ខៀវ កាញារីទ្ធ រអើលគូទ ដោយសារ អត្ថបទព័ត៌មាន នរោត្តម សោម៉ា

Norodom Soma

លោក ខៀវ កាញារីទ្ធ ប្រតិកម្មទៅនឹងទស្សនៈថា អនាគត រាជានិយម ស្ថិតក្នុងកណ្តាប់ដៃ បក្សប្រជាជនកម្ពុជា

Monday, 29 October 2012
ដោយៈ ដើមអម្ពិល(DAP)

ការសរសេរ អត្ថបទ ដែលថា ការ រៀបចំ នៅក្នុង វាំង មិនឲ្យ ព្រះ រាជវង្សានុវង្ស ចូលនេះ គឺជា មូលបង្កាច់ និងក្នុងចេតនា អាក្រក់ បំផុត។

ភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា និងជារដ្ឋមន្រ្ដីក្រសួងព័ត៌មាន បានប្រតិកម្មចំពោះការ ចុះផ្សាយអត្ថបទព័ត៌មាន របស់កាសែតក្នុងស្រុកមួយ ដែលបាន លើកឡើងថា អនាគតរាជានិយម ស្ថិតក្នុងកណ្តាប់ដៃគណបក្សប្រជាជនកម្ពុជា ដោយការលើកឡើងនេះ ជាការបំបែកបំបាក់រវាងព្រះរាជវង្សានុវង្ស ជាមួយរាជ រដ្ឋាភិបាល ក៏ដូចជាគណបក្សប្រជាជនកម្ពុជាផងដែរ។

លោក ខៀវ កាញារីទ្ធ អ្នកនាំពាក្យរាជរដ្ឋាភិបាលកម្ពុជា បានមានប្រសាសន៍ ក្នុងសន្និសីទកាសែត នៅថ្ងៃ ទី២៩ខែតុលាឆ្នាំ២០១២នាទីស្ដីការក្រសួងព័ត៌មានថាការចុះផ្សាយរបស់កាសែតភ្នំពេញ ប៉ុស្ដិ៍ កាលពីថ្ងៃទី២៦ ខែតុលាកន្លងទៅនេះ ដែលក្នុងភាសាអង់គ្លេស បានដាក់ ចំណងជើងថា«យើងគួរតែរួបរួមគ្នា»និងភាសាខ្មែរបានដាក់ចំណងជើង ថា «អនា គតរាជានិយម ស្ថិតក្នុងកណ្តាប់ដៃបក្សប្រជាជនកម្ពុជា» នោះ គឺជាការញុះញង់ និងចង់បំបែកបំបាក់ជាតិខ្មែរ ពិសេសបំបែកបំបាក់ រវាង ព្រះរាជវង្សានុវង្ស ជាមួយរាជរដ្ឋាភិបាល និងបក្សប្រជាជន ផងដែរ។

លោកបន្តយ៉ាងដូច្នេះ «យើងឃើញថាអត្ថបទនេះជាអត្ថបទបញ្ឆេះធំណាស់ ឆ្លៀត ពេលដែលយើងមានទុក្ខសោកទាំងមូលហើយគាត់បានឆ្លៀតប្រើអត្ថបទនេះដើម្បីបង្កជាការបំបែកបំបាក់ក្នុងប្រទេសជាតិរបស់យើងផង បំបែកបំបាក់រវាងព្រះរាជរង្សានុវង្ស និងរាជ រដ្ឋាភិបាល ក៏ដូចជា បក្សប្រជាជនផង»។


អត្ថបទរបស់កាសែតភ្នំពេញប៉ុស្ដិ៍ ជាភាសាខ្មែរ ចុះផ្សាយកាលពីថ្ងៃទី២៦ ខែតុលា ឆ្នាំ២០១២ សរសេរដោយឈ្មោះ នរោត្តម សោម៉ា ក្នុងទំព័រទី២ បានដាក់ចំណងជើង ថា អនាគតរាជានិយម ស្ថិតក្នុងកណ្តាប់ដៃបក្សប្រជាជនកម្ពុជា។ អត្ថបទនោះ បានសរសេរថា ក្នុងអំឡុងព្រះរាជពិធីបុណ្យ ព្រះបរមសពព្រះមហាវីរក្សត្រ នរោត្តម សីហនុ នៅថ្ងៃទី១៧ ខែតុលា ឆ្នាំ២០១២ ខ្ញុំបានមើលឃើញផ្ទាល់ភ្នែកថា ការរួបរួម ក្នុងចំណោមគ្រួសាររាជវង្ស មានលក្ខណៈពុំរឹងមាំ និងមានការបែងចែកក្នុង រដ្ឋាភិបាលបច្ចុប្បន្ន។

ព្រះមហាក្សត្រ នរោត្តម សីហមុនី ជាព្រះមហាក្សត្រ តែគ្មានអំណាច ហើយរដ្ឋាភិបាល គឺជាអ្នកកាន់អំណាចទាំងស្រុង។ វាច្បាស់ នៅក្នុងព្រះរាជពិធីបុណ្យព្រះបរម សព នៅពេលសមាជិកគ្រួសាររាជវង្សមួយចំនួន មិនអាចចូលទៅក្នុងសាលព្រះរាជបល្ល័ង្ក នៃព្រះបរមរាជវាំងបាន ដើម្បីសម្តែងគារវកិច្ច ដល់សមាជិកគ្រួសារជា ទីស្រឡាញ់របស់ពួកគេ គឺព្រះមហាវីរក្សត្រនរោត្តម សីហនុ។ សាលព្រះរាជបល្ល័ង្ក ពោរពេញទៅដោយមន្រ្តីរដ្ឋាភិបាល ប្រតិភូ និងឥស្សរជនសំខាន់ៗ មកពី បណ្តាប្រទេសអាស៊ី។ ខ្ញុំមានអារម្មណ៍ថា ខ្ញុំស្ថិតនៅក្នុងកិច្ចប្រជុំកំពូលអាស៊ាន មិនមែនក្នុងពិធីបុណ្យព្រះបរមសព នៃសមាជិករាជវង្សជាទីស្រឡាញ់ និងជាទីគោរព របស់ខ្ញុំនោះទេ។

ការសរសេរអត្ថបទខាងលើនេះ ត្រូវបាន លោក ខៀវ កាញារីទ្ធ អ្នកនាំពាក្យរាជរដ្ឋាភិបាលកម្ពុជា និរដ្ឋមន្រ្តីក្រសួងព័ត៌មានបញ្ជាក់ថា នៅក្នុងពិធីដង្ហែព្រះបរមសព អង្គសម្ដេចឪ យាងចូលព្រះបរមរាជវាំង កាលពីថ្ងៃទី១៧ ខែតុលា ឆ្នាំ២០១២ កន្លងទៅនេះ សូម្បីមន្រ្ដីរាជរដ្ឋាភិបាល គឺមិនមាននរណាម្នាក់បានចូលនោះទេ គឺមាន តែថ្នាក់ត្រឹមឧបនាយករដ្ឋមន្រ្ដីឡើងលើ ទើបអាចចូលបាន ក្រៅពីនោះគឺមានតែ ព្រះរាជវង្សានុវង្ស និងមន្រ្ដីជំនិត របស់អង្គសម្ដេច ប៉ុណ្ណោះ។

លោកបញ្ជាក់ថា នៅក្នុងពិធីដង្ហែព្រះបរមសព អង្គសម្ដេចឪ យាងចូលព្រះបរមរាជវាំងនោះ ព្រះរាជវង្សានុវង្សមួយចំនួន ក៏មិនបានចូលទៅថ្វាយបង្គំនៅថ្ងៃនោះដែរ ដោយសារតែមានមនុស្សច្រើន ហើយការសរសេរអត្ថបទដែលថា ការរៀបចំនៅក្នុងវាំងមិនឲ្យព្រះរាជវង្សា នុវង្សចូលនេះ គឺជាមូលបង្កាច់ និងក្នុងចេតនាអាក្រក់ បំផុត។

រដ្ឋមន្រ្ដីក្រសួងព័ត៌មាន និងជាអ្នកនាំពាក្យរាជរដ្ឋាភិបាល មិនទាន់បានចេញសេចក្ដីប្រកាស ឬការណែនាំណាមួយ ឲ្យចាងហ្វាងកាសែតភ្នំពេញប៉ុស្ដិ៍នោះ កែប្រែ អត្ថបទរបស់ខ្លួននៅឡើយទេ ដោយរង់ចាំ ឲ្យអង្គភាពព័ត៌មាន និងប្រតិកម្មរហ័ស ក៏ដូចជាព្រះរាជវង្សានុវង្ស ជាអ្នកចេញសេចក្ដីប្រកាស ឬណែនាំវិញ ព្រោះ ឈ្មោះអ្នកសរសេរនេះ អាចខ្សែរាជវង្សានុវង្ស៕