ដោយ ពៅ មេត្តា ថ្ងៃសៅរ៍ ទី30 មីនា ឆ្នាំ2013 ម៉ោង10:59 VOD
អង្គការឃ្លាំមើលសិទ្ធិមនុស្សអន្តរជាតិ(HW)
ជំរុញឲ្យប្រទេសម្ចាស់ជំនួយ ដាក់សម្ពាធលើរដ្ឋាភិបាលកម្ពុជា
ដើម្បីឲ្យដោះលែងអ្នកស្រី យ៉ោម បុប្ផា សកម្មជនដីធ្លីបឹងកក់ជាបន្ទាន់
ដោយឥតលក្ខខណ្ឌ។
ក្នុងសេចក្តីថ្លែងការណ៍ របស់អង្គការឃ្លាំមើលសិទ្ធិមនុស្សអន្តរជាតិ
កាលពីថ្ងៃសុក្រម្សិលមិញ
បានអំពាវនាវឲ្យម្ចាស់ជំនួយដាក់សម្ពាធលើកម្ពុជាប្រឆាំងនឹង
ការសម្រេចរបស់តុលាការកំពូល កាលពីថ្ងៃទី២៧ ខែមីនានេះ
បន្តឃុំខ្លួនអ្នកស្រី យ៉ោម បុប្ផា
សកម្មជនដីធ្លីនៅតំបន់បឹងកក់។ ក្នុងសេចក្តីថ្លែងការណ៍នោះ
ក៏បានទាមទារឲ្យដោះលែងសកម្មជនដីធ្លីរូបនោះជាបន្ទាន់
ដោយអត់លក្ខខណ្ឌផងដែរ។
អ្នកស្រី យ៉ោម បុប្ផា ត្រូវបានសាលាដំបូងរាជធានីភ្នំពេញ
កាត់ទោសឲ្យជាប់ពន្ធនាគារ ៣ឆ្នាំ
ពីបទបង្ករហិង្សាដោយចេតនាលើអ្នករត់ម៉ូតូឌុបពីរនាក់កាលពីខែកញ្ញា
ឆ្នាំ២០១២។ ការផ្តន្ទាទោសនេះ ត្រូវបានអង្គការសង្គមស៊ីវិលជាតិ
និងអន្តរជាតិ ចេញសេចក្តីថ្លែងការណ៍ជាបន្តបន្ទាប់
អំពាវនាវដោះលែងសកម្មជនដីធ្លីរូបនោះ ជាបន្ទាន់ហើយចោទថា
រដ្ឋាភិបាលប្រើតុលាការទប់ទល់
ជាមួយប្រជាពលរដ្ឋដែលហ៊ានតវ៉ារឿងដីធ្លី។
តែកន្លងទៅថ្មីៗនេះ លោកនាយករដ្ឋមន្ត្រី ហ៊ុន សែន បានលើកឡើងថា
អ្នកស្រី យ៉ោម បុប្ផា បានវាយដំលើអ្នករត់ម៉ូតូ
ដែលតុលាការត្រូវកាត់ទោសតាមច្បាប់។ លោកនាយករដ្ឋមន្ត្រីបន្តថា
ការដែលសង្គមស៊ីវិល បង្វែររឿងព្រហ្មទណ្ឌរបស់អ្នកស្រីយ៉ោម បុប្ផា
ថាជាករណីបង្ក្រាបសកម្មជដីធ្លីនោះ
ជារឿងអយុត្តិធម៌សម្រាប់រដ្ឋាភិបាល៕
No comments:
Post a Comment