សហគមន៍​ព្រៃ​ឡង់​មក​តវ៉ា​ឲ្យ​ក្រុម​ហ៊ុន CRCK​ ​របស់​វៀតណាមឈប់​ទន្រ្ទា​ន​ដី​ព្រៃ​និង​ដី​ចម្ការ​​គាត់​

ក្រុមហ៊ុន​ដី​សម្ប​ទាន​សេដ្ឋ​កិច្ច​វៀត​ណាម CRCK កំពុង​កាប់​ទន្ទ្រានដី​ព្រៃសហគមន៍ព្រៃ​ឡង់​។ រូបថត ម៉ៃ ទិត្យ​ថារ៉ា

Tuesday, 12 February 2013
ម៉ៃ ទិត្យថារ៉ា
The Phnom Penh Post

​​

កំពង់​ធំៈ បណ្តាញ​សហគមន៍​ព្រៃ​ឡង់មក​ពីខេត្ត​កំពង់​ធំ​ប្រមាណ​ជា​៣០០នាក់នឹង​ដើរ​ហែ​ក្បួន​ចេញ​ពីមុខ​ក្រុម​ហ៊ុន​វៀត​ណាម​ CRCK ឆ្ពោះ​មក​សាលា​ស្រុក​សណ្តាន់​ នៅ​ថ្ងៃ​ទី​១៣ ខែ​កុម្ភៈ ដើម្បី​ដាក់​ពាក្យ​បណ្តឹង​ស្នើ​​សុំ​ឲ្យ​​អា​ជ្ញាធរផ្អាកសកម្មភាព​បំផ្លាញ​ព្រៃ​ឈើ​របស់​ក្រុម​ហ៊ុន និង​ឈូស​ឆាយ​ទន្ទ្រានប៉ះពាល់​ដី​ចម្ការ​របស់​ពលរដ្ឋ​។

លោក​ ហឿន សុភាព តំណាង​បណ្តាញ​សហគមន៍​ព្រៃ​ឡ​ង់ មក​ពី​ខេត្ត​កំពង់ធំ បាន​ថ្លែង​ឲ្យ​ដឹង​ថា ពលរដ្ឋ​បណ្តាញ​សហគមន៍​​ព្រៃ​ឡង់​នៅ​ក្នុង​ខេត្ត​កំពង់​ធំ​​ប្រ​មាណ​ជា​៣០០​នាក់​ នឹង​ដើរ​ហែ​ក្បួន​ចេញ​ពី​ក្រុម​ហ៊ុន​ CRCK មក​ដាក់​ពាក្យ​បណ្តឹង​នៅ​ឯ​សាលា​ស្រុក​សណ្តាន់​ដើម្បី​សុំ​អន្តរាគមន៍​ពី​អាជ្ញាធរ​ស្រុក​ឲ្យ​ផ្អាកសកម្មភាព​ឈូស​បំផ្លាញ​ព្រៃ​ឈើ​របស់​ក្រុមហ៊ុន​នេះ។ លោកបានប្រាប់​ថា​៖​«បច្ចុប្បន្ន​គេ​បាន​ឈូស​ដី​ព្រៃ​ថ្មីៗ​អស់​ប្រ​មាណ​ ៣០​ ហិកតា​ហើយ​​ធ្វើ​ឲ្យ​ប៉ះពាល់​ដល់​ដី​ចម្ការ​របស់​ពលរដ្ឋ​ទៀត​។ ​នៅ​ពេល​យប់​គេ​ដុត​ព្រៃ​ឡើងភ្លើង​ឆេះ​ភ្លឺ​ដល់​ទី​រួម​ស្រុក​សណ្តាន់ទល់​ភ្លឺ»។​

លោក​​ឲ្យ​ដឹង​ទៀត​ថា​ ​​ក្រុម​ហ៊ុន​បាន​ឈូស​ឆាយ​នៅ​ក្នុង​ឃុំ​ដង​កាំបិត​ ត្រង់​ភូមិឈូក និង​ ភូមិ​សំព័រ​ធំ ដោយ​គេ​បាន​ឈូស​ឆាយ​ព្រៃ​អស់​ ហើយ​ទុក​ព្រៃ​មួយ​គុម្ពោត​​ដើម្បី​ចាប់​សត្វ​ព្រៃ​ហូប គេ​បាន​ហាម​ឃាត់​ពលរដ្ឋ​មិនឲ្យ​ចូល​ក្នុង​ចំណុច​នោះ​ទេ​ ​បើ​ពលរដ្ឋ​ណា​ចង់​ទៅ​រក​សត្វ​​ក្នុង​ព្រៃ​នោះ​ត្រូវ​តែ​ចែក​ឲ្យ​ក្រុម​ហ៊ុន​ពាក់​កណ្តាល​ទើ​បគេ​ឲ្យ​ចូល​រក​។ លោក​​ឲ្យ​ដឹង​ទៀត​ថា​៖​ «​ប្រ​សិន​បើ​អាជ្ញាធរ​មិន​​អន្តរាគមន៍​ជា​បន្ទាន់​​ទេ ​ព្រៃ​ឡង់​នឹង​ត្រូវ​បាត់​បង់ ហើយ​ពលរដ្ឋក៏​ប៉ះ​ពាល់​ជីវភាព​ធ្ងន់​ធ្ងរ​ផង​ដែរ​។ ខ្ញុំ​មាន​ភ័ស្តុតាង​គ្រប់​គ្រាន់​អំពី​សកម្មភាព​បំផ្លាញ​ព្រៃ​ឈើ​ របស់​ក្រុម​ហ៊ុន​ វៀត​ណាម​ CRCK ដើម្បី​ដាក់ជូន​ទៅ​អាជ្ញាធរ​»។

លោក​ សឹត សេង តំណាង​ពល​រដ្ឋម្នាក់​ដែរ​ដែល​បាន​យក​លិខិត​ជូន​ដំណឹង​ទៅ​ដាក់​ជូន​អាជ្ញាធរ​នៅ​ថ្ងៃ​ម្សិល​មិញ​ ដើម្បី​ជូន​ដំណឹង​ទៅ​អាជ្ញាធរ​បាន​ឲ្យ​ដឹង​ថា​ លោក​បានដាក់​លិខិត​ជូន​ដំណឹង​ឲ្យ​អាជ្ញាធរ​រួច​ហើយ​ដើម្បី​ឲ្យ​គេ​​ដឹង​មុន​។ លោក​បន្ត​​ថា​៖​«​យើង​ខ្លាច​អាជ្ញាធរ​​ភ្ញាក់​ផ្អើល​នៅ​ពេល​ឃើញ​មានពលរដ្ឋ​មក​ច្រើន​ទើបបាន​ជា​ខ្ញុំ​ជម្រាប​ទៅ​គេ​មុន​។ យើង​ទាម​​​​​ទារ​​​ឲ្យ​​អាជ្ញាធរ​ផ្អាក​ជា​បន្ទាន់​ដើម្បី​ទប់​ស្កាត់ឲ្យ​ព្រៃ​ឡង់​បាន​គង់​វង្ស​ទៅ​ថ្ងៃ​អនាគត​ បើ​មិន​ដូច្នោះ​ទេ​ វា​អាចនឹង​ហួស​ពេល​ហើយ​ក្នុង​ការ​រក្សាព្រៃ​ឡង់​ ហើយ​ពួក​យើង​ក៏វេទនាដែរ​​​​»។​

កាល​ពី​ថ្ងៃ​ទី២២​ ខែ​មករា ឆ្នាំ ២០១៣ បណ្តាញ​សហគមន៍​ព្រៃ​ឡ​ង់ មកពី​ខេត្ត​ចំនួន​បួនបាន​មក​ធ្វើ​សន្និសីទ​សារព័ត៌មាន​ដោយ​អំពាវនាវ​​ឲ្យ​រាជរដ្ឋាភិបាល ជំរុញ​ការ​អនុម័ត​​សេចក្តី​ព្រាង​អនុក្រឹត្យ ស្តីពីការបង្កើត​តំបន់​ព្រៃ​ការពារ​និង​​អភិរក្ស​ជីវចម្រុះ«​ព្រៃ​ឡង់» ឲ្យបាន​ឆាប់ដើម្បី​ទប់​ស្កាត់​បទ​ល្មើស​ទាន់​ពេល​វេលា​ និង​ស្នើ​​ឲ្យ​រដ្ឋា​ភិបាល​សហការ ​ការ​ពារ​ព្រៃ​ឡង់​រួម​ជាមួយ​នឹងសហ​គមន៍។

សេចក្តីព្រាង​អនុក្រឹត្យ បាន​រៀប​​ចំឡើងក្នុង​ឆ្នាំ​២០១១ មាន​៩មាត្រា ដែល​មាន​គោល​ដៅ បង្កើត​តំបន់​ព្រៃ​ការពារ សម្រា​ប់​​​អភិរក្ស​ជីវចម្រុះ "​ព្រៃ​ឡង់​" ដែល​ស្ថិត​នៅក្នុង​ខេត្ត​ក្រចេះ ខេត្ត​កំពង់ធំ ខេត្ត​ព្រះវិហារ និង​ខេត្ត​ស្ទឹងត្រែង​ មាន​ផ្ទៃក្រឡា​សរុប ៦១៥.៣០៦ ហិកតា។​ នៅ​​ក្នុង​សេចក្តីព្រាង​នោះក៏​បាន​កំ​ណត់​​ពី​តំបន់​ហាម​ឃាត់​មិនឲ្យធ្វើ​សកម្ម​ភា​ព​ផ្សេងៗ ក្នុង​តំបន់​ព្រៃ​ការពារ និង​អភិរក្ស​ជី​វចម្រុះ «​ព្រៃ​ឡង់​» មានការកាប់​រាន ដុត​ឈូស​ឆាយ និង​ហ៊ុមព័ទ្ធ​កាន់កាប់​ដី​ព្រៃឈើ ជា​កម្មសិទ្ធិ ការកែច្នៃ​ផល អនុផល​ព្រៃឈើ ការប្រមូល​ផល អនុផល​ព្រៃឈើ និង​សកម្មភាព​បរបាញ់ ដែល​ប៉ះពាល់​ដល់​ព្រៃឈើ និង​សត្វព្រៃគ្រប់​ប្រភេទ​។

​

តាម​របាយការណ៍​របស់​សមាគម​សិទ្ធិ​មនុស្ស​អាដហុក​បាន​ឲ្យ​ដឹង​ថា​ យ៉ាង​ហោច​មានក្រុម​ហ៊ុន​​៣៣​ទ​ទួល​​​បានដី​សម្បទាន​សេដ្ឋ​​កិច្ច​ពី​រដ្ឋា​ភិបាល​ធ្វើ​​វិនិ​យោគ​​ក្នុងតំបន់​​ព្រៃ​ឡង់​ដែល​មាន​ផ្ទៃ​ដី​សរុប១.០៤៥​.៨៥៧​ហិក​តា​​ ក្នុង​​នោះ សម្ប​ទាន​ដី​ព្រៃមាន ​​៧៤៤.៧២០​ហិក​តា ​ឲ្យ​​ទៅ​ក្រុមហ៊ុន​ចំនួន៥ ដីសម្បទាន​សេដ្ឋកិច្ច​១២០.​​៦៩៥​ហិកតា ឲ្យ​​​ទៅក្រុមហ៊ុន​ចំនួន១៤ និង​ដី​សម្បទាន​រ៉ែ​១៨០.៤៤​២​ ហិកតា ​ផ្តល់​ឲ្យ​​ក្រុមហ៊ុន​ចំនួន១៤។ ​

ក្រុម​ហ៊ុនចម្ការកៅ​ស៊ូ CRCK របស់​​វៀត​ណាម​បាន​ទទួល​ដី​សម្បទាន​សេដ្ឋ​កិច្ច​ពីរ​ដ្ឋា​ភិបាល​ នៅ​​ក្នុង​ខែ​ឧសភា ឆ្នាំ២០១០ លើ​ផ្ទៃ​ ៦.១៥៥​ ហិកតា​ នៅ​ក្នុង​ស្រុក​​សណ្តាន់ ​ខេត្ត​កំពង់ធំ ដើម្បី​​ដាំកៅ​ស៊ូ រយៈ​ពេល​៧០ឆ្នាំ។ ក្រុម​ហ៊ុន​ CRCK មិន​អាច​ទាក់ទង​សុំ​ការ​​អត្ថា​ធិប្បាយ​បាន​​ទេ ​កាល​ពី​ម្សិល​មិញ​។ ​

លោក ​សឹម វណ្ណា អភិបាល​ស្រុក​សណ្តាន់​ បាន​ថ្លែង​​ដែរ​ថា​ លោក​​បាន​ទទួល​លិខិត​ជូន​ដំ​ណឹង​របស់​ពលរដ្ឋ​​​ហើយ​ ហើយ​បាន​​ឲ្យ​ពួក​គាត់​​រើ​ស​​​តំណាង​១០​ នាក់​​មក​ពិភាក្សា​នឹង​អាជ្ញាធរ។​ លោក​បញ្ជាក់​​ថា​៖ «​​បើ​យើង​រក​ឃើញ​ដូច​អ្វី​ដែលពួក​គាត់​ចោទ​ប្រ​កាន់ ​នោះ​យើង​នឹង​ឲ្យ​ខាង​ក្រុម​ហ៊ុន​សងថ្លៃ​ខូច​ខាត​មកគាត់​»។​

លោក ​ឈឹម​ សាវុធ​ អ្នកសម្រប​ស​ម្រួល​វេ​ទិ​កា​សា​ធា​រ​​ណៈ​​​​នៅ​​មជ្ឈមណ្ឌលសិទិ្ធមនុស្ស​កម្ពុជា​បាន​ថ្លែង​​ថា សកម្មភា​ព​ឈូស​ឆាយ​យក​ដី​ព្រៃ​យក​មក​ធ្វើ​​ចម្ការ​កំពុង​តែ​ផុស​ផុល​​ក្នុង​ខេត្ត​ទាំង​​បួន​ ​នៅ​ជុំ​វិញ​ព្រៃ​ឡង់​នោះ​។ លោកក៏ឆ្​ង​ល់​​ដែរ​ថា​ មិនដឹង​មាន​មូល​ហេតុ​អ្វី​បាន​ជា​សមត្ថកិច្ច​​ពុំ​ចាត់​ការ​ក្នុង​ករណី​នេះ។​ លោក​​ថា​​៖​«​បើ​តាម​ខ្ញុំ​សន្និដ្ឋាន​ ​អាជ្ញា​ធរ​មូល​ដ្ឋាន​ដូច​ជាពុំ​ធ្វើ​ការ​ទេ​ បាន​ជា​

រង​ចាំ​ទាល់​តែ​​ពលរដ្ឋ​ទៅ​ប្តឹង​​ដល់​ការិ​យាល័យ​បែប​នេះ​»​។​​

លោក​បញ្ជាក់​​ថា​ អ្វី​ដែល​ពលរដ្ឋ​ធ្វើ​នេះ​ គឺ​បញ្ជាក់​បាន​ថា​ បើ​ពួក​គាត់​ពុំ​ងើប​ឈ​រធ្វើ​ការ​តវ៉ា​ឬ​ក៏​ប្រ​ឆាំង​ក្រុម​ហ៊ុន​នោះ​ទេ ​គឺ​ពួក​គាត់​នឹង​បាត់​បង់​អ្វី​ៗ​ទាំង​អស់​ ដោយ​​សារ​តែ​អាជ្ញាធរ​គាត់​បាន​បិទ​ភ្នែក​បើក​ដៃឲ្យ​ឈ្មួញ​ធ្វើ​អ្វី​ៗ​តាម​អំ​ពើ​​ចិត្ត​មិន​ខាន​។ ​លោក​​ថា​៖«​ចៅ​ហ្វាយ​ស្រុក​ គួរ​តែ​ដឹង​ថា​មាន​អ្វី​កើត​ឡើង​នៅ​ក្នុង​មូ​លដ្ឋាន​ខ្លួន។​ គាត់​គួរ​​ធ្វើ​ការ​ខ្លះ​ហើយ​»​