ក្រុមសមត្ថកិច្ចឈរការពារតាមបណ្ដាគោលដៅ នារាជធានីភ្នំពេញ នៅថ្ងៃទី១០ ខែធ្នូ ឆ្នាំ២០១៣។ RFA/Ouk Savborey |
ឈានទៅរកស្រុកទេសមានលទ្ធិប្រជាធិបតេយ្យពិតប្រាកដ។
ដោយ ដែន អយុធ្យា RFA 2013-12-10
មន្ត្រីស៊ើបអង្កេតអង្គការលីកាដូ (Licadho) លោក អំ សំអាត ដែលតាមឃ្លាំមើលក្បួនធម្មយាត្រា និងសិទ្ធិយាត្រា ដើម្បីអបអរសាទរទិវាសិទ្ធិមនុស្សអន្តរជាតិខួបលើកទី៦៥ ថ្ងៃទី១០ ខែធ្នូ បានចាត់ទុកភាពស្ងៀមស្ងាត់ ឬមិនកំញើញកម្លាំងរបស់សមត្ថកិច្ចចម្រុះរដ្ឋាភិបាល ក្នុងថ្ងៃទិវាសិទ្ធិមនុស្សអន្តរជាតិឆ្នាំនេះ ថាជាសញ្ញាវិជ្ជមានមួយ។
មន្ត្រីសិទ្ធិមនុស្សរូបនេះបានស្នើឲ្យមេដឹកនាំសមត្ថកិច្ចគ្រប់ស្ថាប័ន ឬកម្លាំងចម្រុះ ឲ្យបន្តអនុវត្តសកម្មភាពអហិង្សានាថ្ងៃអនាគត ដើម្បីចូលរួមលើកកម្ពស់លទ្ធិប្រជាធិបតេយ្យ និងសិទ្ធិមនុស្សពិតប្រាកដនៅកម្ពុជា៖ «អ៊ីចឹងបើសិនជាមានការរារាំង ឬមានការហាមឃាត់ណាមួយ រាជរដ្ឋាភិបាលយើង គឺជារដ្ឋាភិបាលយើងជាម្ចាស់ហត្ថលេខី និងផ្តល់សច្ចាប័នលើកតិកាសញ្ញាស្ដីពីសិទ្ធិពលរដ្ឋ និងសិទ្ធិនយោបាយ ហើយនិងអនុសញ្ញាកតិកាសញ្ញាទាំងឡាយស្តីអំពីសិទ្ធិមនុស្ស។ ហើយរដ្ឋធម្មនុញ្ញបានចែង និងទទួលស្គាល់ទៅទៀត។ បើសិនជាយើងមិនអនុញ្ញាត បានន័យថា យើងមិនទទួលស្គាល់សិទ្ធិមនុស្ស ការគោរពសិទ្ធិមនុស្ស»។
ដូចគ្នាដែរ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងអ្នកស្រី យ៉ោម បុប្ផា សកម្មជនដីធ្លីសហគមន៍បឹងកក់ ស្ថិតក្នុងចំណោមក្រុមអង្គការសង្គមស៊ីវិលច្រើនទៀត ក៏បានអបអរសាទរកម្លាំងចម្រុះមិនប្រើអំពើហិង្សាពេលនេះដែរ។
លោក វន់ ពៅ ជាតំណាងនាំសង្គមស៊ីវិលដើរហែក្បួនធម្មយាត្រា និងសិទ្ធិយាត្រាតាមផ្លូវជាតិលេខ៦អា បានស្នើឲ្យសមត្ថកិច្ចចម្រុះបន្តសកម្មភាពអហិង្សាជាបន្តទៀតនាថ្ងៃអនាគត៖ «ក្រសួងមហាផ្ទៃ ចេញលិខិតមួយមិនអនុញ្ញាតឲ្យយើងដើរហែក្បួនទេ។ ក៏ប៉ុន្តែ ដោយយើងមានៈដើរហែក្បួន ក៏ក្រសួងមហាផ្ទៃ មិនបញ្ជាឲ្យប៉ូលិសមករារាំងយើងដែរ។ អ៊ីចឹង យើងឃើញថា ក្រសួងមហាផ្ទៃ បានយល់ច្រើនពីតម្រូវការរបស់ប្រជាពលរដ្ឋ។ នេះបង្ហាញពីភាពវិជ្ជមានមួយរបស់សមត្ថកិច្ច ឬរដ្ឋាភិបាល ដែលក្រសួងមហាផ្ទៃ បានអនុញ្ញាតឲ្យយើងដើរហែក្បួនមកមុខរដ្ឋសភា។ ប៉ុន្តែ យើងគិតថា នេះជាសិទ្ធិប្រជាពលរដ្ឋ គឺជាសិទ្ធិប្រជារាស្ត្រទូទាំងពិភពលោក ដែលប្រារព្ធទិវាសិទ្ធិមនុស្សអន្តរជាតិ ១០ ធ្នូ។ បើសិនជាអ្នកណាមួយរារាំង បានន័យថា អ្នកនោះកំពុងតែរំលោភច្បាប់។ អ្នកនោះ គឺកំពុងតែបំពានទៅនឹងកតិកាសញ្ញា ឬអនុសញ្ញាផ្សេងៗរបស់អង្គការសហប្រជាជាតិ ស្ដីពីសិទ្ធិមនុស្ស»។
ចំណែក អ្នកស្រី យ៉ោម បុប្ផា ជាតំណាងឲ្យក្បួនធម្មយាត្រា និងសិទ្ធិយាត្រាផ្លូវជាតិលេខ៤ ដែលធ្លាប់ត្រូវសមត្ថកិច្ចវាយបង្ក្រាប និងចាប់ដាក់ពន្ធនាគារ ក៏បានវាយតម្លៃខ្ពស់ចំពោះសកម្មភាពអហិង្សាដ៏កម្ររបស់កម្លាំងចម្រុះ នៅក្នុងទិវាសិទ្ធិមនុស្សអន្តរជាតិ ១០ ធ្នូ៖ «ផ្ញើសារទៅដល់រដ្ឋាភិបាល ព្រោះថា ប្រទេសយើង គឺបានចុះសន្ធិសញ្ញាជាមួយអន្តរជាតិ និងបណ្ដាប្រទេសផ្សេងៗដែរ។ អ៊ីចឹង ខ្ញុំសុំឲ្យរដ្ឋាភិបាលគោរពនូវសិទ្ធិមនុស្ស និងគោរពប្រជាជន កុំយកប្រជាពលរដ្ឋធ្វើជាសត្រូវ។ ហើយសុំឲ្យលុបបំបាត់នូវអំពើហិង្សាទាំងឡាយណា ដែលធ្វើមកលើប្រជាជន។ ជាពិសេស គឺគោរពសិទ្ធិមនុស្សឲ្យបានជាប់លាប់ ជៀសវាងមានតែច្បាប់ ប៉ុន្តែអត់មានអ្នកគោរព»។
កាលពីថ្ងៃទី៨ ខែធ្នូ លោក ស ខេង រដ្ឋមន្ត្រីក្រសួងមហាផ្ទៃ បានចេញលិខិតហាមមិនឲ្យក្រុមអង្គការសង្គមស៊ីវិលនានា ឬបក្សប្រឆាំង ដើរហែក្បួនទៅមន្ទីររដ្ឋសភា ទេនៅថ្ងៃទិវាសិទ្ធិមនុស្សអន្តរជាតិ ១០ ធ្នូ ដោយអនុញ្ញាតឲ្យរៀបចំពិធីនេះនៅវត្តភ្នំ និងនៅសួនមាត់ទន្លេខាងកើតវត្តភ្នំ ពីម៉ោង ៩ព្រឹក ដល់ម៉ោង ១២ថ្ងៃត្រង់។ ប៉ុន្តែ មន្ត្រីអង្គការសង្គមស៊ីវិល មិនបានគោរពតាមទេ។
ទោះជាបែបណា កម្លាំងចម្រុះមានប៉ូលិស កងរាជអាវុធហត្ថ និងកម្លាំងបង្ក្រាបបាតុកម្មជាដើម មិនបានប្រើហិង្សាវាយបង្ក្រាបទៅលើព្រះសង្ឃ ប្រជាពលរដ្ឋ និងក្រុមអង្គការសង្គមស៊ីវិល ដើរហែក្បួនទៅមុខរដ្ឋសភា ទេ។ ក៏ប៉ុន្តែ កម្លាំងទាំងនេះបានដាក់ពង្រាយនៅជិតបរិវេណមន្ទីររដ្ឋសភា ប៉ុន្តែមិនបានបង្ហាញសព្វាវុធ ដំបងឆក់ ឬខែលជាដើមជាសាធារណៈទេ ដោយបានរក្សាទុកក្នុងរថយន្ត ឬក្នុងស្រោមសុវត្ថិភាព។
ទិវាសិទ្ធិមនុស្សអន្តរជាតិខួបទី៦៥ ឆ្នាំនេះ ក្រោមប្រធានបទ «យើងទាំងអស់គ្នាលើកស្ទួយ និងការពារយុត្តិធម៌សង្គម»៕
2 comments:
CHANGE! CHANGE! CHANGE!
CHANGE what?????????????????????????
Stupid...Stupid talk.
Post a Comment