លោក កែម ឡី បង្ហាញ​ពី​គ្រោះថ្នាក់៥យ៉ាង បើ​គ្មាន​ការកែទម្រង់​បញ្ហា​អន្តោប្រវេសន៍

អ្នកវិភាគ​ស្ថានការណ៍​សង្គម​កម្ពុជា លោក កែម ឡី បានបង្ហាញ​ពី​គ្រោះថ្នាក់​នៃ​បញ្ហា​ជន​អន្តោ ប្រវេសន៍​ខុសច្បាប់​នៅក្នុង​ប្រទេស​កម្ពុជា​នេះ​ថា ប្រសិនបើ​រដ្ឋាភិបាល​អាណ​ត្តិ​ថ្មី​មិន​កែទម្រង់ បញ្ហា​ជនអន្តោប្រវេសន៍​នេះ​ទេ នៅក្នុង​ថ្ងៃ​ណាមួយ​កម្ពុជា នឹង​ធ្លាក់ខ្លួន​ក្នុង​គ្រោះថ្នាក់ ៥យ៉ាង ជាក់​ជាមិនខាន។ 

ថ្លែងប្រាប់​គេហទំព័រថ្មីៗនៅថ្ងៃនេះ លោក កែម ឡី ដែលជា​អ្នកវិភាគ​ឯករាជ្យ​នៅក្នុង​ប្រទេស កម្ពុជា បានបង្ហាញ​ពី​ជំហរ​ចង់​ឲ្យ​រដ្ឋាភិបាល​កម្ពុជា​អាណត្តិ​ថ្មី​នេះ ធ្វើការ​កំណែទម្រង់​បញ្ហា​ជនអន្តោប្រវេសន៍​ជាបន្ទាន់ ដោយ​លោក​បាន​មើលឃើញ​នូវ​គ្រោះថ្នាក់៥យ៉ាង​ប្រសិន បើ​រដ្ឋាភិបាល មិន​ធ្វើការ​កែទម្រង់​នោះទេ។

គ្រោះថ្នាក់​ទាំង ៥ យ៉ាង​របស់លោក កែម ឡី នោះ​មានដូចជា៖

ទី១ នៅពេលដែល​ជនអន្តោប្រវេសន៍​ខុសច្បាប់ កាន់តែ​មានការ​កើនឡើង​ពីមួយថ្ងៃ ទៅមួយ​ថ្ងៃនោះ ធ្វើ​ឲ្យ​ពលរដ្ឋ​ខ្មែរ បាត់បង់​ការងារ ឧក្រិដ្ឋកម្ម​កើតមាន​ច្រើន ដោយសារ​ជន អន្តោប្រវេសន៍ ដែល​មក​រស់នៅ​ស្រុក​ខ្មែរ​នោះ មិនដឹង​ពី​ប្រវត្តិ​ច្បាស់លាស់ ជួនកាល​គឺជា ឧក្រិដ្ឋជន​នៅក្នុង​ប្រទេស​ដើមកំណើត​ខ្លួន​ទៀត ដែល​ធ្វើ​ឲ្យ​មហន្តរាយ​នៅ​ស្រុក​ខ្មែរ។

ទី ២ នៅពេលដែល​ជនអន្តោប្រវេសន៍​កាន់តែច្រើនឡើងៗ យូរ​ទៅ​បង្កើតជា​បក្សពួក ក្រុមគ្រួសារ និង​ឈានទៅដល់​ការ​ឈរឈ្មោះ​ឲ្យ​គេ​បោះឆ្នោត​ឲ្យ និង​អាច​ក្លាយជា​តំណាង រាស្ត្រ ឬ​មន្ត្រីជាន់ខ្ពស់​រដ្ឋាភិបាល គ្រប់គ្រង​យន្តការ​ជាតិ​ទាំងមូល ធ្វើ​ឲ្យ​ប្រទេស​វឹកវរ។

ទី ៣ គណបក្ស​ប្រជាជន​កម្ពុជា កាន់តែ​ខ្សោយទៅៗ បាត់បង់​ការគាំទ្រ​ពី​ពលរដ្ឋ និង អាច​ចាញ់ឆ្នោត​លែង​ងើប​រួច​តែម្តង។

ទី ៤ ការរើសអើង​ពូជសាសន៍​នៅក្នុង​សង្គម​នឹង​កាន់​តែមាន​ខ្លាំង​ឡើង ប្រសិនបើ​រដ្ឋាភិបាល​មិនបាន​គ្រប់គ្រង​វា​ឲ្យ​បានល្អ។ តួ​យ៉ាងដូច​សព្វថ្ងៃ​ដូចជា​ការរើសអើង​ជនជាតិ​វៀតណាម ដោយសារ​រដ្ឋាភិបាល​មិនមាន​វិធានការ​ទប់ស្កាត់​ការហូរចូល​អន្តោប្រវេសន៍​វៀតណាម​នេះ។

ទី ៥ ដែលជា​ចំណុច​ចុងក្រោយ លោក កែម ឡី បាន​ប្រាប់​ពី​មហន្តរាយ​ជនជាតិខ្មែរ ទាំងអស់​តែម្តង ជាពិសេស​គឺ​បញ្ហា​ជនអន្តោប្រវេសន៍​វៀតណាម ដែល​លោក​អះអាងថា បច្ចុប្បន្ននេះ ពលរដ្ឋ​ខ្មែរ​ណា​ក៏​ព្រួយបារម្ភ ដោយសារតែ​ពីមួយថ្ងៃ​ទៅមួយថ្ងៃ​ចូលមក​កម្ពុជា ខុសច្បាប់​កាន់ តែ​ច្រើនឡើង៕

ប្រភពពី ថ្មីៗ