 |
| មន្ត្រីបោះឆ្នោត រាប់សន្លឹកឆ្នោតក្នុងការបោះឆ្នោតព្រឹទ្ធសភា កាលពីអាណត្តិមុន។ រូបថត ហេង ជីវ័ន |
Friday, 18 May 2012 12:01
Stuart White និង មាស សុខជា
The Phnom Penh Post
ភ្នំពេញៈគ្រូបង្រៀនរាប់ម៉ឺននាក់ ត្រូវបានរំពឹងថា នឹងទទួលយកការងារជាមន្រ្តីក្នុងការបោះឆ្នោតឃុំ-សង្កាត់ ដែលនឹងចាប់ផ្តើមយុទ្ធនាការបោះឆ្នោត នៅថ្ងៃនេះ ធ្វើឲ្យមានការបារម្ភខ្លាចប៉ះពាល់ទៅដល់ការសិក្សារបស់សិស្ស ដែលមានភាពទន់ខ្សោយស្រាប់នោះ។ យោងតាមលោក មុំ សុទ្ធ ប្រធានផ្នែកបណ្តុះបណ្តាលនៅ គ.ជ.ប បានឲ្យដឹងថា មានការងារជាង ១១ ៦០០០ កន្លែង ដែលឈរជើងនៅបណ្តាមណ្ឌលបោះឆ្នោត និងការិយាល័យបោះឆ្នោត។ លោកបានបន្តថា ៥០ ភាគរយ នៃការងារទាំងនោះនឹងត្រូវបំពេញដោយគ្រូបង្រៀន។
លោក ម៉ក់ វណ្ណ រដ្ឋលេខាធិការនៃក្រសួងអប់រំ បានថ្លែងថា លោកមិនបានដឹងពីសេចក្តីលម្អិត នៃបញ្ហានេះទេ ប៉ុន្តែលោកបញ្ជាក់ថា ការចូលរួមចំណែករបស់គ្រូបង្រៀន ក្នុងការបោះឆ្នោតដោយសេរី មានសារៈសំខាន់ ហើយអវត្តមានរបស់ពួកគេនឹងមិនប៉ះពាល់ដល់ការសិក្សារបស់សិស្សឡើយ។
លោកបានសួរថា៖ «ជាធម្មតា តើអ្នកណាមានលទ្ធភាពធ្វើកិច្ចការទាំងនេះបាន?»។ លោកបានកត់សម្គាល់ថា គ្រូបង្រៀនជាញឹកញាប់ ជាបេក្ខជនមានលក្ខណៈសម្បតិ្តនៅតាមតំបន់ជនបទ។
«ការងាររបស់យើង មិនមែនការបោះឆ្នោតទេ វាជាការងារបង្រៀនកុមារ ប៉ុន្តែយើងចង់ឲ្យប្រទេសរបស់យើងមានលទិ្ធប្រជាធិបតេយ្យច្បាស់ លាស់ ដូច្នេះយើងអនុញ្ញាតឲ្យគ្រូបង្រៀនធ្វើការរយៈពេលខ្លីលើការបោះឆ្នោត»។
យោងតាមលោក ម៉ក់ វណ្ណ បានឲ្យដឹងទៀតថា គ្រូជំនួសជាច្រើននាក់ កំពុងរង់ចាំបំពេញកន្លែងគ្រូបង្រៀន ដែលបានជ្រើសរើសជួយក្នុងការរៀបចំការបោះឆ្នោត។ លោកបានបញ្ជាក់ថា៖ «ថ្នាក់រៀននឹងមិនបិទទ្វារទេ។ ថ្នាក់រៀននៅតែដំណើរការ[យើង]មានគ្រូជំនួសជាច្រើននាក់»។
ទោះជាយ៉ាងណាក៏ដោយ បើតួលេខរបស់ គ.ជ.ប ជាតួលេខត្រឹមត្រូវ នោះគ្រូបង្រៀនជាង ៦០០០០ នាក់ នឹងធ្វើការលើការងារបោះឆ្នោត ដោយគ្រូបង្រៀនខ្លះត្រូវធ្វើការដល់ទៅ ៣ ខែ។
តាមការប្រៀបធៀបបានឲ្យដឹងថា ក្រសួងអប់រំ មានគ្រូបង្រៀនសរុបប្រហែល ៩៤០០០ នាក់សម្រាប់ឆ្នាំសិក្សា២០០៦‑២០០៧ ដែលនេះ ធ្វើឲ្យមនុស្សមួយចំនួនឆ្ងល់ថា តើប្រព័ន្ធអប់រំកម្ពុជាមានគ្រូជំនួសឬអត់?
លោក អៀង វុទ្ធី អ្នកគ្រប់គ្រងកម្មវិធីអង្គការ Bridges Across Borders ជាអង្គការក្រៅរដ្ឋាភិបាល ធ្វើការតស៊ូមតិលើការអប់រំ បានថ្លែងថា៖ «ប្រសិនបើ គ.ជ.ប ព្យាយាមយកគ្រូចេញជាច្រើនខែ នោះប្រាកដណាស់ វានឹងប៉ះពាល់ដល់ការអប់រំសិស្ស»។
ស្ថិតិរបស់អង្គការយូណេស្កូ បានបង្ហាញថា កម្ពុជា មានសិស្សបឋមសិក្សាជិត ៥០ នាក់ សម្រាប់រាល់គ្រូបង្រៀនម្នាក់ ជាតួលេខដែលខ្ពស់ជាងប្រទេសវៀតណាម ២ដង និងខ្ពស់ជាងនៅសហរដ្ឋអាមេរិក ៣ ដង។ ឯកសាររបស់អង្គការនេះ បានឲ្យដឹងថា តាមទ្រឹស្តី តួលេខសិស្សធៀបនឹងគ្រូតិច អនុញ្ញាតឲ្យគ្រូបង្រៀន ផ្តោតយកចិត្តទុកដាក់ថែមទៀត លើសិស្សម្នាក់ៗ ដែលអាចធ្វើឲ្យលទ្ធផលនៃការសិក្សារបស់សិស្សល្អប្រសើរឡើង។
យោងតាមលោក អៀង វុទ្ធីបានឲ្យដឹងថា ឥឡូវនេះជាពេលមិនល្អសម្រាប់គ្រូចាកចេញពីការងារឡើយ។ លោកបន្តថា៖ «ក្នុងរយៈពេល ៣ ខែទៀត នឹងមានការប្រឡងថ្នាក់វិទ្យាល័យ ហើយជាធម្មតា សិស្សត្រូវការរៀនបន្ថែម ដើម្បីត្រៀមប្រឡង។ តែប្រសិនបើគ្រូទៅធ្វើការឲ្យ គ.ជ.ប នោះវានឹងប៉ះពាល់សាលារៀននិងសិស្ស នេះមិនមែនជាគំនិតល្អទេ»។
លោក ទេព នីថា អគ្គលេខាធិការ គ.ជ.ប បានថ្លែងថា តម្រូវការចង់បានបុគ្គលិកមានលក្ខណៈសម្បតិ្តសម្រាប់រៀបចំការបោះឆ្នោត បានកើនឡើង តែគ្រូបង្រៀន មិនមែនជាគោលដៅជាក់លាក់ សម្រាប់ការជ្រើសរើសឡើយ។ លោកបានបញ្ជាក់ថា៖ «ការជ្រើសរើសបានធ្វើឡើងដោយបើកចំហ សម្រាប់សាធារណជនដាក់ពាក្យ មិនមែនតែគ្រូទេ តែគ្រូមានសមត្ថភាពធ្វើការឲ្យគ.ជ.ប។ ពេលពួកគេធ្វើការឲ្យគ.ជ.ប ពួកគេត្រូវសុំការអនុញ្ញាតពីស្ថាប័នរៀងៗខ្លួន ប៉ុន្តែ គ.ជ.ប មិនបានពាក់ព័ន្ធនោះទេ»៕
No comments:
Post a Comment