូចអស់!
ពេលលោកបង្កើតឲ្យមានរោងចក្រ ពលករខ្មែរពុំមានការបច្ចេកទេស ដែលអាចទទួលយកការងារទាំងនោះបាន!
ពេលលោកកាប់ឈើ លោកលក់ទៅឲ្យបរទេស ពុំមានការឆ្នៃប្រឌិត ដែលអាចឲ្យមានការងារ សម្រាប់ពលរដ្ឋខ្មែរ!
ឡោនិសាទ ឧទ្យានជាតិ ដីរ៉ែ ដីសមទាន សម្បត្តិជាតិ ដូចអង្គវត្ត។ល។ សុទ្ធតែគ្រប់គ្រងដោយបរទេស។
អស់លោក គួរតែបណ្ដុះបណ្ដាលពលរដ្ឋរបស់ខ្លួន ហើយអភិវឍ្ឍន៍អ្វីៗដោយប្រើប្រាស់ធនធានមនុស្សខ្មែរទៅតាមសម្រួល មិនមែនធ្វើអ្វីឲ្យខាងតែបានទាំងកំហ៊ុក ហើយអាងដោះសារថា៖ "យកអ្នកបច្ចេកទេសមក ព្រោះមនុស្សខ្មែរពុំមានតាមតម្រូវការ"
សូមមេតាបញ្ឈប់ធ្វើអ្វីៗទាំងបង្ខំ ផលប្រយោជន៍បានទៅបរទេស បំណុលកូនខ្មែរជាអ្នកសងយ៉ាងនេះទៀតទៅ!
Post a Comment