មហាក្សត្រយាងទៅពេទ្យ អ្នកជូនដំណើរសំដែងទឹកមុខដូចជាសម្បាយចិត្តច្រើន!!!

ព្រះមហាក្សត្រ នរោត្តម សីហមុនី និង​សម្តេចម៉ែ យាង​ទៅពិនិត្យ​ព្រះរាជសុខភាព នៅ​ប្រទេស​ចិន​

ថ្ងៃទី 21 កុម្ភៈ 2013 | ដោយ: រតនា
Cambodia Express News

​ភ្នំពេញ: ព្រះមហាក្សត្រ សម្តេចព្រះបរមនាថ នរោត្តម សីហមុនី និង​សម្តេចម៉ែ យាង​ទៅពិនិត្យ​ព្រះរាជសុខភាព នៅ​ប្រទេស​ចិន នៅវេលា​ម៉ោង​ ៩ ព្រឹក ថ្ងៃទី​២១ ខែកុម្ភៈ ឆ្នាំ​២០១៣ ដោយមាន​ការជូនព្រះរាជ​ដំណើរពីស​ម្តេច​តេ​ជោ ហ៊ុន សែន សម្តេច ហេង សំរិន ប្រធាន​រដ្ឋសភា សមាជិករាជវង្សានុវង្ស និង​មន្ត្រី​រដ្ឋាភិបាល​ជាច្រើន​នាក់​ទៀត​។​

ក្នុង​កិច្ចសម្ភាសន៍​ជាមួយ​ក្រុម​អ្នករាយការណ៍​ព័ត៌មាន ព្រះអង្គម្ចាស់ ស៊ីសុវត្ថិ ធម្មិកោ អតីត​លេខាធិការ​ផ្ទាល់​ព្រះមហាវីរក្សត្រ បាន​មានបន្ទូលថា សម្តេចម៉ែ និង​ព្រះករុណា នរោត្តម សីហមុនី បាន​យាង​ទៅ​ឲ្យ​ក្រុមគ្រូពេទ្យ​ចិន ត្រួតពិនិត្យព្រះរាជសុខភាព ដែលជា​ធម្មតា ការពិនិត្យ​ព្រះរាជសុខភាព​នេះ តែងតែធ្វើឡើង​ពីរដង ក្នុង​មួយឆ្នាំ​។​

​ព្រះអង្គម្ចាស់ ស៊ីសុវត្ថិ ធម្មិកោ បាន​បញ្ជាក់ថា ការយាង​ទៅ​ឲ្យ​ក្រុមគ្រូពេទ្យ​ចិន​ពិនិត្យ​ព្រះរាជសុខភាព​នោះ គឺធ្វើឡើង​ជា​លក្ខណៈ​ឯកជនរបស់​ព្រះមហាក្សត្រ និង​សម្តេចម៉ែ តែប៉ុណ្ណោះ។ ព្រះ​អង្គ នឹង​គង់នៅ​ប្រទេស​ចិនរយៈពេល​ពីរ​សប្តាហ៍។


​ព្រះអង្គម្ចាស់ ស៊ីសុវត្ថិ ធម្មិកោ បានបញ្ជាក់​បន្ថែមថា ដោយសារតែ​ប្រទេស​ចិន​ មាន​បច្ចេក​វិទ្យា និង​បច្ចេកទេស​ខ្ពស់ក្នុងការ​ត្រួតពិនិត្យសុខភាព និង​ធ្វើ​ឲ្យ​មន្ត្រី​រាជរដ្ឋាភិបាល ក៏​ទៅធ្វើ​ការពិនិត្យ​សុខភាពនៅ​ប្រទេស​ចិន​នេះ​ផងដែរ​។

សូមរម្លឹកថា ព្រះរាជដំណើររបស់ព្រះមហាក្សត្រ និងសម្តេចម៉ែ ទៅកាន់ប្រទេសចិន នាព្រឹកនេះ បានធ្វើក្រោយពីព្រះរាជពិធីបុណ្យព្រះបរមសពរបស់ព្រះមហាវីរក្សត្រ សម្តេចព្រះ នរោត្តម សីហនុ បានប្រារព្ធចប់រួចរាល់ កាលពីថ្ងៃទី៧កុម្ភៈ ឆ្នាំ២០១៣៕