កម្មការិនី​៣​នាក់​ត្រូវ​បាញ់​ឲ្យ​របួស​ក្នុង​ពេល​តវ៉ា

២០-កុម្ភៈ-២០១២៖ កម្មការិនី​ដែល​ត្រូវ​ជន​មិន​ស្គាល់​មុខ​បាញ់​ក្នុង​ពេល​កំពុង​តវ៉ា សម្រាក​ព្យាបាល​របួស​នៅ​មន្ទីរពេទ្យ​ខេត្ត​ស្វាយរៀង។ (Adhoc Photo)

2012-02-20
ដោយ សុ ជីវី និង ខែ សុណង
Radio Free Asia

នៅ​ព្រឹក​ថ្ងៃ​ទី​២០ ខែ​កុម្ភៈ ឆ្នាំ​២០១២ កម្មករ​រាប់​ពាន់​នាក់​បម្រើ​ការ​ក្នុង​រោងចក្រ​ចំនួន ៣ នៅ​តំបន់​សេដ្ឋកិច្ច​ពិសេស​ម៉ាន់ហាថាន់ ក្នុង​ក្រុង​បាវិត ខេត្ត​ស្វាយ​រៀង បាន​នាំ​គ្នា​ធ្វើ​កូដកម្ម​ទាមទារ​ដំឡើង​ប្រាក់​រង្វាន់ និង​ប្រាក់​ថ្លៃ​បាយ។

ការ​តវ៉ា​បាន​នោះ​ក្លាយ​ជា​អំពើ​ហិង្សា ដោយ​ក្រុម​កម្មករ​បាន​ចោល​ដុំ​ថ្ម​ទៅ​លើ​អគារ​រោងចក្រ។ ភ្លាមៗ​នោះ​មាន​ជន​មិន​ស្គាល់​មុខ​បាន​បាញ់​ជា​ច្រើន​គ្រាប់​ទៅ​ក្រុម​អ្នក​តវ៉ា​ធ្វើ​​កម្មករ​មួយ​ចំនួន​បណ្ដាល​ឲ្យ​របួស។

ការ​​បាញ់​រះ​​​​​ទៅ​លើ​ហ្វូង​កម្មករ​ពី​សំណាក់​ជន​មិន​ស្គាល់​មុខ បាន​បណ្តាល​​កម្មការិនី ៣​នាក់​នៅ​រោងចក្រ​​​ផលិត​ស្បែកជើង​កៅវ៉េ (Kaoway) បាន​រង​របួស។ ពួកគេ​ត្រូវ​បាន​ដឹក​ទៅ​សម្រាក​ព្យាបាល​នៅ​មន្ទីរ​ពេទ្យ ចំនួន ២​ក្នុង​ក្រុង​បាវិត និង​នៅ​មន្ទីរពេទ្យ​ខេត្ត​ស្វាយរៀង។


មន្ត្រី​សមាគម​ការពារ​សិទ្ធិ​មនុស្ស​អាដហុក (Adhoc) លោក ប្រាក់ សារ៉ាន់ អោយ​ដឹង​ថា បន្ទាប់ពី​បាន​ចុះ​ស៊ើប​អង្កេត​ លោក​រក​ឃើញ​ថា ក្រុម​កម្មករ​បាន​និយាយ​ខុសៗ​គ្នា​ពី​ចំនួន​អ្នក​រង​របួស។ ក្រោយ​ពី​បាន​ចុះ​ដល់​មន្ទីរពេទ្យ លោក​បាន​រក​ឃើញ​ថា មាន​កម្មការិនី​ចំនួន​នាក់​បាន​រង​របួស។

លោក ប្រាក់ សារ៉ា៖ «មិន​ហៅ​ថា សមត្ថកិច្ច​ទេ​ហៅ​ថា ជ​ន​ដៃ​ដល់​ដែល​កាន់​កាំភ្លើង​នេះ​ចុះ ព្រោះ​អី​យើង​មិន​ទាន់​ដឹង​ទេ​ថា អ្នក​ដែល​បាញ់​នោះ​ជា​​ប៉ូលិស ជា​សន្តិសុខ ឬ​ជា​អង្គរក្ស​របស់​អ្នក​ណា ដោយសារ​ខ្ញុំ​មិន​ទាន់​បាន​ការ​បំភ្លឺ​ពី​សមត្ថកិច្ច​នៅ​ឡើយ»។

កម្មការិនី​ទាំង ៣​នាក់ មាន​ឈ្មោះ ក្រូច ចិន្តា របួស​ធ្ងន់ ដោយ​ត្រូវ​គ្រាប់​ចំ​ខាង​លើ​ដោះ​ឆ្វេង​ធ្លាយ​ទៅ​ក្រោម​ឃ្លៀក​ខាង​ឆ្វេង កៅ នី រង​របួស​ដៃ​ស្តាំ និង នុត សុខុម របួស​ដៃ​ស្តាំ​ និង​ខ្នង។

កម្មការិនី​ម្នាក់​ដែល​បាន​ឃើញ​ហេតុការណ៍​បាន​និយាយ​ដោយ​លាក់​ឈ្មោះ​ថា នៅ​ពេល​ការ​តវ៉ា​បាន​ផ្ទុះ​អំពើ​ហិង្សា ក្រុម​នគរបាល​ត្រូវ​គេ​បញ្ជូន​មក​បង្រ្កាប។ ស្រប​គ្នា​នោះ​មាន​បុរស​មិន​ស្គាល់​មុខ​បាន​ដក​កាំ​ភ្លើង​ខ្លី​បាញ់​រះ​លើក្រុម​កម្មករ ដែល​ប៉ុន​ប៉ង​ចូល​លាក់​ខ្លួន​ក្នុង​បន្ទប់​ទឹក។

កម្មការិនី​មិន​បញ្ចេញ​ឈ្មោះ៖ «ចូល​ទៅ​ទាំង​អស់​គ្នា តែ​ពួក​ខ្ញុំ​ទាំង​បី​នាក់​ហ្នឹង​ចូល​បន្ទប់​ទឹក ដល់​ហើយ​មាន​មនុស្ស​ម្នាក់​ចុះ​ពី​លើ​ឡាន​មក ទាញ​កំាំភ្លើង​បាញ់ ហើយ​ខ្ញុំ​មិន​ដឹង​ប៉ូលិស​អី​ពី​ណា​មិន​ដឹង​ទេ គ្រាន់​ដឹង​ថា ពាក់​អាវ​អង្គរក្ស ឆែកៗ។ បាញ់​ហ្នឹង​នៅ​ខាង​ក្រោយ​ខ្នង​ខ្ញុំ មី​កូន​ចូល​បន្ទប់​ទឹក​ជាមួយ​ខ្ញុំ​ហ្នឹង។ ខ្ញុំ​ក្រឡេក​ទៅ​ឃើញ​វា​ដួល​ហើយ ងាក​ទៅ​មីកូន​មួយ​ទៀត​ត្រូវ​ដៃ»។

វិទ្យុ​អាស៊ី​សេរី​មិន​អាច​សុំ​​ការ​អធិប្បាយ​ពី​ស្នងការ​នគរបាល​ខេត្ត​ស្វាយរៀង លោក ប្រាជ រឹម បាន​ទេ​នៅ​ថ្ងៃ​​ទី​២០ កុម្ភៈ។ ចំណែក​ស្នង​ការ​រង​លោក លឹក ចំរើន អះអាង​ថា សមត្ថកិច្ច​កំពុង​ធ្វើ​ការ​លើ​ករណី​នេះ។

លោក ជាង អំ អភិបាល​ខេត្ត​ស្វាយរៀង មាន​ប្រសាសន៍​ថា ការ​បាញ់​ប្រហារ​នោះ​បង្ក​ដោយ​ជន​មិន​ស្គាល់​មុខ​ដែល​មិន​មែន​ជា​មន្ត្រី​កំលាំង​សមត្ថកិច្ច​ឡើយ៖ «អ្នក​ដែល​ទៅ​ផ្ទាល់​ហ្នឹង ប៉ូលិស​គ្មាន​ហ៊ាន​បាញ់​ទេ។ ​ឥឡូវ​គ្រាប់​ដែល​កាំភ្លើង​បាញ់​ហ្នឹង​មិន​មែន​គ្រាប់​របស់​ប៉ូលិស​ទេ។ ប៉ូលិស​កាន់​កាំ​ភ្លើង​អាកា ហើយ​គ្រាប់​ដែល​បាញ់​ប្រជាពលរដ្ឋ​របួស​​នោះ​មិន​មែន​អាកា​ផង»។

ក្រុម​កម្មករ​បញ្ជាក់​ថា ពួក​គេ​ជាង ៣.០០០​នាក់ ធ្វើ​ការ​ក្នុង​រោង​ចក្រ​ចំនួន​៣ បាន​តវ៉ា​ជា​ច្រើន​ថ្ងៃ​មក​ហើយ ដោយ​មិន​ចូល​ធ្វើ​ការ និង​ដុត​កង់​ឡាន​នៅ​ក្នុង​រោងចក្រ ដើម្បី​អោយ​ភាគី​ថៅកែ​រោងចក្រ​ដំឡើង​ប្រាក់​រង្វាន់​ទៀង​ទាត់ និង​ប្រាក់​ថ្លៃ​បាយ​ថ្ងៃ​ត្រង់។ ពួក​គេ​ទាម​ទារ​ប្រាក់​រង្វាន់​ចំនួន ១០ដុល្លារ​ក្នុង​មួយ​ខែ និង​ថ្លៃ​បាយ​ថ្ងៃ​ត្រង់​ចំនួន ២.០០០​រៀល។

រោងចក្រ​ទាំង​បី​នោះ​ស្ថិត​ក្នុង​តំបន់​សេដ្ឋកិច្ច​ពិសេស​ក្រុង​បាវិត មាន​ឈ្មោះ កៅវ៉េ (Kaoway) ឃីងម៉ាកឃើរ ហ្វូតវែ (Kingmaker Footwear) និង ហ្សីកូ (Sheico)។


ក្រុម​សហជីព​ថ្កោល​ទោស​ការ​បាញ់​ប្រហារ​ទៅ​លើ​កម្មករ

ក្រុម​សហព័ន្ធ​សហជីព​ចំនួន​៦ បាន​ថ្កោល​ទោស​ចំពោះ​ករណី​បាញ់​ប្រហារ​ទៅ​លើ​កម្មករ​រោងចក្រ​ផលិត​ស្បែកជើង​កៅវ៉េ (Kaoway) ក្រុង​បាវិត ខេត្ត​ស្វាយរៀង កាល​ពី​ថ្ងៃ​ទី​២០ កុម្ភៈ ឆ្នាំ​២០១២ ថា ជា​ទង្វើ​ព្រៃផ្សៃ និង​រំលោភ​សិទ្ធិ​មនុស្ស​យ៉ាង​ធ្ងន់ធ្ងរ។

ក្រុម​សហព័ន្ធ​សហជីព​ទាំង​នោះ​បាន​ចេញ​សេចក្ដី​ថ្លែងការណ៍​រួម​មួយ​ភ្លាមៗ បន្ទាប់​ពី​មាន​ការ​បាញ់​ប្រហារ មក​លើ​កម្មករ​ដែល​បាន​តវ៉ា​លក្ខខណ្ឌ​ការងារ​នៅ​ក្នុង​រោងចក្រ​ឲ្យ​រង​របួស​ជា​ច្រើន​នាក់។ ក្នុង​សេចក្ដី​ថ្លែងការណ៍​ដដែល​ក៏​បាន​ជំរុញ​ឲ្យ​អាជ្ញាធរ​ខេត្ត​ស្វាយរៀង ទទួល​ខុស​ត្រូវ ហើយ​ចាប់​ជន​ដៃ​ដល់​មក​ផ្ដន្ទាទោស​ឲ្យ​បាន​ឆាប់ និង​បញ្ឈប់​ជា​បន្ទាន់​នូវ​ការ​ប្រើ​អំពើ​ហិង្សា​មក​លើ​កម្មករ។

ស្រប​គ្នា​នេះ​ដែរ​អ្នក​នយោបាយ សហជីព សង្គម​ស៊ីវិល អ្នក​ធ្វើ​ការ​ពាក់​ព័ន្ធ​សិទ្ធិ​ការ​ងារ​បាន​ចុះ​ទៅ​អង្កេត​ដល់​កន្លែង​កើត​ហេតុ ដើម្បី​ចូល​រួម​ស៊ើប​អង្កេត​ពី​ការ​បាញ់​ប្រហារ​នេះ។

ជន​រងគ្រោះ​ម្នាក់​ក្នុង​ចំណោម ៣​នាក់​ដែល​របួស​ធ្ងន់​ជាង​គេ​ក្នុង​ព្រឹត្តិការ​បាញ់​នោះ គឺ​កម្មការិនី ក្រូច ចិន្តា ត្រូវ​បាន​គេ​បញ្ជូន​មក​កាន់​មន្ទីរ​ពេទ្យ​ក្រុង​ភ្នំ​ពេញ ដើម្បី​សង្គ្រោះ​បន្ទាន់។

លោក ជាង អំ អភិបាល​ខេត្ត​ស្វាយរៀង បាន​ជួយ​ឧបត្ថម្ភ​ប្រាក់​ដល់​កម្មការិនី​រងគ្រោះ​ទាំង​បី​នាក់​នោះ ក្នុង​ម្នាក់​ចំនួន ៥០​ម៉ឺន​រៀល។

សង្គម​ស៊ីវិល​ដែល​រួម​មាន​អង្គការ​សិទ្ធិ​មនុស្ស បាន​ចាត់​ទុក​ការ​បាញ់​ប្រហារ​បែប​នេះ​ថា ជា​គំរូ​ថ្មី​មួយ​ទៀត នៃ​ការ​គម្រាម​កំហែង​ទៅ​លើ​ពលរដ្ឋ​ក្នុង​ការ​ទាម​ទារ​សិទ្ធិ​សេរី​ភាព។ ជាមួយ​គ្នា​នេះ​បាន​អំពាវ​នាវ​ដល់​ក្រសួង​ការងារ ម្ចាស់​ក្រុមហ៊ុន​ផលិត និង​ក្រុមហ៊ុន​បញ្ជា​ទិញ ត្រូវ​ដោះ​ស្រាយ​ជា​បន្ទាន់​នូវ​រាល់​សំណូម​ពរ​របស់​កម្មករ ហើយ​ទទួល​ខុស​ត្រូវ​ចំពោះ​ការ​បាញ់​ប្រហារ​លើ​ពួក​គេ៕