មន្ទីរទេសចរណ៍ខេត្តកំពង់ឆ្នាំង មានគម្រោងអភិវឌ្ឍន៍ និងកែលម្អសោភ័ណភាពតំបន់ភ្នំនាងកង្រី ឲ្យក្លាយទៅជារមណីយដ្ឋានទេសចរធម្មជាតិ ដើម្បីទាក់ទាញភ្ញៀវទេសចរណ៍ជាតិ និងអន្តរជាតិ។ គម្រោងអភិវឌ្ឍន៍នេះ នឹងអាចចាប់ផ្ដើមពីចុងឆ្នាំ២០១៣ ដល់ឆ្នាំ២០១៨ នៃអាណត្តិរបស់រដ្ឋាភិបាលនីតិកាលទី៥។ តើគម្រោងនេះនឹងអាចជួយអ្វីបានខ្លះដល់ប្រជាពលរដ្ឋក្រីក្រនៅ ក្នុងតំបន់នោះ?
ជណ្ដើរឡើងភ្នំក្បែរអាស្រមជុកនាងកង្រី ដើម្បីមើលទេសភាពភ្នំនាងកង្រី (រូបថត ថ្ងៃទី១៥ ខែវិច្ឆិកា ឆ្នាំ២០១៣)។ RFA/Chin Chhetha |
ដោយ ជិន ជេដ្ឋា RFA 2013-11-18
នំនាងកង្រី គឺជាភ្នំមួយ ដែលទាក់ទងទៅនឹងរឿងព្រេងបុរាណខ្មែរ «ពុទ្ធិសែននាងកង្រី» ឬ រឿង«នាង១២»។ នៅក្នុងចំណោមរមណីយដ្ឋាន ឬតំបន់ទេសចរណ៍ចំនួន២៣កន្លែង នៅទូទាំងខេត្តកំពង់ឆ្នាំង តំបន់ភ្នំនាងកង្រី នៅតែមានភ្ញៀវទេសចរច្រើនគួរសម ចូលទៅទស្សនាដោយផ្ទាល់ ឬទស្សនាពីត្រើយម្ខាងនៃមាត់ទន្លេផ្សារក្រោម។ ស្របពេលគ្នានេះក៏មានភ្ញៀវទេសចរមួយចំនួន បានសម្ដែងការមិនសប្បាយចិត្ត ក្រោយពីត្រឡប់មកពីកម្សាន្តនៅតំបន់នោះវិញ ដោយពួកគាត់បញ្ជាក់ថា ពុំមានការអភិវឌ្ឍន៍ ឬសេវាកម្មទេសចរអ្វី សម្រាប់ថ្ពក់ចិត្តភ្ញៀវទេសចរ ដែលបានទៅកម្សាន្ដនៅទីនោះឡើយ។
ភ្ញៀវទេសចរជាតិម្នាក់មកពីខេត្តព្រៃវែងលោក ញ៉ែម សុខុម មានប្រសាសន៍ថា លោក និងភ្ញៀវទេសចរចំនួន១៥នាក់ផ្សេងទៀត បានចំណាយប្រាក់៣០ដុល្លារ ដើម្បីជួលទូកដជិះទៅទស្សនាដល់ភ្នំនាងកង្រីផ្ទាល់។ លោកបន្តថា នៅទីនោះ លោកពុំឃើញមានអ្នកលក់ដូរម្ហូបអាហារ ឬទឹកសុទ្ធសម្រាប់ភ្ញៀវទេសចរឡើយ ហើយលោកឃើញប្រជាពលរដ្ឋប្រមាណជាង២រយគ្រួសាររស់នៅក្បែរនោះ ភាគច្រើនមានជីវភាពក្រលំបាក៖ «...សម្រេចចិត្តព្រោះថាភ្នំនេះវាទាក់ទងនឹងប្រវត្តិសាស្ត្រហើយ យើងចង់ដឹងថានៅលើហ្នឹងវាមានអ្វីខ្លះដល់ពេលទៅហ្នឹងវាមានស្អី មានតែព្រៃហើយរូបសំណាកគេធ្វើតំណាងបន្តិចបន្តួចហ្នឹងណាមិន ច្រើនទេ។ តាមកត់សម្គាល់យើងឡើងតាមគណៈកម្មការគេនាំឡើងទៅដល់លើដល់ពេលទៅ ដល់វាមានរូបសំណាកធ្វើអំពីស៊ីម៉ងត៍ទេហើយនាងកង្រីហ្នឹងដេកតាម ដំណើរអីចឹងតាមដំណើរភ្នំនោះណាដេកផ្អៀងអីចឹងទៅជើងអង្កុញ ម្ខាង...»។
ភ្នំនាងកង្រី មើលពីចម្ងាយ ស្ថិតនៅភូមិសំរោង ឃុំពោធិ៍ និងភូមិត្របែក នៃឃុំត្រងិល ស្រុកកំពង់លែង ខេ្តកំពង់ឆ្នាំង (រូបថត ថ្ងៃទី១៥ ខែវិច្ឆិកា ឆ្នាំ២០១៣)។ RFA/Chin Chhetha |
ចំណែកភ្ញៀវទេសចរម្នាក់ទៀតអ្នកស្រី ឃី សុគន្ធ ថ្លែងថា អ្នកស្រី និងអ្នកស្រុកព្រៃវែងជាច្រើននាក់ផ្សេងទៀតបានធ្វើដំណើរទៅហែអង្គកឋិនទាននៅវត្តស្វាយដូនកែវ ខេត្តពោធិ៍សាត់ ក៏ប៉ុន្តែដោយភាពល្បីល្បាញ និងចង់ឃើញភ្នំនាងកង្រីផងនោះ ក៏សម្រេចចិត្តនាំគ្នាឆៀងចូលមកទស្សនាតែម្ដង។ អ្នកស្រីបន្តថា បើទោះបីជាអ្នកស្រីមិនបានជិះទូកដទៅដល់ភ្នំនាងកង្រីផ្ទាល់ ក៏ប៉ុន្តែអ្នកស្រីបានអង្គុយនៅមាត់ទន្លេផ្សារក្រោម ហើយអាចមើលឃើញយ៉ាងច្បាស់នូវជួរភ្នំ ដែលមានរាងស្រដៀងមនុស្សដេកស្លាប់ ដូចជារឿងព្រេងនិទានបានតំណាលពិតមែន។
ភ្នំនាងកង្រី លាតសន្ធឹងពីទិសខាងកើតទៅទិសខាងលិចប្រវែងប្រមាណជា២គីឡូម៉ែត្រ និងមានកម្ពស់ប្រហែល៦រយម៉ែត្រ ស្ថិតនៅជាប់ភូមិសំរោង ឃុំពោធិ៍ និងភូមិត្របែក នៃឃុំត្រងិល ស្រុកកំពង់លែង ដែលមានចម្ងាយប្រមាណជា១៤ គីឡូម៉ែត្រពីទីរួមខេត្តកំពង់ឆ្នាំង។ ភ្ញៀវទេសចរ ដែលមានបំណងទៅកម្សាន្តនៅតំបន់ភ្នំនាងកង្រី ត្រូវចំណាយពេលប្រហែលជាកន្លះម៉ោង ដើម្បីធ្វើដំណើរតាមកាណូត ឬទូកដដែលចតនៅកំពង់ផែផ្សារក្រោមរង់រង់ចាំដឹកភ្ញៀវទេសចរ ដែលមានតម្លៃចាប់ពី៣០ ទៅ៤០ដុល្លារ ក្នុងតម្លៃចរចាត្រូវរ៉ូវគ្នា។
និម្មិតសញ្ញាពុទ្ធិសែន នាងកង្រី នៅលើសួនច្បារក្បែរវិមានឯករាជ្យក្រុងកំពង់ឆ្នាំង (រូបថត ថ្ងៃទី១៥ ខែវិច្ឆិកា ឆ្នាំ២០១៣)។ RFA/Chin Chhetha |
បច្ចុប្បន្នតំបន់ភ្នំនាងកង្រី មានចំណុចពិសេសចំនួនពីរ គឺការទស្សនារូបចម្លាក់ថ្មទាក់ទងទៅនឹងរឿងព្រេង ពុទ្ធិសែននាងកង្រី នៅវត្តគិរីភក្ដី និងការទស្សនាព្រៃធម្មជាតិនៅតាមជួរភ្នំ ឬនៅអាស្រមជបនាងកង្រី ស្ថិតនៅភូមិត្របែក នៃឃុំត្រងិល។
មន្ទីរទេសចរណ៍ និងអាជ្ញាធរមូលដ្ឋាននៅខេត្តកំពង់ឆ្នាំង បានអះអាងថា គេនឹងយកតំបន់ភ្នំនាងកង្រីធ្វើជាតំបន់ទេសចរធម្មជាតិ ក្រោយពីស្ពានតភ្ជាប់ពីខេត្តកំពង់ឆ្នាំង ទៅខេត្តកំពង់ធំដែលមានចម្ងាយជាង១៤ គីឡូម៉ែត្រ ត្រូវបានតភ្ជាប់ នៅក្នុងរយៈពេល៥ឆ្នាំខាងមុខ។
អនុប្រធានមន្ទីរទេសចរណ៍ខេត្តកំពង់ឆ្នាំងលោក ផេង សាលី មានប្រសាសន៍ថា បច្ចុប្បន្នមន្ទីរទេសចរណ៍ និងអាជ្ញាធរបានចេញផែនការអភិវឌ្ឍន៍លើវិស័យទេសចរនៅតំបន់ភ្នំនាង កង្រីនេះហើយ ក៏ប៉ុន្តែនៅមិនទាន់មានក្រុមហ៊ុន ឬអ្នកដែលមានធនធានណាច្បាស់លាស់ចូលមកវិនិយោគនៅឡើយ។ លោកមានជំនឿថា ក្រោយពីមានការអភិវឌ្ឍន៍តំបន់នេះ ឲ្យក្លាយទៅជារមណីយដ្ឋានទេសចរធម្មជាតិនឹងមានភ្ញៀវទេសចរកាន់តែ ច្រើនឡើងចូលមកទស្សនា ហើយប្រជាពលរដ្ឋនៅតំបន់នោះនឹងទទួលបានផលប្រយោជន៍ជាច្រើនពីការ អភិវឌ្ឍន៍នេះ៖ «មានផែនការនឹងបង្កើតរមណីយដ្ឋានមួយគឺតំបន់រមណីយដ្ឋានជុំវិញភ្នំ នាងកង្រីហ្នឹងគឺថាការរៀបចំជាផ្លូវធ្វើដំណើររៀបចំជារោងលំហែ រៀបចំជាទីកន្លែងផ្ញើយានយន្តគ្រប់ប្រភេទ កន្លែងលក់ដូរ ហើយនឹងធ្វើការផ្សព្វផ្សាយដល់ប្រជាពលរដ្ឋនៅទីនោះឲ្យចេះធ្វើនំ ឬឲ្យចេះរករបរអ្វីដែលទាក់ទងនឹងការទិញរបស់ភ្ញៀវទេសចរហ្នឹងគឺ ថាឲ្យគាត់ផលិត ព្រោះថាកំណើនចំណូលថវិការដ្ឋក៏ដូចជាកំណើន នៃកម្រិតជីវភាពរបស់ប្រជាពលរដ្ឋបច្ចុប្បន្ននេះគឺកើតចេញពីវិស័យ ទេសចរដែលមានភាគរយច្រើនគួរសមដែរ »។
ខ្ទមសុំសិល្បរបស់យាយជី នៅលើអាស្រម «ជុកនាងកង្រី» នៅភ្នំនាងកង្រី (រូបថត ថ្ងៃទី១៥ ខែវិច្ឆិកា ឆ្នាំ២០១៣)។ RFA/Chin Chhetha |
លោកបញ្ជាក់ថា កំណើនភ្ញៀវទេសចរនៅទូទាំងខេត្តកំពង់ឆ្នាំង មានការកើនឡើងជាលំដាប់ពីមួយឆ្នាំទៅមួយឆ្នាំ។ លោកបន្ដថា រយៈពេល៩ខែដើមឆ្នាំ២០១៣ ចំនួនភ្ញៀវទេសចរជាតិមានជាង ១ម៉ឺន៨ពាន់នាក់ (១៨.៥៥១នាក់) និងភ្ញៀវទេសចរអន្តរជាតិមានចំនួន២ពាន់៧រយ៤៤នាក់(២.៧៤៤)។ តាមតួលេខនេះបង្ហាញថា ចំនួនភ្ញៀវទេសចរបានកើនឡើងច្រើន បើប្រៀបធៀបនឹងរយៈពេលដូចគ្នាទៅនឹង៩ខែដើមឆ្នាំ២០១២ ក្នុងនោះភ្ញៀវទេសចរជាតិបានកើនឡើងចំនួនជាង ៨ពាន់នាក់ និងភ្ញៀវអន្តជាតិមានចំនួនជាង១រយនាក់។
ប្រជាពលរដ្ឋមួយចំនួនមានភាពភ័យខ្លាចនឹង គម្រោងអភិវឌ្ឍន៍របស់រដ្ឋាភិបាល ឬក្រុមហ៊ុនឯកជនទៅលើទីតាំងណាមួយ ដោយសារតែកន្លងមកគេមើលឃើញថា បញ្ហា ឬជម្លោះដីធ្លីបានកើតចេញពីគម្រោងអភិវឌ្ឍន៍ទាំងនោះ។ ទោះជាយ៉ាងណាមន្ត្រីរបស់មន្ទីរទេសចរណ៍ និងអាជ្ញាធរឃុំពោធិ៍ ស្រុកកំពង់លែង មានជំនឿថា ការអភិវឌ្ឍន៍វិស័យទេសចរនេះនឹងមិនធ្វើឲ្យប៉ះពាល់ដល់ប្រជាពលរដ្ឋនោះទេ ផ្ទុយទៅវិញវានឹងធ្វើឲ្យអ្នកភូមិនៅតំបន់នោះមានមុខរបរច្បាស់លាស់ និងជីវភាពកាន់តែធូរធារទៀតផង។
និម្មិតសញ្ញាពុទ្ធិសែន នាងកង្រី នៅលើសួនច្បារក្បែរវិមានឯករាជ្យក្រុងកំពង់ឆ្នាំង (រូបថត ថ្ងៃទី១៥ ខែវិច្ឆិកា ឆ្នាំ២០១៣)។ RFA/Chin Chhetha |
ទាក់ទងនឹងរឿងពុទ្ធិសែននាងកង្រី អាជ្ញាធរខេត្តកំពង់ឆ្នាំង ដែលកាលនោះដឹកនាំដោយលោក ភោគ សាមឿន ពីឆ្នាំ១៩៩៣ ដល់ឆ្នាំ១៩៩៨ បានកសាងរូបសំណាកពុទ្ធិសែននាងកង្រីដ៏ធំមួយនៅលើសួនច្បារផ្សារក្រោម។ លុះមកដល់ឆ្នាំ១៩៩៨ ដល់ឆ្នាំ២០០៣ ដែលដឹកនាំដោយលោក ស៊ូ ភារិន្ទ បានផ្លាស់ប្ដូរទីតាំងរូបសំណាកនោះពីផ្សារក្រោមមកនៅលើសួនច្បារក្បែរវិមានឯករាជវិញ៕
1 comment:
to get a nice view of phnom neang kongrey, look from kompong chhnang town. cambodia is a land of waters!
Post a Comment