ពលរដ្ឋ​បុរី​កីឡា​បន្ត​សុំ​អន្តរាគមន៍​ពី​ធនាគារ​ពិភព​លោក

ពលរដ្ឋបុរីកីឡា សុំអន្តរាគមន៍ពីធនាគារពិភពលោក​នៅវត្ត​បុទុម​នៅ​ព្រឹក​ថ្ងៃ​សុក្រ​នេះ។​រូប​ថត​ហេង ជីវ័ន

Friday, 11 January 2013

លាង ផាន់ណារ៉ា ភ្នំពេញប៉ុស្តិ៍

ភ្នំពេញៈ ប្រជាពលរដ្ឋ​នៅ​សហគមន៍​បុរី​កីឡា​ដែល​រង​ការ​ឈូស​ឆាយ​ផ្ទះ​សម្បែង ដោយ​ក្រុម​ហ៊ុន​ផាន​អ៊ីម៊ិចបាន​នាំ​គ្នា​ឈរ​តវ៉ា​នៅ​មុខ​វត្ត​បុទុម  ដើម្បី​ស្នើ​សុំ​ការ​អន្តរាគមន៍​ពី​នាយក​ធនាគារ​ពិភព​លោក ជួយ​ឲ្យ​រដ្ឋាភិបាល​កម្ពុជា​ជម្រុញ​ឲ្យ​ ក្រុមហ៊ុន​ផាន​អ៊ីម៊ិច គោរព​នូវ​កិច្ច​សន្យា​សាង​សង់​ឲ្យ​គ្រប់​ចំនួន ១០​អគារ។

សហគមន៍​បុរី​ កីឡា​នៅ​សង្កាត់​វាល​វង់ ខណ្ឌ​មករា រាជធានី​ភ្នំពេញ ត្រូវ​បាន​រាជ​រដ្ឋាភិបាល​កម្ពុជា​ប្រគល់​នូវ​ដី​សម្បទាន​សង្គម​កិច្ច​ចំនួន ៤.៦០​ហិចតា អភិវឌ្ឍន៍​នៅ​ហ្នឹង​កន្លែង ហើយ​បាន​ដោះ​ដូច​ឲ្យ​ក្រុម​ហ៊ុន ផាន​អ៊ីម៊ិច ២.៦០​ហិចតា នៅ​សល់ ២​ហិចតា​សម្រាប់​សាង​សង់​អគារ​ចំនួន ១០​កម្ពស់ ៦​ជាន់​ជូន​ប្រជាពលរដ្ឋ​នៅ​សហគមន៍​បុរី​កីឡា​ជា​ថ្នូរ​ដី ២.៦០​ហិចតា ប៉ុន្តែ ក្រុម​ហ៊ុន ផាន​អ៊ីម៊ិច មិន​បាន​គោរព​នូវ​កិច្ច​សន្យា​ដែល​បាន​ចុះ​ថ្ងៃ ០៥ ខែ​មករា ឆ្នាំ​២០០៤។

យោងតាមលិខិតដាក់ជូនធនគារពិភពលលោក ពលរដ្ឋបានរៀបរាប់ថា ក្រុមហ៊ុន​ផានអ៊ីម៊ិច​បាន​សាង​សង់​ត្រឹម​តែ ៨​អគារ ប៉ុណ្ណោះ បណ្តាល​ឲ្យ​ពលរដ្ឋ​សហគមន៍​បុរី​កីឡា​ខ្លះ សព្វថ្ងៃ​រស់​នៅ​លំបាក​វេទនា ក្នុង​តង់​ក្បែរ​គំនរ​សម្រាម និង​គ្រួសារ​រស់​នៅ​ក្រោម​ជណ្តើរ និង​មាន​ការ​បោះ​សម្រាម និង​ចោល​កន្ទុយ​បារី​មក​ពី​ខាង​លើ។ ដោយសារ នៅថ្ងៃទី០៣ ខែមករា ឆ្នាំ ២០១២ ក្រុមហ៊ុន​ផាន​អ៊ីម៊ិច​បាន​ប្រើ​ប្រាស់​គ្រឿង​ចក្រ​ដោយ​យក​កង​កម្លាំង​ ចម្រុះ ប្រដាប់​អាវុធ​មាន​ឧស្ម័ន​បង្ហូរ​ទឹក​ភ្នែក ហើយ​យក​មក​ឈូស​កំទេច​ផ្ទះ​សម្បែង គ្មាន​ប្រាប់​ដំណឹង​ជា​មុន និង​គ្មាន​ដីកា​ពី​តុលាការ។