.jpg) |
| លោក អ៊ឹម សួស្តី ប្រធាន គ.ជ.ប (RFA) |
ដោយ ប៉ែន បូណា
Radio Free Asia
ក្រុមយុវជនគណបក្សសម រង្ស៊ី បានប្រកាសពីគម្រោងធ្វើបាតុកម្មមួយនៅក្នុងខែតុលានេះដើម្បីជំរុញឲ្យមានកំណែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប)។ ការព្រមានធ្វើបាតុកម្មរបស់យុវជនគណបក្សសម រង្ស៊ី បានធ្វើឡើងបន្ទាប់ពី គណបក្សសម រង្ស៊ី និងគណបក្សសិទ្ធិមនុស្សបានប្រកាសធ្វើពហិការមិនចូលរួមប្រជុំសភាដើម្បីអនុម័តសមាសភាព គ.ជ.ប នៅថ្ងៃទី១១តុលាខាងមុខនេះ។ យ៉ាងណាក៏ដោយ សម្ពាធរបស់បក្សប្រឆាំងហាក់គ្មានទម្ងន់ទៅលើសេចក្តីសម្រេចរបស់គណបក្សកាន់អំណាចទេ។
បន្ទាប់ពីក្រសួងមហាផ្ទៃបានបដិសេធមិនទទួលយកសំណើរបស់ខ្លួនមួយលើក ជាពីរលើករួចមក គណបក្សប្រឆាំងទាំងពីរបានបង្កើនសម្ពាធរបស់ខ្លួនទៅលើរដ្ឋាភិបាលដើម្បីជំរុញឲ្យមានកំណែទម្រង់សមាសភាពគណៈកម្មាធិការជាតិរៀបចំការបោះឆ្នោត (គ.ជ.ប) ។ ក្រុមយុវជនគណបក្សសម រង្ស៊ី បានប្រកាសឲ្យដឹងនៅចុងសប្តាហ៍នេះថា ពួកគេនឹងរៀបចំធ្វើបាតុកម្មមួយនៅចុងខែតុលានេះដើម្បីទាមទារឲ្យមានកំណែទម្រង់ស្ថាប័នរៀបចំបោះឆ្នោត។ នេះជាសម្ពាធថ្មីមួយទៀតដែលបក្សប្រឆាំងបានព្រមានដាក់ទៅលើគណបក្សកាន់អំណាចឲ្យពិចារណាសំណើរបស់ខ្លួន។
កាលពីថ្ងៃសុក្រចុងសប្តាហ៍នេះដែរ គណបក្សសម រង្ស៊ី និងគណបក្សសិទ្ធិមនុស្សបានធ្វើសេចក្តីថ្លែងការណ៍រួមគ្នាមួយដោយប្រកាសធ្វើពហិការមិនចូលរួមកិច្ចប្រជុំសភាដើម្បីអនុម័តសមាសភាព គ.ជ.ប ដែលគ្រោងធ្វើនៅថ្ងៃទី១១ តុលាខាងមុខទេ។ នេះជាពហិការទី២ បន្ទាប់ពីគណបក្សទាំងពីរនេះបានធ្វើពហិការរួចទៅហើយ មិនចូលរួមក្នុងដំណើរការសង្កេតការណ៍ចុះឈ្មោះ និងពិនិត្យឈ្មោះបោះឆ្នោតឆ្នាំ ២០១២ ដែលកំពុងតែដំណើរការ។
យ៉ាងណាក៏ដោយ សម្ពាធរបស់បក្សប្រឆាំងហាក់គ្មានទម្ងន់ទៅលើសេចក្តីសម្រេចរបស់គណបក្សកាន់អំណាចឡើយ។ រដ្ឋសភាជាតិគ្រោងបើកកិច្ចប្រជុំវិសាមញ្ញមួយនៅថ្ងៃព្រហស្បតិ៍សប្តាហ៍ក្រោយនេះ ដើម្បីពិភាក្សា និងអនុម័តសមាសភាពគណៈកម្មាធិការជាតិរៀបចំការបោះឆ្នោត។ សមាសភាព គ.ជ.ប ដែលរដ្ឋសភាគ្រោងអនុម័តនោះនឹងគ្មានអ្វីខុសពីសមាសភាពបច្ចុប្បន្ននេះទេ ពោលគឺ លោក អ៊ឹម សួស្តី នៅតែជាប្រធាន និងលោកស្រី ស៊ិន ជុំបូ ជាអនុប្រធានដដែល។
គួរបញ្ជាក់ថា គណបក្សសម រង្ស៊ី និងគណបក្សសិទ្ធិមនុស្សបានព្យាយាមដាក់សំណើទៅក្រសួងមហាផ្ទៃផង និងបានជួបពិភាក្សាជាមួយតំណាងក្រសួងមហាផ្ទៃដោយផ្ទាល់ផងដើម្បីជជែកអំពីការកែទម្រង់សមាសភាព គ.ជ.ប ។ ប៉ុន្តែរាល់សំណើ និងជំនួបពិភាក្សាទាំងនោះមិនបានទទួលលទ្ធផលអ្វីទេ។ ក្រសួងមហាផ្ទៃបានបដិសេធមិនទទួលយកសំណើរបស់បក្សប្រឆាំងក្រោមហេតុផលថា សំណើទាំងនោះនឹងធ្វើឲ្យការបង្កើត គ.ជ.ប ជាប់គាំងមិនអាចចេញរួច។
យ៉ាងណាក៏ដោយ គណបក្សប្រឆាំងនៅតែបន្តព្យាយាមបង្កើនសម្ពាធទៅលើបក្សកាន់អំណាចបន្ថែមទៀត។ បន្ទាប់ពីពហិការមិនចូលរួមសង្កេតការណ៍ និងមិនចូលរួមប្រជុំសភា ឥឡូវនេះឈានដល់ការប្រកាសធ្វើបាតុកម្មវិញម្តង៕
3 comments:
អស់លោកគណបក្សប្រឆាំងល្មមឈប់យករឿងការបោះឆ្នោតមកឃោសនាបន្លំពលរដ្ឋតទៅទៀត ត្រូវតែឈប់យកឡេះនេះឡេះនោះឬទាញយកមហាអំណាចនេះឬអំណាចនោះមកធ្វើជាខែលតទៅទៀតគ្មានខែ្មរណាគេគាំទ្រនូវគំនិតនេះទេ។ ខ្មែរទូទាំងពិភពលោកបានដឹងថាការបោះឆ្នោតបច្ចុប្បន្នគឺជាការបោះឆ្នោតបង្រ្គប់កិច្ច មិនអាចធ្វើការផ្លាស់ប្តូររបបភ្នំពេញបានទេ។ គឺមានតែពលរដ្ឋទូទាំងប្រទេសងើបឡើងប្រឆាំងនិងដេញពួកវាទម្លាក់ចេញពីអំណាចនិងដាក់ពាក្យបណ្តឹងពីបទឧក្រិដ្ឋកម្មរបស់ពួកវាប្រឆាំងនិងមនុស្សជាតិទៅកាន់តុលាការICCតែប៉ុណ្ណោះ។
គួរអស់សំណើច ដែរ ! យុវជនគណបក្សសម រង្សីមានគរោងធ្វើបាតុកម្ម ស្រាប់តែKI-MEDIA បង្ហោះរូបប្រធានយុវជន ដែល
ត្រូវប៉ូលីសវាយក្បាលសន្លប់ទៅវិញ ធ្វើឲកមេងៗរួញខ្លួន ។
វារឹងក្បាលណាស់ អាប្រធាន១នេះ។រឿងបោះឆ្នោត
មិនថានៅប្រទេសណាទេ បើគ្មានការពិនិត្យឱ្យបាន
ដឹតដល់ទេ ក្រុមអ្នកមានល្បិច នៅតែមានប្រៀប
ជាង អ្វីដែលពិបាកគឺនៅក្នុងរបបផ្ដាច់ការ ហេតុ
អ្វីអង្គការសហប្រជាជាតិបន្តគាំទ្ររបបផ្ដាច់ការភ្នំ
ពេញដែលយួនកន្ឨបនៅពីក្រោយ ឱ្យសម្លាប់
និងជាន់ឈ្លីសិទ្ធិមនុស្សនៅកម្ពុជា?
Post a Comment