ជោរ សែន គ្មានសង្ឃឹមថារបាយការណ៍របស់ អង្គការ សហប្រជាជាតិនឹងបន្ទរថាហៃអើៗ តាមខ្លួន បានឡើយ

តេជោ គ្មានជំនឿថានឹង មានរបាយការណ៍ល្អពីបញ្ហាសិទ្ធិមនុស្ស

Sunday, 07 October 2012
ដោយ៖ ដើមអម្ពិល​(DAP)​​​

ភ្នំពេញ៖ នាយករដ្ឋមន្រ្តីនៃប្រទេសកម្ពុជា បានថ្លែងអះអាងជាថ្មី ថា សម្តេចគ្មានជំនឿទៅលើរបាយការណ៍របស់ អង្គការសហប្រជាជាតិដែលនឹង និយាយល្អពីកម្ពុជានោះទេ ដោយសារតែមានអ្នករាយ ការណ៍ម្នាក់មិនដែល ធ្វើរបាយការណ៍លើកសរសើរពីកម្ពុជាទេ មានតែចោទប្រកាន់មកកម្ពុជាថា ជាប្រទេសបំបិទសេរីភាពបញ្ចេញមតិ។

នៅព្រឹកថ្ងៃអាទិត្យ ទី៧ ខែតុលា ឆ្នាំ២០១២ សម្តេចនាយករដ្ឋមន្រ្តី ហ៊ុន សែន ក្នុងឱកាសអញ្ជើញជា អធិបតីភាពដ៏ខ្ពង់ខ្ពស់ នៅក្នុងពិធីចែក ប័ណ្ណកម្មសិទ្ធដីធ្លី ជូនប្រជាពលរដ្ឋ នៅឃុំបន្ទាយឆ្មា ស្រុកថ្មពួក ខេត្តបន្ទាយមានជ័យថា ប្រទេសកម្ពុជាគ្មានភ័ព្វសំណាងបានទទួលការកោតសរសើរពីអង្គការនៅក្រៅប្រទេសក៏ដូចជាអង្កការក្រៅរដ្ឋាភិបាល លើផ្នែកសិទ្ធិមនុស្សនោះទេ ព្រោះពួកគេ​ សំឡឹងមកកម្ពុជាឃើញតែចំណុចអវិជ្ជមាន ហើយចំពោះចំណុចវិជ្ជមាន ពួកគេមើលមិនឃើញនោះទេ។ប្រសិនបើជាពួកគេមិនធ្វើ របាយការណ៍ អាក្រក់នោះ នឹងមិនទទួលបានជំនួយមកផ្គត់ផ្គង់លើក្រុមរបស់ខ្លួនឡើយ។


សម្តេចបញ្ជាក់ថា “បើគេរាយការណ៍ល្អពីសិទ្ធិមនុស្សកម្ពុជាមានន័យថាអាអង្គការធ្វើការផ្នែកសិទ្ធិមនុស្ស វាអស់ការងារធ្វើ អីចឹងវាបានប្រាក់ខែមកពីណាទៀត ទម្រាំតែបានការងារធ្វើ មិនមែនងាយទេ “។
សម្តេច បន្តថា សម្តេចគ្មានសង្ឃឹមថា កម្ពុជានឹងទទួលបានរបាយការណ៍ល្អស្តី ពីស្ថានភាពសិទ្ធិមនុស្ស នៅកម្ពុជាទេ។

សម្តេចបន្តថា “បើរាយការណ៍ល្អកម្ពុជាមែននោះ បានសេចក្តីថា មន្រ្តីសិទ្ធិមនុស្សទាំងបរទេសទាំងក្នុង ស្រុកអស់ការងារធ្វើហើយ អីចឹងគេបានប្រាក់ខែមកពីណា អីចឹងទេត្រូវរាយការណ៍អាក្រក់ពីកម្ពុជា ដើម្បីបានទទួលជំនួយបន្ត”។

សម្តេចបន្ថែមទៀតថា នៅថ្ងៃទី៧ ខែតុលានេះ សម្តេចចុះមកចែកប័ណ្ណកម្មសិទ្ធិដីធ្លីឲ្យប្រជាពលរដ្ឋ ប្រហែលជាគេហៅថា ជាអ្នកបំពានសិទ្ធិមនុស្ស។កម្ពុជាមិនចាំបាច់សង្ឃឹមលើគេទេ កម្ពុជាសង្ឃឹមលើខ្លួន ឯវិញល្អជាង ហើយការចោទប្រកាន់នៅលើក្រដាសរបស់គេនោះជារឿងរបស់គេ សំខាន់លើខ្លួនយើង ជាអ្នកធ្វើទេ៕