KI Media: ពូកអាវ៉ា មិនចាប់អារម្មណ៍ និងមិនខ្វល់ នឹង សមរង្ស៊ីទេ តែ បបួលគ្នា និយាយឡើង បែកពពុះមាត់ស្គុល!

មន្ត្រីរដ្ឋាភិបាល មិនខ្វល់នឹងលោក សម រង្ស៊ី ដើរជួបមេបក្សប្រឆាំងបណ្តាប្រទេសផ្សេងទៀតនៅអាស៊ីអាគ្នេយ៍ ឡើយ

ថ្ងៃទី 1 មីនា 2013 | ដោយ: រតនា

Cambodia Express News

ភ្នំពេញ: ប្រធានគណបក្សសង្គ្រោះជាតិ ដែលជាមេគណបក្សប្រឆាំង និងកំពុងនិរទេសនៅក្រៅប្រទេស នឹងធ្វើដំណើរមកកាន់តំបន់អាស៊ីអាគ្នេយ៍ ចាប់ពីថ្ងៃទី១ ដល់ថ្ងៃទី១០ ខែមីនា ឆ្នាំ២០១៣។ ក្នុងនោះ លោកសមរង្ស៊ី នឹងជួបជាមួយមេដឹកនាំគណបក្សប្រឆាំង នៅប្រទេសភូមា សឹង្ហបូរី និងម៉ាឡេស៊ី។ ប៉ុន្តែមន្ត្រីរាជរដ្ឋាភិបាលកម្ពុជា មិនមានការចាប់អារម្មណ៍ ចំពោះសកម្មភាពរបស់មេបក្សប្រឆាំង ដែលជាទណ្ឌិតនោះទេ ព្រោះមិនមែនជាសកម្មភាព ដែលបំរើឲ្យផលប្រយោជន៍ប្រជាពលរដ្ឋ។
សេចក្តីប្រកាសព័ត៌មានរបស់គណបក្សសង្គ្រោះជាតិ បង្ហាញថា មានប្រទេសបី នៅក្នុងតំបន់អាស៊ីអាគ្នេយ៍ គឺសឹង្ហបូរី ម៉ាឡេស៊ី និងភូមា ដែលលោក សម រង្ស៊ី នឹងត្រូវធ្វើទស្សនកិច្ច ក្នុងនាមជាប្រធានអ្នកប្រជាធិបតេយ្យសេរី នៅអាស៊ី និងក្នុងនាមជាវាគ្មិន សម្រាប់

វេទិកាពិភពលោកអាស៊ី ស្តីពី “សេរីភាព និងប្រជាធិបតេយ្យ”។

សេចក្តីប្រកាសបានឲ្យដឹងទៀតថា នៅប្រទេសសឹង្ហបូរី លោក សម រង្ស៊ី នឹងត្រូវបានឲ្យថ្លែងសុន្ទរកថា អំពីការផ្លាស់ប្តូរសេរីភាព ជាមូលដ្ឋាន និងការពង្រឹងសម្ព័ន្ធមេដឹកនាំស្ត្រី។ នៅប្រទេសម៉ាឡេស៊ី ពីថ្ងៃទី៤ ដល់ថ្ងៃទី៥ ខែមីនា លោក សម រង្ស៊ី នឹងថ្លែងសុន្ទរកថា នៅឯសន្និសីទអន្តរជាតិ ស្តីពីការរៀបចំបោះឆ្នោតជាតិ ទី១៣ នៃប្រទេសម៉ាឡេស៊ី ហើយលោកត្រូវបានស្នើជាវាគ្មិន ដោយប្រធានគណបក្សប្រឆាំងម៉ាឡេស៊ី អាន់វ៉ា អ៊ីប្រាហីម។

សេចក្តីប្រកាស បន្តថា នៅប្រទេសភូមា ពីថ្ងៃទី៩ ដល់ទី១០ ខែមីនា លោក សម រង្ស៊ី ដែលជាដំណើរទស្សនកិច្ចលើកដំបូង របស់លោក ត្រូវបានស្នើឲ្យបើកធ្វើសន្និសីទសារព័ត៌មានមួយ ដើម្បីរំលែកបទពិសោធន៍របស់លោក ក្នុងនាមជាប្រធានគណបក្សប្រឆាំងនៅកម្ពុជា ហើយបន្ទាប់មកលោក សម រង្ស៊ី នឹងជួបពិភាក្សាជាមួយនឹងលោកស្រី អ៊ុង សានស៊ូជី ប្រធានកណបក្សប្រឆាំង នៅប្រទេសភូមា។

សេចក្តីប្រកាស លើកឡើងថា សន្និសីទអន្តរជាតិរបស់ប្រទេសទាំងបីនេះ មានគោលដៅពិនិត្យមើលការវិវឌ្ឍន៍ចុងក្រោយ នៃដំណើរការប្រជាធិបតេយ្យ នៅតំបន់អាស៊ីអាគ្នេយ៍។

យ៉ាងណាក៏ដោយ លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានមានប្រសាសន៍ថា រាជរដ្ឋាភិបាលកម្ពុជា មិនមានការភ្ញាក់ផ្អើល និងមិនមានការចាប់អារម្មណ៍ ជុំវិញសកម្មភាពរបស់ទណ្ឌិត សម រង្ស៊ី នៅឯក្រៅប្រទេសទេ ទោះបីជានៅសហរដ្ឋអាមេរិក ឬមួយក៏នៅក្នុងប្រទេសមួយចំនួន និងនៅក្នុងតំបន់ណាក៏ដោយ ពីព្រោះលោកថា មិនមែនជាសកម្មភាព ដែលបំរើឲ្យផលប្រយោជន៍របស់ប្រជាពលរដ្ឋ ឬមួយក៏ផ្អែកទៅលើទិដ្ឋភាពច្បាប់ទេ។ លោក សម រង្ស៊ី ជាអ្នកបំពានច្បាប់ទៅហើយ។
លោក ទិត សុធា បានបន្តថា រាជរដ្ឋាភិបាលក៏មិនអើពើជុំវិញសកម្មភាពណាមួយរបស់លោក សម រង្ស៊ី ដែរ ពីព្រោះរដ្ឋាភិបាលគិតតែការងារណា ដែលនៅចំពោះមុខ ដែលត្រូវដោះស្រាយបញ្ហាជូនប្រជាពលរដ្ឋ ដែលផ្ទុយអំពីយុទ្ធនាការ និងសកម្មភាពរបស់លោក សម រង្ស៊ី ដែលប្រកាន់យកនូវទម្លាប់គៀងគរបរទេស ឬក៏បំផុតនូវពាក្យចចាមអារាម អំពីបញ្ហាកម្ពុជា វាហាក់ដូចជា អសន្តិសុខ។ ការលើកឡើងទាំងនោះ ផ្ទុយនឹងសភាពការពិតរបស់កម្ពុជា៕