ឧបការី​រដ្ឋ​មន្រ្តី​​​ការ​បរទេស​អាមេរិក​មក​ទស្សន​កិច្ច​នៅ​កម្ពុជា​សប្តាហ៍​ក្រោយ

លោក Michael Posner ឧបការី​រដ្ឋមន្រ្តី​​ក្រសួង​ការបរទេស​សហរដ្ឋ​អាមេរិក ទទួល​បន្ទុក​លទ្ធិ​ប្រជា​ធិប​តេយ្យ សិទ្ធិ​មនុស្ស និង​ការងារ។

Friday, 15 February 2013
ភ្នំពេញប៉ុស្តិ៍

លោក Michael Posner ឧបការី​រដ្ឋមន្រ្តី​​ក្រសួង​ការបរទេស​សហរដ្ឋ​អាមេរិក ទទួល​បន្ទុក​លទ្ធិ​ប្រជា​ធិប​តេយ្យ សិទ្ធិ​មនុស្ស និង​ការងារ នឹង​មក​ធ្វើ​ទស្សន​កិច្ច​នៅ​ប្រទេស​កម្ពុជា នៅ​ថ្ងៃ​អង្គារ ទី ១៩ ខែ​កុម្ភៈ ឆ្នាំ ២០១៣។

យោង​តាម​សេចក្តី​ប្រកាស​ព័ត៌មាន​របស់​ស្ថាន​ទូត​អាមេរិក​ប្រចាំ​កម្ពុជា បាន​ឲ្យ​ដឹង​នៅ​ថ្ងៃ​សុក្រ​នេះ​ថា នៅ​ក្នុង​អំឡុង​ពេល​ទស្សន​កិច្ច​នេះ លោក​ឧបការី Posner នឹង​ជួប​ជាមួយ មន្រ្តី​រដ្ឋាភិបាល និងអង្គ​ការ​មិន​មែន​រដ្ឋាភិបាល ដើម្បី​ពិភាក្សា​អំពី​បញ្ហា​សិទ្ធិ​មនុស្ស សេរីភាព​នយោបាយ និង​ការ​ប្រយុទ្ធ​ប្រឆាំង​អំពើ​ពុក​រលួយ។

លោក​ឧបការី Posner នឹង​ធ្វើ​សន្និសីទ​សារព័ត៌មាន​នៅ​ថ្ងៃអង្គារ ទី១៩ ខែកុម្ភៈ វេលា​ម៉ោង ៥ រសៀល នៅ​ស្ថាន​ទូត​សហរដ្ឋ​អាមេរិក ក្នុង​ទីក្រុង​ភ្នំពេញ។ ក្នុង​សន្និសីទ​សារព័ត៌មាន​នេះ លោក​ឧប​ការី Posner នឹង​ធ្វើ​សេចក្តី​ថ្លែង​ការណ៍​ខ្លី​មួយ។