តំណាងរាស្រ្ត បក្សប្រឆាំង ស្នើឲ្យសម្តេចតេជោ ពិនិត្យលើសំណើ បក្សប្រឆាំង កាលពីថ្ងៃទី១៤ ខែតុលា ឆ្នាំ២០១១ ឡើងវិញ

លោកស្រី មួរ សុខហួរ តំណាងរាស្រ្តបក្សប្រឆាំង សម រង្ស៊ី មណ្ឌលកំពត

 

Friday, 08 February 2013 13:47 ដោយៈ ដើមអម្ពិល (DAP)-ID: 010

 

ភ្នំពេញ៖ តំណាងរាស្រ្តបក្សប្រឆាំង សម រង្ស៊ី មណ្ឌលកំពត លោកស្រី មួរ សុខហួរ បានសម្តែងនូវ ជំហររបស់ លោកស្រីជាថ្មីម្តងទៀតក្នុងការសើ្នឲ្យប្រមុខ រាជរដ្ឋាភិបាល កម្ពុជា សម្តេចតេជោ ហ៊ុន សែន ពិនិត្យ និងសើរើ ឡើងវិញពីសំណើរបស់ក្រុមតំណាងរាស្រ្ត បក្សប្រឆាំងសម រង្ស៊ី កាលពីថ្ងៃទី១៤ ខែតុលា ឆ្នាំ២០១១។

សំណើរបស់ក្រុមតំណាងរាស្រ្ត បក្សប្រឆាំងចុះថ្ងៃទី១៤ ខែតុលា ឆ្នាំ២០១១ គឺជាសំណើដែលសុំឲ្យសម្តេច តេជោ ហ៊ុន សែន នាយករដ្ឋមន្រ្តីកម្ពុជា ពិនិត្យ និងចាត់វិធានការតាមផ្លូវច្បាប់ ដើម្បីធានាសុវត្ថិភាពជូនពលករ ពលការិនីខ្មែរ នៅក្រៅប្រទេស។

លោកស្រី មួរ សុខហួរ តំណាងរាស្រ្តបក្សប្រឆាំងសម រង្ស៊ី មណ្ឌលកំពត បានបញ្ជាក់នូវជំហរបែបនេះ គឺធ្វើឡើង នៅក្នុងសន្និសីទសារព័ត៌មានមួយនៅព្រឹកថ្ងៃទី០៨ ខែកុម្ភៈ ឆ្នាំ២០១៣នេះ នាវិមានរដ្ឋសភា។

លោកស្រីបានបន្តថា «ច្បាស់ណាស់ គឺយើងនឹងសុំឲ្យរដ្ឋាភិបាលឆ្លើយពីព្រោះរហូតមកដល់ពេលនេះ ក្រសួង ការងារ មិនដែលបានឆ្លើយ ឬមួយរដ្ឋាភិបាលក៏មិនដែលបានឆ្លើយ ហើយនឹងផ្តល់ឲ្យយើង ជាអ្នកតំណាង រាស្រ្តដឹងថា ចំណុចទាំងប៉ុន្មានដែលយើងដាក់ជូនទៅសម្តេចនាយករដ្ឋមន្រ្តីថ្ងៃទី១៤ ខែតុលា ឆ្នាំ២០១១ តើរដ្ឋាភិបាលបានចាត់វិធានការអ្វីខ្លះ? រហូតដល់ពេលនេះ គឺយើងមិនដែល បានទទួលចម្លើយ ជាលាយ លក្ខណ៍អក្សរក្តី តាមមធ្យោបាយណាក្តី និងតាមអនុសាសន៍របស់យើងទេ»។

សូមជម្រាបផងដែរថា សំណើសុំឲ្យសម្តេចតេជោ ហ៊ុន សែន នាយករដ្ឋមន្រ្តីកម្ពុជា ពិនិត្យ និងចាត់វិធានការ តាមផ្លូវច្បាប់ ដើម្បីធានាសុវត្ថិភាពជូនពលករ ពលការិនីខ្មែរ នៅក្រៅប្រទេស ដែលមាន៧ចំណុចនោះ ត្រូវបាន ក្រុមអ្នកតំណាងរាស្រ្តបក្សប្រឆាំងបញ្ជាក់ថា ដើម្បីធ្វើឲ្យប្រសើរដល់ការអនុវត្តច្បាប់ស្តីពីការងារ និងអនុសញ្ញា អន្តរជាតិស្តីពីពលកម្មនានា ព្រមទាំងបញ្ហាទេសន្តរប្រវេសន៍ និងការធានាសុវត្ថិភាពដល់ពលករខ្មែរចំណាកស្រុក ជាពិសេសពលការិនី ប្រយោជន៍ការពារតម្លៃ កិត្តិយស និងសេចក្តីថ្លៃថ្នូររបស់ស្រ្តីខ្មែរ ដែលជាឆ្អឹងខ្នង នៃសេដ្ឋកិច្ច ជាតិ៕