ហ៊ុន សែន ខ្លាច អ្នករាយការណ៍ ពិសេស របស់អ.ស.ប ស៊ូប៊ែរឌី ឡើងរួញខ្លួន បានជាមិនហ៊ានជួបគេ

មិនជួបទេ! មិនជួបទេ!

ហ៊ុន សែន បដិសេធ មិនជួបអ្នក រាយការណ៍ ពិសេស របស់អ.ស.ប ស៊ូប៊ែរឌី

Thursday, 13 December 2012 
ដោយ៖ ដើមអម្ពិល (DAP)
 

ភ្នំពេញ ៖ សម្ដចនាយករដ្ឋមន្ដ្រី ហ៊ុន សែន បានប្រកាស នៅព្រឹកថ្ងៃទី១៣ ខែធ្នូ ឆ្នាំ២០១២ថា សម្ដេចគ្មាន ពេលវេលាណា មួយ ជួបជាមួយអ្នក រាយការណ៍ពិសេស របស់អង្គការសហប្រជាជាតិ លោកសូរិយា ប្រាសាទ ស៊ូប៊ែរឌីនោះឡើយ បន្ទាប់ពីអ្នករាយការណ៍ ពិសេសរូបនេះ បានផ្ដល់កិច្ចសម្ភាសន៍មួយ ជាមួយវិទ្យុបរទេសថា ក្នុងដំណើរ ទស្សនកិច្ច របស់លោក មកកាន់ប្រទេសកម្ពុជាលើកនេះ នឹងចូលជួបពិភាក្សាការងារជាមួយសម្ដេច នាយករដ្ឋមន្ដ្រី និងចូលក្រាបបង្គំទូលថ្វាយ សម្ដេចព្រះករុណា ព្រះបរមនាថនរោត្ដមសីហមុនី ។

នៅក្នុងពិធីអញ្ជើញ ប្រគល់សញ្ញាបត្រ ជ័យលាភី និងប្រគល់អាហារូបករណ៍ដល់និស្សិត នៃសាកលវិទ្យាល័យកម្ពុជា នាព្រឹកថ្ងៃទី១៣ ខែធ្នូ ឆ្នាំ២០១២ នៅវិទ្យាស្ថាន ជាតិអប់រំ សម្ដេចតេ

ជោ បានមានប្រសាសន៍ថា គ្មានពេលវេលាជួបជាមួយលោកស៊ូប៊ែរឌី នោះ ឡើយ ហើយបទសម្ភាសន៍ជាមួយវិទ្យុបរទេសថានឹងជួបសម្ដេចនោះគឺនៅពេល ដែលសម្ដេចមិនបានដឹងទាល់តែសោះ ហើយសម្រាប់ព្រះមហាក្សត្រវិញ ព្រះអង្គកំពុងតែជាប់រវល់និងពិធីកាន់ព្រះរាជមរណៈទុក្ខ របស់ព្រះបិតា ។

សម្ដេចនាយករដ្ឋមន្ដ្រី បានបញ្ជាក់ថា ក្នុងនាមជានាយករដ្ឋមន្ដ្រី នៃរដ្ឋអធិបតេយ្យ មួយមិនអាចធ្វើតាមអនុសាសន៍របស់គេបានឡើយ សូម្បីតែអគ្គលេខាធិការ អង្គការសហប្រជាជាតិក៏គ្មានសិទ្ធិមកកៀបសង្កត់និងបង្ខំឱ្យ អនុវត្ដតាមអនុសាសន៍របស់គេដែរ ។

សម្ដេចតេជោ បានសង្កត់ធ្ងន់ថា មានតែយើងទេដែលអាចបោះឆ្នោតជ្រើសរើសអគ្គលេខាធិការអង្គការសហប្រជាជាតិប៉ុន្ដែអគ្គលេខាធិការអង្គការសហប្រជាជាតិពុំមានសិទ្ធិមកបង្ខំឱ្យយើងអនុវត្ដអនុសាសន៍របស់គេនោះឡើយ ។

សម្ដេចតេជោ បានបញ្ជាក់ថា សម្ដេច ទទួលខុសត្រូវតែចំពោះមុខរដ្ឋសភា របស់ ប្រទេសកម្ពុជា ពីព្រោះរដ្ឋសភា ត្រូវបាន ប្រជាពលរដ្ឋបោះឆ្នោតគាំទ្រ ហើយរដ្ឋសភា បោះឆ្នោតជ្រើសរើសនាយករដ្ឋមន្ដ្រី ។

សូមបញ្ជាក់ថា អ្នករាយការណ៍ពិសេស របស់អង្គការសហប្រជាជាតិ រូបនេះ បាននឹង កំពុងបំពេញទស្សនកិច្ចជាថ្មីម្ដងទៀត នៅ កម្ពុជា ក្នុងគោលបំណង ដើម្បីពិនិត្យមើល ពីវឌ្ឍនភាពនៃកំណែទម្រង់ប្រព័ន្ធតុលាការ ក្នុងប្រទេសកម្ពុជា ។