កម្ពុជា​កាន់​តែ​ធ្វើ​ឲ្យ​អ្នក​ជាវ​ធុញ​ទ្រាន់

 
Tuesday, 05 March 2013
នុត ឈឿម
ភ្នំពេញប៉ុស្តិ៏

អគ្គិសនី កម្ពុជា ជា​វត្ថុ​ធាតុ​ដើម​មួយ​ ដែល​ប្រជាជន​គ្រប់​ជាន់​ថ្នាក់​ចង់​បាន​មក​ប្រើ​ប្រាស់​គ្រប់​ៗ​គ្នា។ ​នៅ​ក្នុង​រាជធានី​ក្តី ឬ​នៅ​តំបន់​​នា​នា​ក្តី ​ប្រសិន​ជា​ពេល​យប់​ឥត​​មាន​អគ្គិសនី​ជួយ​​ផង​ទេ​ ទី​នោះ​ឯង​​ប្រាក​ដ​ជា​មិន​ខុស​ពី​នៅ​ស្រុក​ស្រែ​ទេ​។ ​សព្វ​ថ្ងៃ​ប្រជា​ជន​នៅ​តំបន់​ខ្លះ កាន់​តែ​ក្តៅ​ក្រហាយ​យ៉ាង​ខ្លាំង​​ដោយ​សារ​ ក្រសួង​​អគ្គិសនី​កម្ពុជា​​​បាន​ផ្តាច់​ភ្លើង​ ជួន​កាល​មួយ​ថ្ងៃ​២​ដង​ក៏​មាន​ឬ​ជួន​កាល​​គេ​ផ្តាច់​​ពី​ម៉ោង​ ៧​ ព្រឹក​ដល់​ម៉ោង​ ១២​​ ថ្ងៃ​ត្រង់​​​ តែ​​ដល់​ម៉ោង​ ១៣ រសៀល​​បន្ទាប់​ពី​មាន​​ភ្លើង​មួយ​ម៉ោង​ ​គេ​ផ្តាច់​រហូត​ដល់​​ម៉ោង​ ១៨​ ល្ងាច​​ក៏​មាន​ ​ឬ​ក៏​​ពី​ម៉ោង ​១៨ ដល់​ម៉ោង​២១​ យប់​ក៏​មាន​។ ​ការ​​ផ្តាច់​ភ្លើង​បែប​នេះ​​ធ្វើ​ឲ្យ​​​ខូច​ខាត​ជា​ច្រើន​ដូច​ជា​ទូរ​ ទស្សន៍ ឬ​ខ្សែ​កាប។​

គេ​ឆ្ងល់​ថា​ ថ្មី​ៗ​នេះ​ នៅ​ពេល​ទៅ​ឃោសានា​បោះ​ឆ្នោត​ លោក កែវ រតនៈ ប្រធាន​អគ្គ​នាយក​ (​ដែល​តែង​​តាំង​​​ឡើង​បុណ្យ​​ដោយ​សារ​សែស្រ​ឡាយ​) បាន​អួត​ប្រាប់​អ្នក​ស្រុក​​អ្នក​ភូមិ​​ឲ្យ​សប្បាយ​​ចិត្ត​មួយ​ពេល​ (​បន្តិច​ទៀត​អគ្គិសនី​កម្ពុជា​​នឹង​ធ្វើ​​ឲ្យ​​មាន​ភ្លើង​គ្រប់​កន្លែង​ ទោះ​ជា​នៅ​ឆ្ងាយ​ដាច់​ស្រយាល​ ក៏​មាន​អគ្គិសនី​កម្ពុជា​​រត់​ទៅ​ដល់​ទី​នោះ​ដែរ​)។ ​តែ​ផ្ទុយ​ទៅ​វិញ​ គ្រាន់​តែ​នៅ​ជុំ​វិញ​រាជ​ធានី​ភ្នំពេញ ភ្លើង​ចែក​ចាយ​មិន​គ្រប់​ទៅ​ហើយ​ តើ​កាល​ណា​ទៅ! ​ឆ្នាំ​ណា​ទៅ​! ​ទើប​ប្រសាសន៍​លោក​ប្រធាន​អគ្គនាយក​មាន​ប្រសិទ្ធ​ភាព?

ពេល បោះឆ្នោត​ជិត​មក​ដល់​ហើយ មិន​គួរ​ណា​ឡើយ​ លោក​អគ្គិសនី​កម្ពុជា​ធ្វើ​ឲ្យ​ប្រជា​ជន​​ក្តៅ​ក្រហាយ​ដូច្នេះសោះ​!​ គួ​រណាស់​​យ៉ាង​ហោច​ណាស់​​ត្រូវ​មាន​សេចក្តី​បញ្ជាក់​ពី​មូល​ហេតុ​​ផ្តាច់ ​ភ្លើង​តាម​ចិត្ត​បែប​នេះ​ដែរ​។ យើង​បាន​ទូរស័ព្ទ​ទៅ​សាក​សួរ​​ទីចាត់​ការ​អគ្គិសនី​ គេ​បាន​ធ្វើ​​ឲ្យ​យើង​ខក​ចិត្ត​យ៉ាង​ខ្លាំង​ថា​«អគ្គិសនី​កម្ពុជា​ខ្វះ ​ភ្លើង​ខ្លាំង​ណាស់​ចាំពី​ ៣ ​ទៅ ៥ ខែ​ទៀត​​ទើប​អាច​ចែក​ចាយ​ប្រសើរ​ជាង​សព្វ​ថ្ងៃ​នេះ(គឺចាំដល់ពេលបោះឆ្នោត!)​។ នៅ​សង្កាត់​ចោម​ចៅ​ ត្រូវ​ទិញ​សាំង​ចាក់​ម៉ាស៊ីន​ភ្លើង​ខ្លួន​ឯង​ អស់​យ៉ាង​តិច​​ក៏ ២០​ ដុល្លារ​ដែរ​ក្នុង​មួយ​ថ្ងៃ​

 (លើក​លែង​តែ​នៅ​តំបន់​ណា​ដែល​មាន​អ្នក​មាន​បុណ្យ​ស័កិ្ត ដូច​ជា​ ខ្សែ​ភូមិ​គ្រឹះ​ (Villa) ​របស់​ឯក​ឧត្តម ចម ប្រសិទ្ធ និង​ឯក​ឧត្តម​ មាន​សំណាង​ខ្លះ​ទៀត​ដែល​មាន​សំណាង​មិន​សូវ​ត្រូវ​​គេ​ផ្តាច់​​ភ្លើង​ បើ​មាន​ផ្តាច់​យ៉ាង​យូរ​ណាស់​ត្រឹម​តែ​មួយ​ម៉ោង​ប៉ុណ្ណោះ​។

សូម ក្រសួង​អគ្គិសនី​កម្ពុជា​ផ្តល់​​ព័ត៌​មាន​​​ឲ្យ​ច្បាស់​លាស់​ឲ្យ​ដល់​​អ្ន​ក ​ជាវ​​ទាំង​អស់ ​​ថា​តើ​ហេតុ​ដូម្តេ​ច​ភ្លើង​​ចេះ​តែ​ដាច់​។ សូម​​គោរព​ដល់​អតិថិជន​អ្នក​ជាវ​ខ្លះ​ផង​! PS

ដោយ​ នុត ឈឿម ​ទីប្រឹក្សា​ផ្ទាល់​​សម្តេច​អគ្គ​មហា​សេនាបតី​តេ​ជោ ហ៊ុន សែន នាយក​រដ្ឋ​មន្រ្តី​​នៃ​ព្រះ​រាជា​ណា​ចក្រ​កម្ពុជា​ ឋានៈ​ស្មើ​ទេស​រដ្ឋ​មន្រ្តី