ព្រះអង្គម្ចាស់ធម្មិកោ​នឹង​ត្រូវ​ជាប់​ពន្ធនាគារ ?

ព្រះ​អង្គម្ចាស់​ស៊ីសុវត្ថិ​ ធម្មិកោ

វណ្ណារ៉ា/RFI

​ថ្ងៃ អង្គារ 21 ឧសភា 2013

ដោយ លាង ដឺលុច 

Radio France Internationale

អង្គភាព​ប្រឆាំង​អំពើពុករលួយ​បាន​ព្រមាន​ប្តឹង​ព្រះអង្គម្ចាស់​ស៊ីសុវត្ថិ ធម្មិកោទៅ​តុលាការ​ ប្រសិន​បើ​ព្រះអង្គម្ចាស់​អង្គ​នេះនៅ​តែ​មិន​ព្រម​បំពេញ​ឯកសារ​ប្រកាស​ទ្រព្យ​សម្បត្តិ និង​បំណុល។ ព្រះអង្គម្ចាស់​ធម្មិកោបាន​​បញ្ជាក់ភា្លមៗ​ដែរ​នៅ​ថ្ងៃ​នេះ​ថា ព្រះអង្គ​នឹង​មិន​ប្រកាស​ទ្រព្យ​សម្បត្តិ​ឡើយ ដោយ​ព្រះអង្គ​ទាមទារ​អោយ​រដ្ឋាភិបាល​ចាត់ទុក​ស្ថាប័ន​ព្រះបរមរាជវាំង​ជា​ស្ថាប័ន​អព្យាក្រឹត​មិននៅ​ក្រោម​រដ្ឋាភិបាល។

ប្រធាន​អង្គភាព​ប្រឆាំង​អំពើពុករលួយ​លោក​ឱម យ៉ិនទៀង​បាន​ចេញ​លិខិត​ព្រមាន​ព្រះអង្គម្ចាស់​ស៊ីសុវត្ថិ ធម្មិកោ​កាល​ពី​ថ្ងៃ​ចន្ទ​ម្សិលមិញ ទាមទារ​អោយ​ព្រះអង្គ​ម្ចាស់​ប្រកាស​ទ្រព្យសម្បត្តិ​ និង​បំណុល។​ ជាលិខិត​ព្រមាន​យ៉ាង​ម៉ឺងម៉ាត់ និង​មាន​ចរិត​ធ្ងន់ធ្ងរ​ថែម​ទៀត​ផង ពី​ព្រោះ​នៅ​ក្នុង​លិខិត​នោះ លោក​ឱម យ៉ិនទៀង​បាន​រម្លឹក​ព្រះអង្គម្ចាស់​ថា ប្រសិន​បើ​ព្រះអង្គម្ចាស់​អង្គនេះ​មិន​បំពេញ​ឯកសារ​ប្រកាស​ទ្រព្យសម្បត្តិ​ និង​បំណុល​ទេ​នោះ អង្គភាព​ប្រឆាំងអំពើពុករលួយ​ក៏​មិន​បន្ធូរ​ដៃ​ដែរ។ ក្នុង​ន័យ​នេះ បណ្តឹង​ប្តឹង​ប្រឆាំង​ព្រះអង្គម្ចាស់​នឹង​ត្រូវ​បញ្ជូនទៅ​តុលាការ។
 ព្រះអង្គម្ចាស់​ធម្មិកោ​វិញ​នៅ​តែ​មិន​ចាប់អារម្មណ៍​ចំពោះ​ការ​ព្រមាន​នេះ​ទេ។ ព្រះអង្គម្ចាស់​ដែល​បាន​ទទួល​​លិខិត​ព្រមាន​នេះ​ហើយ​នោះ កំពុង​តែ​ជាប់ដៃជួប​ជាមួយ​សកម្មជន​គណបក្ស​សង្គ្រោះជាតិ​ដែល​ព្រះអង្គ​ទើប​តែ​បាន​ចូលរួម​រស់​ជាមួយ។ មាន​បន្ទូល​ប្រាប់​វិទ្យុបារាំង​អន្តរជាតិ​នៅ​ថ្ងៃ​អង្គារ​នេះ ព្រះអង្គម្ចាស់​ធម្មិកោ​បាន​ទាមទារ​អោយ​រដ្ឋាភិបាល​​ចាត់ទុក​ស្ថាប័ន​ព្រះបរមរាជវាំង​ ជា​ស្ថាប័ន​អព្យាក្រឹត មិន​នៅ​ក្រោម​រដ្ឋាភិបាល​ឡើយ។ ព្រះអង្គ​​ចង់​មាន​បន្ទូល​ថា ច្បាប់​ប្រឆាំងអំពើ​ពុករលួយ​ដែល​តម្រូវ​អោយ​មន្ត្រី​ប្រកាស​ទ្រព្យ​សម្បត្តិ និង​បំណុល​​មិន​ត្រូវ​គ្របដណ្តប់​ស្ថាប័ន​ព្រះមហាក្សត្រ​ទេ​។

ព្រះអង្គ​ម្ចាស់​បញ្ជាក់​ថា នេះ​គឺ​ជា​គំនិត​គិត​គូរ​ផ្ទាល់​ខ្លួន​របស់​ព្រះអង្គ ខណៈមន្ត្រី​របស់​ព្រះបរម​រាជវាំង​ចំនួន​១៤៨​រូប ដែល​មាន​ទាំង​ព្រះអង្គម្ចាស់​ផ្សេង​ទៀត​ផង​ដែរ បាន​បំពេញ​កាត្វកិច្ច​ប្រកាស​​ទ្រព្យ​សម្បត្តិ​នេះ។ លើស​ពី​នេះ ព្រះអង្គ​ក៏​បាន​ចោទ​ជា​សំណួរ​ផង​ដែរ​ថា ក្នុង​ចំណោម​មន្ត្រីរាជការ​ដែល​ជាប់​កាតព្វកិច្ច​​ប្រកាស​ទ្រព្យ​សម្បត្តិ​នោះ តើ​ប្រជាពលរដ្ឋ​អាច​ដឹង​ថា អ្នកណា​ខ្លះ​ដែល​មិន​បាន​ប្រកាស​ទ្រព្យ​សម្បត្តិ​ដែរ ឬទេ ?

បើ​ទោះជា​ប្រធាន​អង្គភាព​ប្រឆាំង​អំពើ​ពុករលួយ​បាន​បាន​បង្ហាញ​មាត្រា​ច្បាប់​ដែល​ត្រូវ​ដាក់​ទោស​ជន​ដែល​មិន​បាន​ប្រកាស​ទ្រព្យ​សម្បត្តិ និង​បំណុល​ក៏​ដោយ ក៏​ព្រះអង្គម្ចាស់​ធម្មិកោ​មាន​បន្ទូល​ច្បាស់​ហើយ​ដែរ​ថា ព្រះអង្គ​នឹង​នៅ​តែ​មិន​បំពេញ​ឯកសារ​ប្រកាស​ទ្រព្យ​សម្បត្តិ​ដែល​ព្រះអង្គ​អះអាងថា ត្រូវ​បាន​គេ​ផ្ញើរ​មក​ជាមួយ​នឹង​ក្រោម​ស្រោម​សំបុត្រ​ពណ៌ស​មួយ​ដែល​គ្មាន​ស្លាក​សំគាល់​អង្គភាពប្រឆាំង​អំពើ​ពុក​រលួយ​សោះ​ឡើយ​នោះ។

នៅ​ក្នុង​លិខិត​ព្រមាន​ដែល​សរសេរ​ថា ព្រះអង្គម្ចាស់​ធម្មិកោ​ត្រូវ​បាន​ថ្វាយ​ដំណឹង​អោយ​ប្រកាស​​ទ្រព្យ​សម្បត្តិ ២​ដង​ហើយ​នោះ បញ្ជាក់​ថា បទល្មើស​មិនព្រម​ប្រកាស​ទ្រព្យ​សម្បត្តិ និង​បំណុល​នោះ នឹង​ត្រូវ​ជាប់​ពន្ធនាគារ​ពី​មួយ​ខែ​ដល់​មួយ​ឆ្នាំ ហើយ​ត្រូវ​ពិន័យ​ជា​ប្រាក់ពី​១​សែន​ទៅ​២​លាន​រៀល ហើយ​នឹង​ត្រូវ​បង្ខំ​អោយ​ប្រកាស​ទ្រព្យសម្បត្តិ​ជា​ដដែល។ ព្រះអង្គម្ចាស់​ធម្មិកោ​​មាន​បន្ទូល​ថា ព្រះអង្គ​ស្វាគមន៍ និង​រង់ចាំ​យាង​ទៅ​តុលាការ​​តែ​ម្តង​ដើម្បី​និយាយ​អំពី​​ស្ថាប័ន​ព្រះមហាក្សត្រ៕