អ្នក​ឃ្លាំមើល​បញ្ហា​ព្រៃឈើ​អំពាវនាវ​ឲ្យ​អាជ្ញាធរ​ចាត់​វិធានការ​​លើ​អ្នក​កាប់​រាន​ព្រៃ

http://www.youtube.com/watch?v=iseMOV_YJL4&feature=youtu.be

ដោយ រដ្ឋា វីសាល 2013-01-13 RFA

ច្រើន​ឆ្នាំ​កន្លង​ទៅ​នេះ អាជ្ញាធរ​ខេត្ត​រតនគិរី ទទួល​ស្គាល់​ថា ដី​ព្រៃ​ឈើ​រាប់​ម៉ឺន​ហិកតារ ត្រូវ​បាន​គេ​កាប់​រាន​ដើម្បី​យក​ដី បើ​ទោះ​បី​ច្បាប់​ព្រៃ​ឈើ​បាន​ចែង​ថា      នេះ​ជា​ករណី​រំលោភ​ច្បាប់​យ៉ាង​ណា​ក្ដី។

នៅ​ស្រុក​អណ្ដូងមាស មាន​សេចក្ដី​រាយការណ៍​ថា តំបន់​ព្រៃ​ឈើ​បន្ថែម​ទៀត នឹង​ត្រូវ​គេ​កាប់​រាន​នៅ​ពេល​ខាង​មុខ​នេះ ដើម្បី​យក​ដី​ធ្វើ​ជា​កម្មសិទ្ធិ ប្រសិន​បើ​ក្រុម​អាជ្ញាធរ​ពាក់ព័ន្ធ​មិន​ចាត់​វិធានការ​ទប់​ស្កាត់​ទាន់​ពេល ​វេលា​នោះ​ទេ។

អ្នក​ឃ្លាំមើល​បញ្ហា​ព្រៃ​ឈើ​ខេត្ត​រតនគិរី អំពាវនាវ​ឲ្យ​មន្ត្រី​ជំនាញ និង​អាជ្ញាធរ​មូលដ្ឋាន ចាត់​វិធានការ​ទប់ស្កាត់​ជា​បន្ទាន់​ចំពោះ​ចលនា​លក់​ដី​តំបន់​ព្រៃ​ឈើ និង​គម្រោងការ​កាប់​រាន​ព្រៃ​រំលោភ​ច្បាប់ ដើម្បី​យក​ដី​ជា​កម្មសិទ្ធិ។
អ្នក​សម្របសម្រួល​សមាគម​ការពារ​សិទ្ធិ​មនុស្ស និង​អភិវឌ្ឍន៍ ហៅ​កាត់​ថា អាដហុក (ADHOC) ប្រចាំ​ខេត្ត​រតនគិរី លោក ឆាយ ធី នៅ​ថ្ងៃ​អាទិត្យ ទី​១៣ ខែ​មករា ឆ្នាំ​២០១៣ ឲ្យ​ដឹង​ថា ដី​តំបន់​ព្រៃ​ឈើ​នៅ​សង​ខាង​ផ្លូវ​ធ្វើ​ដំណើរ​ពី​ស្ពាន​ដែក​ឆ្លង​ទន្លេ​ សេសាន ក្នុង​ឃុំ​ញ៉ាង ស្រុក​អណ្ដូងមាស ប្រមាណ ៣​គីឡូម៉ែត្រ ត្រូវ​គេ​ចូល​ទៅ​បោះ​បង្គោល​ចាប់​យក​លើ​ដី​ព្រៃ បន្ទាប់​ពី​លោក​នាយករដ្ឋមន្ត្រី ហ៊ុន សែន អញ្ជើញ​ទៅ​សម្ពោធ​ស្ពាន​ឆ្លង​កាត់​ទន្លេ​នេះ​កាល​ពី​ថ្ងៃ​ទី​៧ ខែ​ធ្នូ ឆ្នាំ​២០១២។
លោក​បន្ត​ថា ដី​ព្រៃ​នៅ​តំបន់​នោះ ត្រូវ​គេ​លក់​ដូរ​ដោយ​គ្មាន​អាជ្ញាធរ​មូលដ្ឋាន​ទទួល​ស្គាល់​ហើយ​នៅ​រដូវ​ ប្រាំង​នេះ ព្រៃ​ឈើ​នោះ​នឹង​ត្រូវ​គេ​កាប់​ដុត​រាន ប្រសិន​មន្ត្រី​ជំនាញ និង​មន្ត្រី​មូលដ្ឋាន មិន​យក​ចិត្ត​ទុក​ដាក់​ទប់​ស្កាត់៖ «ក្នុង​រដូវ​ ប្រាំង​នេះ ចលនា​កាប់​រាន​ដី​ព្រៃ​សឹង​កើត​មាន​ទូទាំង​ខេត្ត​តាម​ព័ត៌មាន យើង​ក្ដាប់​បាន។ អ៊ីចឹង​សូម​ឲ្យ​ស្ថាប័ន​ជំនាញ​ព្រៃ​ឈើ និង​អាជ្ញាធរ​ខេត្ត​លោក​មេត្តា​ចាត់​វិធានការ​ឲ្យ​បាន​តឹងរ៉ឹង ចៀស​វាង​ការ​កាប់​រាន​ព្រៃ​ដោយ​អនាធិបតេយ្យ»។
អាជ្ញាធរ​ស្រុក​អណ្ដូងមាស ឲ្យ​ដឹង​ថា ផ្លូវ​ចាប់​ពី​គល់​ស្ពាន​ឆ្លង​ទន្លេ​សេសាន ក្នុង​ភូមិ​កាជូត ឃុំ​ញ៉ាង គឺ​ជា​គម្រោង​អភិវឌ្ឍន៍​ផ្លូវ​របស់​អាជ្ញាធរ​ស្រុក តាម​រយៈ​ជំនួយ​សាងសង់​របស់​ក្រុមហ៊ុន​សម្បទាន​សេដ្ឋកិច្ច ទ្រីភាព នីហរណ អាហរណ។ ផ្លូវ​នេះ​ត​ភ្ជាប់​ពី​ទី​រួម​ស្រុក​អណ្តូងមាស ទៅ​តំបន់​ព្រំដែន​ប្រទេស​វៀតណាម ក្នុង​ភូមិ​ចង និង​ភ្ជាប់​ទៅ​ឧទ្យានជាតិ​វីរជ័យ រហូត​ដល់​ចំណុច​កន្ទុយ​នាគ តំបន់​ត្រីកោណ​អភិវឌ្ឍន៍​បី​ប្រទេស គឺ​ប្រទេស​ឡាវ វៀតណាម និង​កម្ពុជា។
វិទ្យុ​អាស៊ីសេរី​មិន​អាច​ទាក់ទង​មេ​ឃុំ​ញ៉ាង លោក រចំ សឿន សុំ​អធិប្បាយ​ពី​ករណី​នេះ​បាន​ទេ។ យ៉ាង​នេះ​ក្តី អភិបាល​ស្រុក​អណ្ដូងមាស លោក នង ដារិទ្ធ មាន​ប្រសាសន៍​បញ្ជាក់​ថា ដី​ព្រៃ​នៅ​តំបន់​នោះ​ឋិត​ក្រោម​ការ​គ្រប់គ្រង​របស់​សហគមន៍​ជនជាតិ​ដើម​ភាគ​ តិច​ភូមិ​កាជូត។
លោក​បន្ត​ថា អ្នក​ចូល​ទៅ​បោះ​បង្គោល​របង​ហ៊ុមព័ទ្ធ​ដី​ព្រៃ​នោះ អាជ្ញាធរ​មិន​បាន​អនុញ្ញាត​ទេ ក៏​ប៉ុន្តែ​ប្រសិន​ជន​ណា​ហ៊ាន​កាប់​រាន​ព្រៃ​នោះ គឺ​ជា​ការ​កាប់​រាន​ព្រៃ​ឈើ​ខុស​ច្បាប់៖ «បើ​ថា គាត់​គ្រាន់​តែ​លក់​ទិញៗ មិន​ដឹង​ម៉េច​គាត់​ផ្ទេរ​គ្នា​តាម​រឿង​របស់​គាត់ ប៉ុន្តែ​បើ​ថា កាប់​យើង​ចាប់​តែម្ដង។ មាន​ច្បាប់​ឯ​ណា​ឲ្យ​កាប់​ព្រៃ។ បើ​ត្រឹម​តែ​លក់​ស្ងាត់ៗ ពី​ណា​ទៅ​ដឹង​ពួកគាត់»។
នាយ​ផ្នែក​នៃ​ខណ្ឌ​រដ្ឋបាល​ព្រៃ​ឈើ​ទទួល​បន្ទុក​ស្រុក​អណ្ដូងមាស លោក ឡេង យុគ មាន​ប្រសាសន៍​បញ្ជាក់​ថា ដី​ព្រៃ​នៅ​តំបន់​នោះ​ក្រសួង​កសិកម្ម​បាន​ផ្ដល់​ជា​ដី​សម្បទាន​ដល់​ ក្រុមហ៊ុន ដើម្បី​វិនិយោគ​ដំណាំ​កសិឧស្សាហកម្ម ដូច្នេះ​មិន​អាច​នរណា​ម្នាក់​ទៅ​លក់​ដូរ ឬ​កាន់​កាប់​ដី​នោះ​បាន​ឡើយ។ លោក​បន្ត​ថា នឹង​ចាត់​មន្ត្រី​ជំនាញ​ទៅ​ពិនិត្យ​មើល​ករណី​នេះ៖ «ខ្ញុំ​ អត់​ទាន់​បាន​ដឹង​ទេ ចាំ​មើល​ឲ្យ​ខាង​សង្កាត់​គេ​ចុះ​ស៊ើប​អង្កេត​សិន​មើល៍ បើ​សិន​ឮ​បែប​ហ្នឹង។ ប៉ែក​ខាង​ហ្នឹង​ភាគ​ច្រើន​ដី​ក្រុមហ៊ុន​អស់​ហើយ​ណា!»។
អភិបាល​ខេត្ត​រតនគិរី បាន​ផ្សព្វផ្សាយ​ជូន​ដំណឹង​ដល់​ប្រជាពលរដ្ឋ​ហាម​មិន​ឲ្យ​កាប់​រាន​ព្រៃ​ឈើ ទ្រព្យ​សម្បត្តិ​សាធារណៈ​របស់​រដ្ឋ​យក​ដី​ជា​កម្មសិទ្ធិ​ត​ទៅ​ទៀត​ទេ ហើយ​ក្រុម​អាជ្ញាធរ​នឹង​ចាត់​វិធានការ​តាម​ផ្លូវ​តុលាការ ចំពោះ​ជន​ណា​នៅ​តែ​បន្ត​កាប់​រាន​ព្រៃ​ឈើ។
ចាប់​ពី​ខែ​តុលា ឆ្នាំ​២០១២ រហូត​បច្ចុប្បន្ន របាយការណ៍​របស់​មន្ត្រី​ខណ្ឌ​រដ្ឋបាល​ព្រៃ​ឈើ​ខេត្ត​រតនគិរី បាន​ឲ្យ​ដឹង​ថា មាន​ប្រជាពលរដ្ឋ​ខ្មែរ និង​ពលរដ្ឋ​វៀតណាម​ជិត ២០​នាក់ ត្រូវ​បាន​ចាប់​ខ្លួន និង​ចោទ​ប្រកាន់​តាម​ផ្លូវ​តុលាការ​ពី​បទ​កាប់​ព្រៃ​ឈើ​ខុស​ច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។