បទអន្តរាគមន៏ លោក សម រង្ស៊ី ក្នុងឱកាសពិធីបុណ្យខួបឆ្នាំទី១៦ នៃព្រឹត្តិ ការណ៏គប់គ្រាប់បែកនៅទីក្រុងភ្នំពេញ កាលពីថ្ងៃទី៣០ ខែមិនា ឆ្នាំ១៩៩៧

វិរបាតុករដែលរងគ្រោះដោយការបោកគ្រាប់បែកកាលពីថ្ងៃទី៣០ ខែមិនា ឆ្នាំ១៩​៩៧។

៣០ មិនា ២០១៣

​លោក សម រង្ស៊ី ប្រធាន​គណបក្ស​សង្គ្រោះ​ជាតិ ដែល​និរទេស​ខ្លួន​ ​បាន​ថ្លែង​តាម វីដេអូ ខិន​ហ្វ្រើ​រិន ពី​ប្រទេស​បារាំង មក​ថា ១៦ ឆ្នាំមុន ការទាមទារ​របស់​បាតុករ ដែល​បាន​មកជួបជុំ​គ្នា នៅ​មុខ​រដ្ឋសភា​ចាស់ ទាមទារ​យុត្តិធម៌ ឲ្យ​តុលាការ​ស្អាត​ស្អំ ហើយ​មិន​បាន​ធ្វើ​អ្វី​ខុស ដោយ​បាន​ជួបជុំគ្នា ដោយ​សន្តិវិធី តែ​មាន​ជន​ដៃដល់​បាន​មក​គប់​គ្រាប់បែក ៤ គ្រាប់ នៅ​ចំ​កណ្តាល​ហ្វូង​បាតុករ បាន​ធ្វើឲ្យ​បាតុករ​យ៉ាងតិច ១៦ រូប ស្លាប់ និង​ជាង ១០០ នាក់ បាន​រងរបួស​។

តទៅនេះជាការដកស្រង់នូវចំណុចសំខាន់ៗ នៃបទអន្តរាគមន៏ លោក សម រង្ស៊ី ក្នុងឱកាសពិធីបុណ្យខួបឆ្នាំទី១៦ នៃព្រឹត្តិ ការណ៏គប់គ្រាប់បែកនៅទីក្រុងភ្នំពេញ កាលពីថ្ងៃទី៣០ ខែមិនា ឆ្នាំ១៩៩៧តាមរយៈ៖

១- យើងចងចាំជានិច្ច សោកនាដកម្មនៅមុខមន្ទីរដ្ឋសភាចាស់ កាលពីថ្ងៃទី៣០ ខែមិនា ឆ្នាំ១៩​៩៧។
២- រៀងរាល់ថ្ងៃ៣០ មិនា យើងបាន ហើយយើងនឹងជួបជុំគ្នាជានិច្ចនៅទីកន្លែងកើត​ហេតុដើម្បី​គោរព វិញ្ញាណក្ខន្ធ វីរបាតុករ ដែលបានលះបង់ជីវិតក្នុងបុព្វហេតុប្រជាធិបតេយ្យ សេរីភាព និងយុត្តិធម៌។

៣- យើងនឹងខិតខំអស់ពីកម្លាំងកាយកម្លាំងចិត្ត ដើម្បីស្វែងរកយុត្តិធម៌ជូន វិញ្ញាណក្ខន្ធនិង​ក្រុម​​គ្រួសារជនរងគ្រោះទាំងអស់នៃអំពើព្រៃផ្សៃនេះ រហូតដល់បានសម្រេច។

៤- យើងគ្មានជំនឿទាល់តែសោះ ថាប្រជារាស្ត្រខ្មែរ និងជនរងគ្រោះទាំងឡាយ អាចទទួល​បានយុត្តិធម៌ ក្រោមរបបនយោបាយបច្ចុប្បន្ន ដែលការពារជនឧក្រិដ្ឋ ហើយរារាំងយុត្តិធម៌ ដូច​ការធ្វើឱ្យតុលាការកាត់ទោសមេដឹកនាំ ខ្មែរក្រហមមិនអាចដំណើរការទៅបាន។

៥- យើងជឿជាក់ថា ខួបឆ្នាំទី១៦នៃសោកនាដកម្មនេះ ជាខួបចុងក្រោយហើយ ដែលយុត្តិធម៌​មិនទាន់បាន ផ្តល់ជូនជនរងគ្រោះនៃការគប់គ្រាប់បែក ឆ្នាំ១៩៩៧ ។ យើងប្តេជ្ញាចិត្តនាំមក​នូវ​លទ្ធិប្រជាធិបតេយ្យ តាមរយការបោះឆ្នោតខាងមុខ ដើម្បីរៀបចំឱ្យមានតុលាការឯករាជ្យ នាំ​ជនឧក្រឹដ្ឋទៅកាត់ទោសតាមច្បាប់ ឱ្យទាល់តែបាននៅឆ្នាំ២០១៤៕

ខ្ញុំ សម រង្ស៊ី ជឿជាក់ថាលោកហ៊ុន សែន ជាអ្នកនៅពីក្រោយការគប់គ្រាប់បែក ឆ្នាំ១៩៩៧នោះ៕