សហគមន៍​ជួប​ការ​បណ្តេញ​ចេញ​ពី​​ដី​ធ្លី​ដាក់​ញត្តិ​ទៅ​ស្ថាន​ទូត​បារាំង

ប្រជាពលរដ្ឋស្រែកតវ៉ាមុខស្ថានទូតបារាំង ព្រឹកថ្ងៃព្រហស្បតិ៍នេះ។រូបថតស្រេង ម៉េងស្រ៊ុន

Thursday, 31 January 2013

ឃុត សុ​ភ​ចរិយា ភ្នំពេញប៉ុស្តិ៍

 

ប្រជាពលរដ្ឋ​ក្នុង​សហគមន៍ថ្មគោល ជាប់​ព្រលានយន្តហោះ​អន្តរជាតិ​ភ្នំពេញ​ រួម​ទាំង​ប្រជាពលរដ្ឋ​ក្រី​ក្រមក​ពី​សហគមន៍​មួយចំនួន​ទៀត​ក្នុង​រាជធានី​ ភ្នំពេញ សរុប​ប្រមាណ​ជាង​១០០នាក់ បាន​នាំគ្នា​ទៅ​តវ៉ា​នៅ​មុខ​ស្ថាន​ទូត​បារាំង​ប្រចាំ​កម្ពុជា ដើម្បី​ដាក់​ញតិសុំ​កិច្ច​អន្តរាគមន៍​ពី​លោក​ឯក​អគ្គរដ្ឋ​ទូត Jean Marc Ayrault ឲ្យជួយ​ជម្រុញ​ទៅ​ក្រុម​ហ៊ុន​បារាំង​មួយ ដែល​ទទួល​បាន​គម្រោង​អភិវឌ្ឍន៍​ពង្រីកព្រលានយន្តហោះ​នេះ និង អាជ្ញាធរ​ដែន​ដី បញ្ឈប់​នូវ​ផែន​ការ​បណ្ដេញ​ពលរដ្ឋ​ក្នុង​សហគមន៍​របស់​ពួក​គេ​ដោយ​បង្ខំ។

អ្នកស្រី ច្រាយ នីម តំណាង​ពលរដ្ឋ​មកពី​សហគមន៍​ថ្មគោល បាន​ប្រាប់​ភ្នំពេញ​ប៉ុស្តិ៍​នៅ​កន្លែង ​ដែលមាន​ការ​ជួប​ប្រជុំ​តវ៉ា​នេះ​ថា បច្ចុប្បន្ន ប្រជាពលរដ្ឋ​ក្នុង​សហគមន៍​របស់​ពួក​គាត់ ចំនួន​១៨២​គ្រួសារ ​កំពុងព្រួយ​កង្វល់​ជា​ខ្លាំង ចាប់តាំងពួកគាត់ ទទួល​បានលិខិតពី​អាជ្ញាធរដែនដី កាលពី២៥​ខែកក្កដា​ឆ្នាំ​មុន ដែល​ក្នុង​លិខិត​នោះ​បាន​បង្ខំ​ឲ្យពួកគាត់ ដែល​មាន​ផ្ទះ​ក្នុង​រង្វង់​១០​ម៉ែត្រពី​របង​ព្រលានយន្ត​ហោះអន្តរជាតិ​ ភ្នំពេញ ធ្វើការ​រុះរើផ្ទះ​ចេញក្នុង​រយៈពេល​៧​ថ្ងៃឲ្យរួច ដោយ​មិន​បានបញ្ជាក់​ពី​ការផ្ដល់​សំណង​អ្វី​ទាំង​អស់​។

អ្នកស្រី​បាន​បន្តថា ដោយ​ក្ដី​បារម្ភ​ ខ្លាច​បាត់​បង់​ទី​ជម្រកសម្រាប់​ស្នាក់អាស្រ័យ ពួកគាត់​បានដាក់​ញតិសុំកិច្ច​អន្តរាគមន៍​ពី​គ្រប់​ស្ថាប័ន​ពាក់ព័ន្ធ រួម​ទាំង​ការ​សរសេរ​សារ (SOS) នៅ​លើ​ដំបូល​ផ្ទះ ដើម្បី​ទាក់​ទាញ​ចំណាប់​អារម្មណ៍​ពី​បណ្ដាមេដឹក​នាំ​សំខាន់​ៗ​ ក្នុង​ពិភព​លោក ពី​សេស​លោក ប្រធានាធិបតី​អាមេរិក បារ៉ាក់ អូបាម៉ា ដែល​បាន​អញ្ជើញ​មកចូល​រួម​ក្នុង​កិច្ច​ប្រជុំ​កំពូល​អាស៊ាន នៅ​កម្ពុជា ឲ្យ​ជួយ​អន្តរាគមន៍។

អ្នកស្រី​ថ្លែងថា៖«ក្នុងអំឡុងពេល​នោះ នាង​ខ្ញុំ និង​ប្រជាពលរដ្ឋ​ចំនួន៧នាក់​ផ្សេង​ទៀត ត្រូវបាន​សមត្ថកិច្ច​ខណ្ឌពោធិសែនជ័យ ចាប់​ឃុំខ្លួនអស់​រយៈពេលជាង​១០​ម៉ោង បន្ទាប់​ពី​ពួកគាត់​បានបដិសេធ មិនលុបរូបភាព​លោក​អូបាម៉ា និង​សារ SOS នៅលើដំបូលផ្ទះ​របស់​ខ្លួន»។

សូមរង់ចាំអានព័ត៌មានពិស្តារក្នុងកាសែតភ្នំពេញប៉ុស្តិ៍