សមត្ថកិច្ច​បញ្ជូន​ឆ្មាំ​យាម​ភ្នំ​ព្រះរាជ​ទ្រព្យ​ទៅ​ស្នងការដ្ឋាន​នគរបាល​ខេត្ត​កណ្ដាល

១២-ធ្នូ-២០១៣៖ ព្រះ​សក្យមុនីចេតិយ​ដែល​ស្ថិត​នៅ​ក្នុង​ឃុំ​ផ្សារដែក
ស្រុក​ពញាឮ ខេត្ត​កណ្ដាល។ RFA/Vann Vichar

សមត្ថកិច្ច​ក្នុង​ខេត្ត​កណ្ដាល នៅ​ពុំ​ទាន់​សម្រេច​យ៉ាង​ណា​នៅ​ឡើយ​ចំពោះ​ឆ្មាំ​យាម​ភ្នំ​ព្រះរាជ​ទ្រព្យ​ចំនួន ៦​នាក់ ដែល​សង្ស័យ​ថា មាន​ពាក់ព័ន្ធ​នឹង​ការ​បាត់​កោដ្ឋ​មាស​តម្កល់​ព្រះ​សារីរិកធាតុ​ព្រះពុទ្ធ បើ​ទោះ​បី​ជា​ពួក​គេ​ត្រូវ​បាន​សមត្ថកិច្ច​បញ្ជូន​ខ្លួន​ទៅ​ស្នងការដ្ឋាន​នគរបាល​ខេត្ត​នេះ ដើម្បី​សាកសួរ​បន្ត។

ដោយ យាង សុជាមេត្តា RFA 2013-12-13

អ្នក​នាំ​ពាក្យ​អគ្គស្នងការដ្ឋាន​នគរបាល​ជាតិ លោក គៀត ច័ន្ទថារិទ្ធ បាន​អោយ​ដឹង​នៅ​ថ្ងៃ​ទី​១៣ ធ្នូ ថា សមត្ថកិច្ច​កំពុង​បន្ត​សាកសួរ និង​ធ្វើ​ការ​ស៊ើប​អង្កេត​អំពី​បញ្ហា​នេះ។ លោក គៀត ច័ន្ទថារិទ្ធ ស្នើសុំ​មិន​ធ្វើ​អត្ថាធិប្បាយ​អោយ​បាន​លម្អិត​អំពី​រឿង​នេះ​ទេ ដោយ​លោក​មាន​ប្រសាសន៍​ថា ទុក​ពេល​អោយ​សមត្ថកិច្ច​ធ្វើ​ការ​សិន។ លោក​ថា របស់​ដែល​បាន​បាត់​បង់​នោះ​មាន កោដ្ឋ​សម្រាប់​តម្កល់​ព្រះ​សារីរិកធាតុ​របស់​ព្រះពុទ្ធ និង​ព្រះពុទ្ធ​បដិមា​តូចៗ​មួយ​ចំនួន​ទៀត​ផង។

លោក គៀត ច័ន្ទថារិទ្ធ៖ «យើង​ឃាត់​ខ្លួន​គាត់​បណ្ដោះ​អាសន្ន ដើម្បី​សួរ​នាំ​គាត់​ទេ យើង​មិន​ទាន់​ដឹង​ថា​ម៉េច​ទេ ចាំ​មើល​លទ្ធផល​ចុង​ក្រោយ​ណា។ យើង​ទុក​ឱកាស​អោយ​អ្នក​ធ្វើ​ការ​គ្នា​ធ្វើ​ការ​សិន​ណា បាន​ធ្វើ​ហើយ កំពុង​បន្ត​ដោយ​ហ្មត់ចត់ ដោយ​ដុត​ដៃ​ដុត​ជើង ដោយ​យក​ចិត្ត​ទុក​ដាក់»។

កាល​ពី​ថ្ងៃ​ទី​១១ ខែ​ធ្នូ សមត្ថកិច្ច​ស្រុក​ពញាឮ បាន​សាកសួរ​ឆ្មាំ និង​អ្នក​ពាក់ព័ន្ធ​ចំនួន ១៣​នាក់ ទាក់ទង​នឹង​ព័ត៌មាន​នៃ​ការ​បាត់​បង់​កោដ្ឋ​មាស​តម្កល់​ព្រះ​សារីរិកធាតុ និង​វត្ថុ​មាន​តម្លៃ​មួយ​ចំនួន​ទៀត ប៉ុន្តែ​មាន​តែ ៦​នាក់​ទេ​ដែល​ត្រូវ​ឃាត់​ខ្លួន ដើម្បី​បន្ត​ការ​សាកសួរ។

ព្រះ​សក្យមុនីចេតិយ​ដែល​ស្ថិត​នៅ​ក្នុង​ឃុំ​ផ្សារដែក ស្រុក​ពញាឮ ខេត្ត​កណ្ដាល ត្រូវ​ចោរ​លួច​គាស់​យក​សម្ភារៈ​មាន​តម្លៃ កាល​ពី​យប់​ថ្ងៃ​ទី​៩ ឈាន​ចូល​ថ្ងៃ​ទី​១០ ខែ​ធ្នូ។ ព្រះ​សក្យមុនីចេតិយ​នេះ​ជា​ទី​តម្កល់​ព្រះ​សារីរិកធាតុ​របស់​ព្រះសម្មាសម្ពុទ្ធ ដែល​ដាក់​នៅ​ក្នុង​កោដ្ឋ​ធ្វើ​ពី​មាស និង​ព្រះពុទ្ធ​បដិមា​អំពី​មាស សំរឹទ្ធ និង​លង្ហិន ដែល​មាន​តម្លៃ​រាប់​ពាន់​ដុល្លារ និង​មាន​មន្ត្រី​ឆ្មាំ​យាម​ជា​ច្រើន​នាក់ ត្រូវ​គេ​ដាក់​ពង្រាយ​ដើម្បី​ការពារ​សន្តិសុខ និង​សុវត្ថិភាព​នៅ​ទីនោះ៕