តំណាង​បក្ស​ជាប់​ឆ្នោត​ទាំង​ពីរ​នៅ​មិន​ទាន់​កំណត់​ថ្ងៃ​ជួប​ចរចា​នៅ​ឡើយ

គម្រោង​ជួប​គ្នា​រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ ដើម្បី​បន្ត​ចរចា​រក​ដំណោះស្រាយ​នយោបាយ​នៅ​សប្ដាហ៍​នេះ​បាន​បរាជ័យ ក្រោយ​ពេល​តំណាង​គណបក្ស​ទាំង​ពីរ​បាន​ជួប​ចរចា​គ្នា​កាល​ពី​សប្ដាហ៍​មុន ថា​នឹង​ជួប​ចរចា​គ្នា​ក្នុង​សប្ដាហ៍​នេះ ហើយ​ថា គណបក្ស​ទាំង​ពីរ​នឹង​ស្វែង​រក​ដំណោះស្រាយ​នៃ​ភាព​ជាប់​គាំង​នយោបាយ​ឲ្យ​បាន​ឆាប់​នោះ។

ដោយ ទីន ហ្សាការីយ៉ា RFA 2013-11-15

មន្ត្រី​ជាន់​ខ្ពស់​គណបក្ស​សង្គ្រោះ​ជាតិ បាន​ឲ្យ​ដឹង​នៅ​ថ្ងៃ​ទី​១៥ វិច្ឆិកា ថា គម្រោង​ជួប​គ្នា​បន្ត​ការ​ចរចា​រវាង​គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា នៅ​ក្នុង​សប្ដាហ៍​នេះ គណបក្ស​ទាំង​ពីរ​មិន​ទាន់​ឯកភាព​គ្នា​នៅ​ឡើយ។

អនុប្រធាន​គណបក្ស​សង្គ្រោះ​ជាតិ លោក កឹម សុខា មាន​ប្រសាសន៍​ថា គណបក្ស​សង្គ្រោះ​ជាតិ ត្រូវ​ប្រជុំ​គណៈកម្មការ​នាយក​ជា​មុន​សិន មុន​នឹង​កំណត់​ពេល​ជួប​គ្នា​ជា​ថ្មី។ លោក​អះអាង​ថា ការ​ជួប​គ្នា​ជា​ថ្មី​នោះ សំខាន់​នៅ​ត្រង់​ថា គណបក្ស​សង្គ្រោះ​ជាតិ នៅ​តែ​ទាមទារ​ឲ្យ​ស្វែង​រក​ការ​ពិត​លើ​លទ្ធផល​បោះ​ឆ្នោត​កាល​ពី​ថ្ងៃ​ទី​២៨ កក្កដា។

មន្ត្រី​គណបក្ស​ប្រជាជន​កម្ពុជា សុំ​មិន​បញ្ចេញ​ឈ្មោះ បាន​ឲ្យ​ដឹង​ថា គណបក្ស​ប្រជាជន​កម្ពុជា នៅ​តែ​រក្សា​ជំហរ​ក្នុង​ការ​ចរចា​នេះ។ លោក​បញ្ជាក់​ថា នៅ​ក្នុង​រយៈពេល​ប៉ុន្មាន​ថ្ងៃ​មក​នេះ ទោះ​បី​ជា​គណបក្ស​ទាំង​ពីរ​មិន​ទាន់​ជួប​គ្នា​ជា​ផ្លូវ​ការ​ក្ដី ប៉ុន្តែ​តំណាង​គណបក្ស​ទាំង​ពីរ​បាន​ពិភាក្សា​គ្នា​ក្រៅ​ផ្លូវ​ការ​ខ្លះៗ អំពី​ការ​កំណត់​កាល​បរិច្ឆេទ​ការ​ចរចា តែ​មិន​ទាន់​កំណត់​យក​ថ្ងៃ​ណា​នៅ​ឡើយ។

គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា បាន​ជួប​ចរចា​កាល​ពី​ថ្ងៃ​ទី​៥ វិច្ឆិកា ដើម្បី​រក​ដំណោះស្រាយ​នយោបាយ​រួម​គ្នា​មួយ បន្ទាប់​ពី​ជាប់​គាំង​នយោបាយ​ក្រោយ​បោះ​ឆ្នោត​ជិត ៤​ខែ​មក​ហើយ​នោះ។

គណបក្ស​សង្រ្គោះ​ជាតិ បាន​ចេញ​សេចក្ដី​ប្រកាស​ព័ត៌មាន​ភ្លាមៗ កាល​ពី​ថ្ងៃ​ទី​៥ វិច្ឆិកា ក្រោយ​ពេល​ជួប​ចរចា​នោះ​ថា ការ​ចរចា​ជាមួយ​គណបក្ស​ប្រជាជន​កម្ពុជា បាន​បរាជ័យ​ដោយសារ​ភាគី​គណបក្ស​ប្រជាជន​កម្ពុជា នៅ​តែ​បដិសេធ​មិន​ទទួល​យក​នូវ​ការ​ស្រាវជ្រាវ​ស្វែង​រក​ការ​ពិត​ភាព​មិន​ប្រក្រតី ដែល​កើត​មាន​ក្នុង​ការ​បោះ​ឆ្នោត​នីតិកាល​ទី​៥ នៃ​រដ្ឋសភា​កន្លង​ទៅ។

គណបក្ស​ជាប់​ឆ្នោត​ទាំង​ពីរ គឺ​គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា បាន​ជួប​ចរចា​រក​ដំណោះស្រាយ​នយោបាយ ដើម្បី​បញ្ចប់​ភាព​ជាប់​គាំង​នេះ​ចំនួន​បី​លើក​មក​ហើយ ប៉ុន្តែ​បញ្ហា​សំខាន់​ដែល​នៅ​តែ​មិន​ទាន់​រក​ចំណុច​រួម​ឃើញ​នោះ ដោយសារ​តែ​គណបក្ស​សង្គ្រោះ​ជាតិ នៅ​តែ​ទាមទារ​ឲ្យ​ស៊ើប​អង្កេត​ភាព​មិន​ប្រក្រតី​ធ្ងន់ធ្ងរ​នៃ​ការ​បោះ​ឆ្នោត​កាល​ពី​ថ្ងៃ​ទី​២៧ កក្កដា ឆ្នាំ​២០១៣ និង​ករណី​មួយ​ចំនួន​ទៀត។

ទាក់ទង​នឹង​បញ្ហា​នេះ អ្នក​វិភាគ​នយោបាយ​បាន​លើក​ឡើង​ថា ការ​ដោះស្រាយ​ភាព​ជាប់​គាំង​មិន​បាន​នេះ អ្នក​ដែល​ខាត​បង់​នោះ គឺ​ប្រជាពលរដ្ឋ ដោយសារ​ថា អ្នក​នយោបាយ​មិន​បាន​យក​ពេល​វេលា​ដើម្បី​ធ្វើ​ការ​បម្រើ​ប្រជាពលរដ្ឋ​ក្រោយ​ពេល​បោះ​ឆ្នោត។ ម្យ៉ាង​ទៀត អ្នក​វិភាគ​សង្កត់​ធ្ងន់​ថា ប្រសិន​អ្នក​នយោបាយ​យក​ប្រយោជន៍​ជាតិ​ជា​ធំ គណបក្ស​ទាំង​ពីរ​ត្រូវ​តែ​រក​ចំណុច​បង្រួប​បង្រួម​ជាតិ ដើម្បី​ធ្វើ​ការ​រួម​គ្នា​ដោះស្រាយ​វិបត្តិ​សង្គម ដែល​កំពុង​កើត​មាន​នេះ៕