ព្រះរាជពិធី​ដង្ហែរ​ព្រះបរមសព​ ពី​ព្រះបរមរាជវាំង​ ទៅកាន់​វាល​ព្រះមេរុ​

ក្បួន​ដង្ហែរ​ព្រះ​បរមសព សម្តេច​តា

REUTERS/Samrang Pring

ថ្ងៃ សុក្រ 01 កុម្ភៈ 2013

ដោយ លី ម៉េងហួរ 

Radio France Internationale

យ៉ាងណា ​ក៏ដោយ នៅ​ព្រឹកមិញ នៅ​ពេល​ព្រះ​បរម​សព ដង្ហែរ​​ចេញ​ពី​ព្រះបរមរាជវាំង បាន​បន្តិច លោក​ឧបនាយក​រដ្ឋមន្ត្រី សុខ អាន រដ្ឋ​មន្ត្រី​ទទួល​បន្ទុក​ទី​ស្តីការ​គណៈ​រដ្ឋមន្ត្រី បាន​ដួល​សន្លប់ ហើយ​ត្រូវ​អង្គរក្ស សែង​ចេញ​ពី​អង្គ​ពិធី។ លោក សុខ អាន ទើប​នឹង​វិល​ត្រឡប់​មក​ពី​ប្រទេស​បារាំង កាល​ពី​ថ្ងៃ​៣១ ​មករា ម្សិលមិញ

នៅ​ព្រឹក​ថ្ងៃ​សុក្រ​នេះ ក្បួន​ដង្ហែរ​​ព្រះ​បរមសព​សម្តេច​ព្រះ​មហាវីរ​ក្សត្រ នរោត្តម សីហនុ ត្រូវ​បាន​ប្រារព្ធ​ឡើង យ៉ាង​អធិកអធម​ចេញ​ពី​មុខ​ព្រះ​បរមរាជវាំង ទៅកាន់​វត្តភ្នំ និង​បន្ត​ទៅ​កាន់​វិមានឯករាជ្យ មុន​នឹង​វិល​ទៅ​កាន់​វាល​ព្រះមេរុ។​ ​ក្បួន​ដង្ហែរ​ព្រះបរមសព ដែល​ចំណាយ​ពេល​ប្រហែល ៣ ម៉ោង​នោះ មាន​ព្រះរាជវង្សានុវង្ស ថ្នាក់​ដឹកនាំ​ប្រទេស មន្ត្រី​រាជការ​ ដោយ​បែង​ចែក​ជា​​ ១១ ផែន ហើយ​​សរុប​អ្នកចូលរួមក្នុង​ក្បួន​ដង្ហែ​ប្រមាណ ៥០០០ នាក់។ ចំណែក​មហាជន​​នៅ​អម​សង្ខាង​ផ្លូវ ដែលបាន​ស្កាត់​​​មកពីបណ្តា​ខេត្ត ​ទូទាំង​ប្រទេស មាន​ប្រមាណ​ជិត ២០ ម៉ឺន​នាក់។​

ក្បួន​ដង្ហែរ​ព្រះ​បរមសព សម្តេច​តា នៅ​ព្រឹកមិញ បាន​ប្រារព្ធ​ឡើង​យ៉ាង​អធិកអធម និង​ពុំ​ធ្លាប់​មាន​​ពី​​មុន​ឡើយ។ ក្បួន​ដង្ហែរ​មាន​ប្រវែង​ប្រមាណ ២ គីឡូម៉ែត្រ បាន​ចំណាយ​ពេល​ប្រហែល ៣ ម៉ោង​ ដែល​បាន​​ដង្ហែរ​ចេញ​ពី​មុខ​ព្រះ​បរមរាជវាំង តាម​តីរវិថី​ព្រះស៊ីសុវត្ថិ នៅ​ជួរ​មាត់​ទន្លេ ធ្វើ​ដំណើរ​​ត្រង់​រហូត​ដល់​ផ្លូវ​លេខ ៩៤ រួច​បត់​ឆ្វេង ដោយ​ធ្វើ​ដំណើរ​ជុំវិញ​រង្វង់​មូល​រមណីយដ្ឋាន​វត្តភ្នំ រហូត​ដល់​មហាវិថី​ព្រះ​នរោត្តម រួច​ធ្វើ​ដំណើរ​ត្រង់​ដល់​រង្វង់​មូល​វិមានឯករាជ្យ ដោយ​ឆ្លង​កាត់​មហាវិថី​ព្រះ​សីហនុ ហើយ​បត់​ឆ្វេង តាម​មហា​វិថី​សម្តេច​សុធារស ចូល​វាល​ព្រះមេរុ។

ព្រះរាជ​ពិធី​រំកិល​ព្រះ​បរម​មញ្ឈូស តម្កល់​លើ​ព្រះ​មហា​បញ្ចា ក្នុង​ព្រះមេរុ និង​ដង្ហែរ​​ប្រទក្សិណ ព្រម​ទាំង​ព្រះរាជ​ពិធី​ចូល​ថ្វាយបង្គំ​ព្រះ​បរមសព ចប់​រួច​រាល់​រហូត​ដល់​ម៉ោង​ជិត ២ រសៀល។​
ក្បួន​ដង្ហែរ​​នោះ មាន ១១ ផែន មាន​អ្នក​ចូលរួម​ប្រមាណ ៥​ពាន់​នាក់ ដែល​រួម​មាន ផែន​មន្ត្រី​រាជការ និស្សិត សិស្ស ប្រជា​ពលរដ្ឋ ទាហាន កង​រាជ​អាវុធហត្ថ នគរបាល​ជាតិ យុវជន​កាយឫទ្ធិ ព្រះសង្ឃ ដូនជី តាអាចារ្យ ជនជាតិ​ដើម​ភាគតិច ជនជាតិ​អ៊ីស្លាម ជនជាតិ​ចិន និង​ជនជាតិ​វៀតណាម ដែល​រស់​នៅ​លើ​ទឹកដី​កម្ពុជា ជាដើម។​
រី​ឯ​មហាជន​ស្លៀកពាក់​កាន់​ទុក្ខ បាន​អង្គុយ​សំពះ​ប្រណម ដោយ​ទឹក​ចិត្ត​ក្រៀមក្រំ ហើយ​អ្នកខ្លះ​យំ នៅ​អម​សង​ខាង​ផ្លូវ​ពី​វត្ត​ភ្នំ​ទៅ​វិមាន​ឯករាជ្យ និង​បន្ត​ទៅ​កាន់​ព្រះ​បរមរាជវាំង។ ប៉ុន្តែ​មិន​មាន​មហាជន នៅ​អម​សង្ខាង​ផ្លូវ​ជួរ​មាត់​ទន្លេ ពី​មុខ​វាំង​ទៅកាន់​វត្ត​ភ្នំ​ទេ។​
អគ្គ​ស្នងការ​រង​នគរបាល​ជាតិ និង​ជា​ស្នងការ​ប៉ូលិស​រាជធានី​ភ្នំពេញ លោក​ឧត្តមសេនីយ៍ឯក ជួន សុវណ្ណ បាន​ឲ្យ​ដឹង​នៅ​រសៀល​ថ្ងៃ​ទី​១ ខែ​កុម្ភៈ ឆ្នាំ​២០១៣ ថា ព្រះ​រាជពិធី​ដង្ហែរ​​ព្រះ​បរមសព​សម្តេច​តា នៅ​ព្រឹក​មិញ មិន​មាន​បញ្ហា​អ្វី​កើតឡើង​ទេ។
ចំពោះ​ចំនួន​ប្រជា​ពលរដ្ឋ​នៅ​ភ្នំពេញ និង​មក​ពី​បណ្តា​ខេត្ត​នានា មក​ចូលរួម​ព្រះរាជ​ពិធី​ដង្ហែរ​​ព្រះ​បរមសព ត្រូវ​បាន​លោក​ឧត្តមសេនីយ៍​ឲ្យ​ដឹង​ថា មាន​ជិត ២០ ម៉ឺន​នាក់។
យ៉ាងណា​ក៏ដោយ នៅ​ព្រឹកមិញ នៅ​ពេល​ព្រះ​បរម​សព ដង្ហែរ​​ចេញ​ពី​ព្រះបរមរាជវាំង បាន​បន្តិច លោក​ឧបនាយក​រដ្ឋមន្ត្រី សុខ អាន រដ្ឋ​មន្ត្រី​ទទួល​បន្ទុក​ទី​ស្តីការ​គណៈ​រដ្ឋមន្ត្រី បាន​ដួល​សន្លប់ ហើយ​ត្រូវ​អង្គរក្ស សែង​ចេញ​ពី​អង្គ​ពិធី។ លោក សុខ អាន ទើប​នឹង​វិល​ត្រឡប់​មក​ពី​ប្រទេស​បារាំង កាល​ពី​ថ្ងៃ​៣១ ​មករា ម្សិលមិញ៕