+02.jpg) |
| លោកសូរិយា ស៊ូប៊ែរឌី អ្នករាយការណ៍ពិសេសផ្នែកសិទ្ធិមនុស្ស របស់អង្គការសហប្រជាជាតិប្រចាំនៅកម្ពុជា។ រូបថត ហេង ជីវ័ន |
Thursday, 13 December 2012
Bridget Di Certo
The Phnom Penh Post
ភ្នំពេញៈសេចក្តីព្រាងច្បាប់ស្តីពីលក្ខន្តិកៈចៅក្រម រចនាសម្ព័ន្ធប្រព័ន្ធតុលាការ និងកំណែទម្រង់នៃឧត្តមក្រុមប្រឹក្សានៃអង្គចៅក្រម ត្រូវបានទុកចោលអស់រយៈពេលជិត២០ឆ្នាំមកហើយ ធ្វើឲ្យលោក សូរិយា ស៊ូប៊ែរឌី អ្នករាយការណ៍ពិសេសរបស់អង្គការសហប្រជា-ជាតិចង់ដឹងអំពីមូលហេតុ ។
លោកសាស្រ្តាចារ្យច្បាប់នៃសាកលវិទ្យាល័យ Leeds រូបនេះបានប្រាប់ភ្នំពេញ ប៉ុស្តិ៍ កាលពីថ្ងៃអង្គារថា៖ «ប្រព័ន្ធតុលាការជាបញ្ហាសំខាន់[នៅកម្ពុជា]។ អ្វីគ្រប់យ៉ាងស្ថិតនៅលើប្រព័ន្ធតុលាការ ដូច្នេះ បញ្ហានោះ ត្រូវដោះស្រាយឲ្យបានត្រឹមត្រូវ។ គឺមិនត្រឹមតែឯករាជភាពនៃប្រព័ន្ធតុលាការទេ គឺថែមទាំងសមត្ថភាពរបស់ប្រព័ន្ធតុលាការផងដែរ»។
របាយការណ៍ ទី១នៃរបាយការណ៍បួនរបស់លោក ស៊ូប៊ែរឌី ស្តីពីស្ថានការណ៍សិទិ្ធមនុស្សនៅកម្ពុជា បានពិនិត្យលើប្រព័ន្ធតុលាការ និងស្នើអនុសាសន៍ចំនួន៣៦ ដល់រដ្ឋាភិបាល។ លោក ស៊ូប៊ែរឌី បានថ្លែងថា៖ «អនុសាសន៍ទាំងនេះគួរធ្វើតាម មិនមែនសុទ្ធតែទាំងអស់ទេដែលត្រូវការពេលវេលានោះ។ ប៉ុន្តែ ឧទាហរណ៍ ច្បាប់ស្នូលទាំងបីនេះមិនត្រូវឲ្យមានធនធានបន្ថែមច្រើនទេ ព្រោះវាជាផ្នែកនៃកម្មវិធីច្បាប់របស់រដ្ឋាភិបាល»។ «ខ្ញុំចង់ស្វែងយល់ថាតើអ្វីជាការលំបាក មូលហេតុអ្វីបានជាមានភាពយឺតយ៉ាវ ហើយតើខ្ញុំអាចជួយ[រដ្ឋាភិបាល]ដោយរបៀបណា ដើម្បីដាក់អនុវត្ត[ច្បាប់ទាំងនេះ]»។
កាលពី២ឆ្នាំមុន ការពិភាក្សារបស់លោក ស៊ូប៊ែរឌី ជាមួយនឹងរដ្ឋាភិបាលស្តីពីច្បាប់ដែលនឹងបង្កើតជាក្របខ័ណ្ឌសម្រាប់ ប្រព័ន្ធតុលាការកាន់តែរឹងមាំ មានឯករាជ្យ និងប្រសិទ្ធភាពថែមទៀត បានបង្ហាញជាសញ្ញាថា សេចក្តីព្រាងច្បាប់អាយុ ២០ ឆ្នាំទាំងនេះកំពុងដំណើរការទៅមុខ។ ប៉ុន្តែ រហូតមកដល់ពេលនេះ សេចក្តីព្រាងច្បាប់ទាំងនេះ មិនត្រូវបានដាក់ក្នុងរបៀបវារៈនៅចំពោះមុខរដ្ឋសភាទេ។
លោក ស៊ូប៊ែរឌី បានបន្តថា ជាប្រទេសអភិវឌ្ឍន៍ ការផ្តោតរបស់កម្ពុជាគឺលើការអភិវឌ្ឍសេដ្ឋកិច្ច។ «ប៉ុន្តែ មនុស្សច្រើនថែមទៀតនឹងចង់វិនិយោគយកជាការ ប្រសិនបើប្រព័ន្ធតុលាការត្រូវបានចាត់ទុកថាជាប្រព័ន្ធយុតិ្តធម៌ ដែលមានប្រសិទ្ធភាព មិនលម្អៀង ឆាប់រហ័ស រឹងមាំ និងមានឯករាជ្យ។ ការអភិវឌ្ឍសេដ្ឋកិច្ច និងកំណែទម្រង់ប្រព័ន្ធតុលាការគឺជាផ្នែកនៃកញ្ចប់តែមួយ»។
លោក បានបន្ថែមថា ប្រព័ន្ធតុលាការ ត្រូវតែមានប្រសិទ្ធភាពមានជំនឿជឿជាក់ និងទំនុកចិត្តពីប្រជាជន។ «ក្នុងករណីខ្លះ មនុស្សត្រូវបានចាប់ខ្លួននៅយប់ថ្ងៃសុក្រ ហើយផ្តន្ទាទោសនៅព្រឹកថ្ងៃចន្ទ។ នោះមិនមែនជាការល្អទេ»។
វប្បធម៌និទ្ទណ្ឌភាព និងការគោរពអ្នកមាននិងអ្នកមានអំណាចគឺជាឧបសគ្គមួយទៀត ចំពោះការ អភិវឌ្ឍដែលចាំបាច់ត្រូវដោះស្រាយ។ លោកបានលើកឡើងថា៖ «ប្រសិនបើចៅក្រមសម្រេចសេចក្តីថ្ងៃនេះថាមិនប្រឆាំងនឹងអ្នកមាន និងអ្នកមានអំណាច ចៅក្រមត្រូវតែដេកលក់ស្រួល ដោយដឹងថា ការងាររបស់ពួកគេនឹងមានសុវត្ថិភាពនៅថ្ងៃស្អែក»។
លោកស៊ូប៊ែរឌី បានថ្លែងថា ក្នុងអំឡុងបេសកកម្មស្វែងរកការពិតសម្រាប់របាយការណ៍ឆ្នាំ ២០១០ ស្តីពីកំណែទម្រង់តុលាការ លោកបានជួបមន្រ្តីក្រសួងមហាផ្ទៃ ហើយបានពិនិត្យបញ្ជីរឿងក្តីជាច្រើនដែលលោកបានប្រមូលផ្តុំ ដែលមិនត្រូវបានស៊ើបអង្កេតដោយត្រឹមត្រូវ។ «គេបានធានាចំពោះខ្ញុំថា រឿងក្តីទាំងនេះ បានស៊ើបអង្កេតយ៉ាងត្រឹមត្រូវ ហើយប្រសិនបើចាំបាច់នឹងទទួលបានជំនួយមួយចំនួនពី FBI ឬស្ថាប័នអន្តរជាតិដទៃទៀត»។ វាគឺជាការធានារបស់រដ្ឋាភិបាលដែលលោក ស៊ូប៊ែរឌី មានបំណងតាមដានក្នុងអំឡុងបេសកកម្មរបស់លោកមកកម្ពុជាក្នុងសប្តាហ៍ នេះ។
ខណៈដែលលោក ស៊ូប៊ែរឌី ថា លោកចង់ឃើញកិច្ចសហប្រតិបតិ្តការថែមទៀតពីរដ្ឋាភិបាល លោកបានថ្លែងថា វាឆាប់ពេកហើយក្នុងសប្តាហ៍នេះ ក្នុងការនិយាយអំពីកិច្ចសហប្រតិបតិ្តការរបស់រដ្ឋាភិបាល។ លោក ស៊ូប៊ែរឌី បន្ថែមថា៖ «មានឡើង និងចុះ។ មានពេលខ្លះ ខ្ញុំមានទំនាក់ទំនងល្អ ហើយពេលខ្លះទៀត ទំនាក់ទំនងមិនល្អ»។ លោកបន្ថែមថា លោកមិនបាក់ទឹកចិត្តទេ។ លោកគូសបញ្ជាក់ថា៖ «ទាក់ទងនឹងការរិះគន់ខ្ញុំថា ជាសំឡេងរបស់ក្រុមប្រឆាំង នេះគ្រាន់តែជាបុគ្គលប៉ុណ្ណោះ រដ្ឋាភិបាលផ្ទាល់បានអញ្ជើញខ្ញុំ លើកនេះ។ ខ្ញុំនៅទីនេះជាភ្ញៀវរបស់រដ្ឋាភិបាល»៕
No comments:
Post a Comment