រ៉ុង ឈុន និងកម្មកររោងចក្រតៃយៀនបន្តរធ្វើកូដកម្មក្នុងថ្ងៃនេះ

ដោយ. ឆាំ ឆានី ០៧ កក្កដា ២០១២

នៅថ្ងៃទី០៧ ខែកក្កដា ឆ្នាំ២០១២នេះ លោក រ៉ុង ឈុន ប្រធានសហភាពសហជីពកម្ពុជា និងកម្មកររោង​ចក្រតៃយៀននៅតែបន្តរធ្វើកូដកម្មនៅខាងមុខរោងចក្រ ដើម្បីទាមទារឲ្យខាងភាគីរោងចក្រដោះស្រាយ​នូវការទាមទាររបស់កម្មករទាំង០៥ ចំណុចរួមមាន ៖ ១-​សុំ​ឱ្យ​ក្រុមហ៊ុន​ធ្វើការ​ទូទាត់​នូវ​អត្ថប្រយោជន៍​ផ្សេងៗ​ តាមច្បាប់ ស្ដីពី​ការងារ ដោយ​ក្រុមហ៊ុន​បាន​ប្ដូរ​ឈ្មោះ​រោងចក្រ ចំនួន ១៣៥ ដុល្លារ ក្នុង​មួយ​ឆ្នាំ​។ ២-​សុំ​ឱ្យ​ក្រុមហ៊ុន​ផ្ដល់​សោហ៊ុយ​ធ្វើដំណើរ និង​ថ្លៃ​ស្នាក់​នៅ​ឱ្យបាន ១៥ ដុល្លារ ក្នុង​មួយ​ខែៗ​។ ៣-​សុំ​ឱ្យ​ក្រុមហ៊ុន​ដំឡើង​ប្រាក់​ថ្លៃ​ទឹកដោះគោ​ឱ្យ​បាន ១៥ ដុល្លារ ក្នុង​មួយ​ខែៗ​។ ៤-​សុំ​ឱ្យ​ក្រុមហ៊ុន​ឡើង​ប្រាក់រង្វាន់​ទៀងទាត់ ឱ្យបាន ១៥ ដុល្លារ ក្នុង​មួយ​ខែៗ និង​ទី​៥-​សុំ​ឱ្យ​ក្រុមហ៊ុន​កុំ​យក​ប្រាក់​មុខតំណែង និង​បច្ចេកទេស​យកមក​កាត់​ទូទាត់ នៅ​ពេល​កម្មករ​-​កម្មការិនី និង​ថ្នាក់ដឹកនាំ​សុំ​ច្បាប់​ចាប់ពី​បី​ថ្ងៃ​ឡើងទៅ​​ ។
សូមបញ្ជាក់ថា កូដកម្មនេះបានធ្វើឡើងអស់រយះពេលជិតពីរសប្តាហ៍ហើយ តែនៅមិនទាន់មាន​ដំណោះស្រាយទេ បើទោះជាក្រសួងការងារ ថៅកែរោងចក្រ មន្ត្រីសហជីព និងតំណាងកម្មករ​ធ្លាប់បាន​ជួបចរចារគ្នាចំនួនពីលើករួចមកហើយក្តី ។ ក្នុងថ្ងៃនេះដែរសហជីពនិងកម្មករក៏បាននាំគ្នាផ្តិតមេដៃ ដើម្បី​ធ្វើញត្តិដាក់ជូនលោក ហ៊ុន សែន សុំឲ្យមានដំណោះស្រាយជូនកម្មករតាមលក្ខន្ឋ័ការងារ ៕