KI Media: លោកម៉ម សូណង់ដូ ជិះលើគ្រែស្នែង ចេញពីពន្ធនាគារព្រៃសហើយ

លោក ម៉ម សូណង់ដូ ប្រធានវិទ្យុសម្បុកឃ្មុំ និងជាប្រធានសមាគម អ្នកប្រជាធិបតេយ្យ

ត្រូវបានដោះលែងពីពន្ធនាគារព្រៃស នៅព្រឹកថ្ងៃសុក្រនេះ

ថ្ងៃទី 15 មីនា 2013 | ដោយ: លីសិលា

Cambodia Express News

ភ្នំពេញ: នៅវេលាម៉ោង៩និង៣០នាទីព្រឹកថ្ងៃទី១៥ ខែមីនានេះ លោកម៉ម សូណង់ដូ ត្រូវបានដោះលែងចេញពីពន្ធនាគារព្រៃស ដោយគេដាក់គ្រែស្នែងនិងមានបាំងក្លស់ សែងគាត់ចេញពីពន្ធនាគារ ដោយមានសមាជិកសមាគមអ្នកប្រជាធិបតេយ្យប្រហែលជា១០០០នាក់នៅអមសងខាងផ្លូវ ទះដៃសាទរនូវវត្តមានលោកម៉ម សូណង់ដូ ដែលត្រូវបានគេដោះលែងនោះ។
ក្នុងនោះដែរគេឃើញមានវត្តមានមន្ត្រីអង្គការសង្គមស៊ីវិល អង្គការក្រៅរដ្ឋាភិបាល និងតំណាងរាស្រ្តគណបក្សប្រឆាំងជាច្រើនរូបបានចូលរួមដង្ហែលោកម៉ម សូណង់ដូ។
បើតាមគម្រោងគេនឹងដង្ហែលោកម៉ម សូណង់ដូ តាមគ្រែស្នែងពីពន្ធនាគារព្រៃស ទៅផ្ទះរបស់គាត់នៅកៀនស្វាយ ខេត្តកណ្តាល ដែលជាស្ថានីយវិទ្យុសំបុកឃ្មុំ ដោយថ្មើរជើង។
តាមគម្រោងបន្ទាប់ពីការដោះលែង លោកម៉ម សូណង់ដូ នឹងធ្វើសន្និសីទកាសែតនៅផ្ទះរបស់លោកនៅឯកៀនស្វាយ ខេត្តកណ្តាល ដើម្បីរៀបរាប់ពីស្ថានភាពដែលលោកជាប់ពន្ធនាគារ រួមទាំងការចោទប្រកាន់មកលើរូបលោក និងការបដិសេធទៅនឹងរឿងទំនាស់ដីធ្លីភូមិប្រម៉ា ឃុំកំពង់ដំរី ស្រុកស្នួល ខេត្តក្រចេះ។

សូមរម្លឹកថា លោក ម៉ម សូណង់ដូ មានអាយុ ៧២ ឆ្នាំ ជានាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានលោកចៅក្រម ឃុន លាងម៉េង ប្រធានក្រុមប្រឹក្សាជំនុំជម្រះរបស់តុលាការសាលាឧទ្ធរណ៍ បានប្រកាសសាលដីកា ដោយសម្រេចបន្ធូរបន្ថយទោសជាប់ពន្ធនាគារ ២០ ឆ្នាំ កាលពីនៅតុលាការក្រុងភ្នំពេញ មកនៅត្រឹមទោសជាប់ពន្ធនាគារ ៥ ឆ្នាំ លើលោក ម៉ម សូណង់ដូ។
ក៏ប៉ុន្តែចៅក្រម បានសម្រេចថា លោក ម៉ម សូណង់ដូ ត្រូវអនុវត្តន៍ទោសនៅក្នុងពន្ធនាគារតែ ៨ ខែប៉ុណ្ណោះ។ ដូច្នេះបើគិតពីថ្ងៃចាប់ខ្លួន កាលពីថ្ងៃទី១៥ ខែកក្កដា ឆ្នាំ២០១២ គឺលោក ម៉ម សូណង់ដូ បានជាប់ពន្ធនាគារគម្រប់ ៨ ខែ គិតដល់ថ្ងៃទី១៥ ខែមីនា ឆ្នាំ២០១៣។
តាមសេចក្តីសម្រេចរបស់ចៅក្រមតុលាការសាលាឧទ្ធរណ៍ លោក ម៉ម សូណង់ដូ នឹងត្រូវដោះលែងចេញពីពន្ធនាគារព្រៃស នៅព្រឹកថ្ងៃទី១៥ ខែមីនា ឆ្នាំ២០១៣។
បទចោទប្រកាន់លោក ម៉ម សូណង់ដូ ត្រូវបានចៅក្រមភ្ជាប់នឹងព្រឹត្តិការណ៍ជម្លោះដីនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ កាលពីខែមេសា និងខែឧសភា ឆ្នាំ២០១២។ ក្នុងសាលដីកាកាត់តម្រឹមទោសនោះ គឺចៅក្រមសាលាឧទ្ធរណ៍ មិនបានពិន័យជាប្រាក់ឡើយ។
ដោយឡែកប្រជាពលរដ្ឋពីរនាក់ទៀត ដែលត្រូវបាននាំមកកាត់ទោសជាមួយលោក ម៉ម សូណង់ដូ ក៏ត្រូវចៅក្រមសម្រេចបន្ធូរបន្ថយទោសពី ៥ ឆ្នាំ មកនៅត្រឹមជាប់ពន្ធនាគារ ១០ ខែ។ បើគិតតាំងពីថ្ងៃចាប់ខ្លួន គឺបុរសអ្នកភូមិប្រម៉ាទាំងពីរនាក់ នឹងត្រូវរួចខ្លួននៅថ្ងៃទី១៥ ឬក៏ថ្ងៃទី១៦ ខែមីនា ឆ្នាំ២០១៣៕