កម្ពុជា នៅតែ​ពិភាក្សា​ជាមួយ Chevron ជុំវិញ​ការ​ពន្យារពេល​ គម្រោង​យក​ប្រេង​ក្នុង​សមុទ្រ

29 November 2013 ប្រែសម្រួល៖ ដើមអម្ពិល (DAP)

ភ្នំពេញ៖ ប្រភពពីមន្រ្តីឧស្សាហកម្មបានឲ្យដឹងថា ប្រទេសកម្ពុជា នៅតែបន្តពិភាក្សាជាមួយ ក្រុមហ៊ុនប្រេងដ៏ធំមួយរបស់អាម៉េរិក ចំពោះការពន្យារពេល គម្រោងខូងយកប្រេង ដែលនឹងធ្វើឲ្យប្រទេសនេះ ក្លាយជាប្រទេសអភិវឌ្ឍន៍ ឧស្ម័នធ្យូងថ្មដំបូងគេក្នុងតំបន់។

យោងតាមគេហទំព័រ ឌឹណេសិន បានឲ្យដឹងនៅថ្ងៃសុក្រ ទី២៩ ខែវិច្ឆិកា ឆ្នាំ២០១៣ថា នៅក្នុងរបាយណ៍មួយពីទីក្រុង ហូជីមិញ ប្រទេសវៀតណាម កាលពីល្ងាចថ្ងៃព្រហស្បតិ៍ ឧស្សាហកម្មប្រេង Upstream បានឲ្យដឹងថា មន្រ្តីកម្ពុជាបានប្រាប់ទៅក្រុមប្រឹក្សាអាស៊ាន នៅក្នុងសន្និសីទស្តីអំពីប្រេងឥន្ធនៈ (Ascope) ថា ការពិភាក្សាសម្រាប់កម្មវិធីការងារអភិវឌ្ឍន៍ និងសំណើនៃការវិនិយោគ កំពុងដំណើរការ»។

មន្រ្តីរូបនោះបាននិយាយថា «ការអនុញ្ញាតសម្រាប់ផលិតកម្មប្រេងឥន្ធនៈ គឺជាការផ្តល់ឲ្យ និងជាការសម្រេចចិត្ត សម្រាប់ការវិនិយោគចុងក្រោយ បន្ទាប់មកវានឹងត្រូវចំណាយពេលពី ៣៤ ទៅ៣៦ខែ ដើម្បីសម្រេចឡើងជាលើកដំបូងបាន»។

Upstream ក៏បានឲ្យដឹងទៀតថា ក្រុមហ៊ុនប្រេង Chevron បានប្រកាសចំពោះប្លុកពាណិជ្ជកម្ម កាលពីខែសីហា ឆ្នាំ២០១០ ដែលមានរយៈពេល ៨ឆ្នាំ បន្ទាប់ពីទទួលបានពានរង្វាន់ និងឆ្លើយតបនៅខែក្រោយ សម្រាប់អនុញ្ញាតឲ្យមានការជីករកប្រេងឥន្ធនៈ។

កាសែតដែលចុះផ្សាយអំពីប្រេង និងឧស្ម័ន ក៏បានកត់សម្គាល់ដែរថា ការប៉ះពាល់ដល់បរិស្ថាន ត្រូវបានគេវាយតម្លៃរួចរាល់ហើយ ចំណែកក្រុមហ៊ុន Chevron ក៏បានចុះហត្ថលេខាជាបណ្តោះអាសន្នផងដែរ ជាមួយនឹងសេវាអ្នកម៉ៅការ សម្រាប់ប្លុក A កាលពីឆ្នាំមុន៕