Sunday, November 10, 2013

មូលហេតុ​ក្រុម​យុវជន​ភាគ​ច្រើន​ចាប់​អារម្មណ៍​ទៅ​នឹង​រឿង​នយោបាយ


សិក្ខា​សាលា​យុវជន​ស្ដីពី​ការ​ស្វែង​យល់​អំពី​ផល​វិបាក​បច្ចុប្បន្ន​ភាព​នយោបាយ​កម្ពុជា និង​លទ្ធភាព​ដោះស្រាយ​បញ្ហា​ជាប់​គាំង​នយោបាយ នា​សាកលវិទ្យាល័យ ខេមរៈ រាជធានី​ភ្នំពេញ កាល​ពី​ថ្ងៃ​ទី​៨ ខែ​វិច្ឆិកា ឆ្នាំ​២០១៣។ RFA/Khe Sonorng

យុវជន គឺ​ជា​កម្លាំង​ស្នូល​មួយ​នៅ​ក្នុង​សង្គម ដែល​គ្រប់​មជ្ឈដ្ឋាន​ចាប់​អារម្មណ៍​ទៅ​លើ​ពួក​គាត់។ ក្រុម​អ្នក​នយោបាយ​មាន​ទស្សនៈ​វិស័យ​ថា កាល​ណា​អូស​ទាញ​យុវជន​ភាគ​ច្រើន​បាន​នោះ នឹង​ធ្វើ​ឲ្យ​មាន​កម្លាំង​គាំទ្រ​កាន់​តែ​ខ្លាំង​ឡើង ឈាន​ទៅ​រក​ការ​ផ្លាស់​ប្ដូរ​អ្វី​មួយ​បាន។

ដោយ ខែ សុណង RFA 2013-11-09

នៅ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ យុវជន​ភាគ​ច្រើន​បាន​ចាប់​អារម្មណ៍​ទៅ​នឹង​រឿង​នយោបាយ។ ប៉ុន្តែ បញ្ហា​នេះ អ្នក​ជំនាញ​ខាង​វិទ្យាសាស្ត្រ​នយោបាយ​បាន​ពន្យល់​ថា យុវជន​ត្រូវ​តែ​សិក្សា​ឲ្យ​បាន​ស៊ី​ជម្រៅ​អំពី​គោល​នយោបាយ​របស់​គណបក្ស​នីមួយៗ​ជា​មុន​សិន។

នៅ​ក្នុង​ស្ថានភាព​នយោបាយ​កំពុង​មាន​ភាព​ស្រពិចស្រពិល​នៅ​ឡើយ​នោះ ក្រុម​យុវជន​បាន​ជំរុញ​ឲ្យ​អ្នក​នយោបាយ​ធំៗ​ចំនួន​២ គឺ​មេ​ដឹក​នាំ​គណបក្ស​ប្រជាជន​កម្ពុជា និង​មេ​ដឹក​នាំ​គណបក្ស​សង្គ្រោះ​ជាតិ សម្រុះ​សម្រួល​គ្នា ដើម្បី​ស្វែង​រក​ផល​ប្រយោជន៍​ជាតិ​ពិត​ប្រាកដ។


យុវជន​មក​ពី​សាកលវិទ្យាល័យ​មួយ​ចំនួន បាន​មក​ជួប​ជុំ​គ្នា​នៅ​សាកលវិទ្យាល័យ ខេមរៈ ជាង ១០០​នាក់ នៅ​ក្នុង​សិក្ខា​សាលា​យុវជន ស្ដីពី​ការ​ស្វែង​យល់​អំពី​ផល​វិបាក​បច្ចុប្បន្ន​ភាព​នយោបាយ​កម្ពុជា និង​លទ្ធភាព​ដោះស្រាយ​បញ្ហា​ជាប់​គាំង​នយោបាយ កាល​ពី​ថ្ងៃ​ទី​៨ ខែ​វិច្ឆិកា រៀប​ចំ​ដោយ​ក្លឹប​សំឡេង​យុវជន​ខ្មែរ​អន្តរជាតិ និង​អង្គការ​សភា​យុវជន​ខ្មែរ។

យុវជន ហែម មករា ជា​និស្សិត​ផ្នែក​នីតិសាស្ត្រ​ឆ្នាំ​ទី​២ នៃ​សាកលវិទ្យាល័យ​នីតិសាស្ត្រ និង​វិទ្យាសាស្ត្រ​សេដ្ឋកិច្ច បាន​ថ្លែង​ថា រូប​គេ​ចង់​ដឹង​ពី​ទិដ្ឋភាព​ទូទៅ និង​បច្ចុប្បន្ន​ភាព​នយោបាយ​កម្ពុជា ថា​តើ​ដល់​ណា? ហើយ​ថា តើ​អ្នក​នយោបាយ​នៃ​គណបក្ស​ទាំង​ពីរ​ដោះស្រាយ​ដោយ​របៀប​ម៉េច? យុវជន​ដដែល​ចង់​ឲ្យ​គណបក្ស​ទាំង​នេះ ធ្វើ​ការ​សម្រប​សម្រួល​គ្នា ដោយ​ផ្អែក​ទៅ​លើ​ច្បាប់ ដើម្បី​ប្រយោជន៍​ប្រជាពលរដ្ឋ​ជា​ធំ។

ចំណែក​យុវតី ងួន គឹមណេង ជា​និស្សិត​ផ្នែក​ធនាគារ និង​ហិរញ្ញវត្ថុ​ឆ្នាំ​ទី​២ នៃ​សាកលវិទ្យាល័យ ខេមរៈ ក៏​បាន​ស្នើ​ឲ្យ​បក្ស​នយោបាយ​ទាំង​ពីរ ដែល​មាន​គណបក្ស​កាន់​អំណាច និង​គណបក្ស​ប្រឆាំង ធ្វើ​ការ​រួម​គ្នា​ដើម្បី​ប្រយោជន៍​ជាតិ ជា​ជាង​ការ​ចរចា​មួយ​ដែល​គេ​សង្ស័យ​ថា ដើម្បី​តែ​អំណាច​នោះ។

មតិ​យុវជន​ទាំង​នេះ​បាន​លើក​ឡើង​នៅ​បន្ទាប់​ពី​ពួក​គេ​បាន​ស្ដាប់​អ្នក​ជំនាញ​វិទ្យាសាស្ត្រ​នយោបាយ ថ្លែង​អំពី​ប្រវត្តិ និង​វិបត្តិ​ជាប់​គាំង​នយោបាយ​ពី​មួយ​ជំនាន់​ទៅ​មួយ​ជំនាន់ៗ​នោះ។

នៅ​បន្ទាប់​ពី​ការ​បោះ​ឆ្នោត​ជាតិ​អាណត្តិ​ទី​៥ មាន​ភាព​មិន​ប្រក្រតី​ធ្ងន់ធ្ងរ​នៅ​ក្នុង​ការ​បោះ​ឆ្នោត ហើយ​គណបក្ស​ប្រឆាំង​មិន​ព្រម​ទទួល​យក​លទ្ធផល​ឆ្នោត មិន​តែ​ប៉ុណ្ណោះ​ពួក​គេ​បាន​ទាមទារ​ឲ្យ​បង្កើត​គណៈកម្មការ​ស៊ើប​អង្កេត​ដោយ​ឯករាជ្យ​មួយ ដើម្បី​ផ្ដល់​យុត្តិធម៌​ដល់​ម្ចាស់​ឆ្នោត។ ប៉ុន្តែ​ពុំ​មាន​ការ​យក​ចរចា​ត្រូវរ៉ូវ​គ្នា​នៅ​ឡើយ ហើយ​គណបក្ស​ប្រជាជន​កម្ពុជា បាន​បង្កើត​រដ្ឋាភិបាល​ដោយ​ឯក​បក្ស។

ប្រធាន​អង្គការ​សភា​យុវជន​ខ្មែរ លោក ឡុង គឹមឃន មាន​មតិ​ថា លោក​ចង់​ឲ្យ​យុវជន​ខ្មែរ​បាន​ចូល​រួម​ស្ដាប់ និង​គិត​ពី​ការ​វិភាគ​របស់​អ្នក​ជំនាញ​ខាង​ផ្នែក​វិទ្យាសាស្ត្រ​នយោបាយ និង​សង្គម។ ថ្វី​ត្បិត​តែ​កន្លង​មក យុវជន​បាន​ដឹង​ពី​ជំហរ​នយោបាយ​របស់​គណបក្ស​ដែល​ជា​តួឯក​សំខាន់​ទាំង​ពីរ​ហើយ​ក្ដី។ ប៉ុន្តែ​ដោយសារ​សំឡេង​យុវជន​ដែល​មាន​អាយុ​ចន្លោះ​ពី ១៥​ឆ្នាំ ទៅ ៣០​ឆ្នាំ ដែល​មាន​ចំនួន​ប្រមាណ ៤​លាន ទៅ ៥​លាន​នាក់ ហាក់​ដូច​ជា​កប់​បាត់​នោះ លោក​ថា ការ​គូសវាស​វាសនា​ប្រទេស​ជាតិ​មិន​អាស្រ័យ​ទៅ​លើ​កណ្ដាប់​ដៃ​របស់​អ្នក​នយោបាយ​នោះ​ទេ។

ទាក់ទង​បញ្ហា​នេះ លោក​បណ្ឌិត សុខ ទូច អ្នក​ជំនាញ​វិទ្យាសាស្ត្រ​នយោបាយ ដែល​បាន​ទៅ​ចែក​រំលែក​ព័ត៌មាន និង​ការ​វិភាគ​ដល់​ក្រុម​និស្សិត។ លោក​បាន​លើក​យក​ចំណុច​សំខាន់​ចំនួន​៣ គឺ​ប្រវត្តិ មូលហេតុ និង​ដំណោះស្រាយ​ចំពោះ​ភាព​ជាប់​គាំង​នយោបាយ។ លោក​មាន​ប្រសាសន៍​ថា ការ​លើក​យក​បញ្ហា​នេះ​មក​ប្រាប់​យុវជន មាន​បំណង​តែ​១​គត់ ធ្វើ​យ៉ាង​ណា​ឲ្យ​យុវជន​នាំ​ការ​ពិត​ទៅ​ដល់​មូលដ្ឋាន​របស់​ពួក​គេ។

លោក​បណ្ឌិត សុខ ទូច បាន​ចាត់​ទុក​យុវជន គឺ​ជា​សក្ដានុពល​សម្រាប់​កសាង​ប្រទេស​ជាតិ​ទៅ​ថ្ងៃ​អនាគត ហើយ​ពួក​គេ​នឹង​ក្លាយ​ទៅ​ជា​មេ​ដឹក​នាំ​នៅ​ពេល​ខាង​មុខ និង​ជា​បញ្ញវន្ត​ដែល​ជា​សសរ​ទ្រូង​ក្នុង​ការ​អភិវឌ្ឍ​ប្រទេស​ជាតិ​ឈរ​នៅ​លើ​ចំណេះ​ដឹង។

ក្លឹប​សំឡេង​យុវជន​ខ្មែរ​អន្តរជាតិ ដែល​ជា​បណ្ដាញ​របស់​អង្គការ​សភា​យុវជន​ខ្មែរ គ្រោង​នឹង​រៀប​ចំ​ឲ្យ​យុវជន​ជួប​ជុំ​គ្នា​របៀប​នេះ​ម្ដង​ទៀត នៅ​សាកលវិទ្យាល័យ ខេមរៈ ស្ដី​អំពី​ការ​ពិនិត្យ​មើល​ថវិកា​ជាតិ​ឆ្នាំ​២០១៤៕

2 comments:

Anonymous said...

3 laziest monkskerteers. free food, free rent, free internet surfing, so now let pretending to play politic. please go get a job to support your family instead of escaping the family for a easy life.

Anonymous said...

3 trongols ott sel.